ഗൂഗിളിന്റെ സ്വന്തം ക്രെഡിറ്റ് കാർഡ്; 'പേ ഫ്ലെക്സ്' ക്രെഡിറ്റ് കാർഡിനെക്കുറിച്ച് അറിയേണ്ടതെല്ലാം

ഡിജിറ്റൽ പേയ്മെന്റ് രംഗത്തെ പ്രമുഖരായ ഗൂഗിൾ പേ, ആക്സിസ് ബാങ്കുമായി സഹകരിച്ച് ഇന്ത്യയിൽ തങ്ങളുടെ ആദ്യത്തെ ക്രെഡിറ്റ് കാർഡ് പുറത്തിറക്കി. 'ഗൂഗിൾ പേ ഫ്ലെക്സ് ആക്സിസ് ബാങ്ക് ക്രെഡിറ്റ് കാർഡ്' എന്ന് പേരിട്ടിരിക്കുന്ന ഈ കാർഡ് പൂർണ്ണമായും ഡിജിറ്റലായിട്ടാണ് പ്രവർത്തിക്കുന്നത്. റുപേ നെറ്റ്‌വർക്കിൽ പ്രവർത്തിക്കുന്നതിനാൽ സാധാരണ യുപിഐ പേയ്മെന്റുകൾ പോലെ തന്നെ ഈ ക്രെഡിറ്റ് കാർഡും എളുപ്പത്തിൽ ഉപയോഗിക്കാം എന്നതാണ് ഇതിന്റെ പ്രധാന സവിശേഷത.

 

ഇന്ത്യയിലെ സാധാരണക്കാരായ ഉപഭോക്താക്കൾക്കിടയിൽ ക്രെഡിറ്റ് സൗകര്യം കൂടുതൽ ജനകീയമാക്കുക എന്ന ലക്ഷ്യത്തോടെയാണ് ഗൂഗിൾ ഈ ചുവടുവെപ്പ് നടത്തിയിരിക്കുന്നത്. ഫോൺ പേ പോലുള്ള മറ്റ് പേയ്മെന്റ് ആപ്പുകളും സമാനമായ സേവനങ്ങൾ നൽകുന്നുണ്ടെങ്കിലും ഗൂഗിളിന്റെ ഈ കടന്നുവരവ് വിപണിയിൽ വലിയ മാറ്റങ്ങൾ ഉണ്ടാക്കുമെന്നാണ് സാമ്പത്തിക വിദഗ്ധർ വിലയിരുത്തുന്നത്.

 

 

ഫ്ലെക്സ് ക്രെഡിറ്റ് കാർഡിന്റെ പ്രധാന പ്രത്യേകതകൾ 

 

1. പൂർണ്ണമായും ഡിജിറ്റൽ: ബാങ്കിൽ പോകേണ്ടതില്ല, രേഖകൾ നേരിട്ട് നൽകേണ്ടതില്ല. ഗൂഗിൾ പേ ആപ്പിലൂടെ മിനിറ്റുകൾക്കുള്ളിൽ കാർഡിനായി അപേക്ഷിക്കാം. അംഗീകാരം ലഭിച്ചാലുടൻ ഡിജിറ്റൽ കാർഡ് ഉപയോഗിച്ച് തുടങ്ങാം.

 

2. യുപിഐ സൗകര്യം: ഏതൊരു കടയിലെയും യുപിഐ ക്യുആർ കോഡ് സ്‌കാൻ ചെയ്ത് ക്രെഡിറ്റ് കാർഡ് വഴി പണമടയ്ക്കാം. കയ്യിൽ കാർഡ് കരുതേണ്ട ആവശ്യമില്ല.

 

3. റിവാർഡ് പോയിന്റുകൾക്ക് പകരം 'സ്റ്റാറുകൾ': നിങ്ങൾ ചിലവാക്കുന്ന ഓരോ 500 രൂപയ്ക്കും 'സ്റ്റാറുകൾ' ലഭിക്കും. ഒരു സ്റ്റാർ എന്നാൽ ഒരു രൂപയ്ക്ക് തുല്യമാണ്. ഈ സ്റ്റാറുകൾ അടുത്ത പേയ്മെന്റുകളിൽ നേരിട്ട് പണമായി ഉപയോഗിക്കാം.

 

4. ഫ്ലെക്സിബിൾ തിരിച്ചടവ്: ക്രെഡിറ്റ് കാർഡ് ബില്ലുകൾ പൂർണ്ണമായോ അല്ലെങ്കിൽ ലഘുവായ മാസതവണകളായോ തിരിച്ചടയ്ക്കാനുള്ള സൗകര്യമുണ്ട്.

 

5. ഇൻ-ആപ്പ് നിയന്ത്രണം: ഗൂഗിൾ പേ ഫ്ലെക്സ് ആക്സിസ് ബാങ്ക് ക്രെഡിറ്റ് കാർഡ് ഉപയോക്താക്കൾക്ക് അവരുടെ ക്രെഡിറ്റ് കാർഡ് ഉപയോഗം നിയന്ത്രിക്കാനും, കാർഡ് ബ്ലോക്ക് ചെയ്യാനോ അൺബ്ലോക്ക് ചെയ്യാനോ, അല്ലെങ്കിൽ പിൻ തൽക്ഷണം റീസെറ്റ് ചെയ്യാനോ ഗൂഗിൾ പേ ആപ്പ് അനുവദിക്കും.

 

നിലവിൽ തിരഞ്ഞെടുത്ത ഉപഭോക്താക്കൾക്കാണ് ഇത് ലഭ്യമായി തുടങ്ങിയിരിക്കുന്നത്. നിലവിൽ ഈ കാർഡിന് ജോയിനിങ് ഫീസോ വാർഷിക ഫീസോ ഈടാക്കുന്നില്ല എന്നാണ് റിപ്പോർട്ടുകൾ സൂചിപ്പിക്കുന്നത്.