റിസ്കില്ല; ഒറ്റത്തവണ നിക്ഷേപത്തിൽ മാസ വരുമാനം ഉറപ്പിക്കാം; മൂന്നു വഴികളിതാ

സ്ഥിരവരുമാനം ആഗ്രഹിക്കുന്നവർക്കുള്ള നിക്ഷേപങ്ങൾ ഒരുപാടുണ്ട്. ഇവയിൽ ഓരോരുത്തരുടെയും റിസ്കിന് അനുസരിച്ചുള്ള സുരക്ഷിത നിക്ഷേപങ്ങൾ പരിഗണിക്കുകയാണ് മികച്ച ഓപ്ഷൻ. ഒറ്റത്തവണ നിക്ഷേപത്തിലൂടെ വലിയ തുക മാസ വരുമാനം ഉണ്ടാക്കാൻ പറ്റുന്ന റിസ്ക് കുറഞ്ഞ നിക്ഷേപങ്ങളിൽ ചിലതാണ് സീനിയർ സിറ്റിസൺ സേവിംഗ്സ് സ്കീം, പോസ്റ്റ് ഓഫീസ് പ്രതിമാസ വരുമാന പദ്ധതി, മ്യൂച്വൽ ഫണ്ട് സിസ്റ്റമാറ്റിക് വിത്ത്ഡ്രോവൽ പ്ലാൻ എന്നിവ.

സീനിയർ സിറ്റിസൺസ് സേവിംഗ്സ് സ്കീം

കേന്ദ്ര സർക്കാർ മുതിർന്ന പൗരന്മാർക്ക് നൽകുന്ന നിക്ഷേപ പദ്ധതിയാണ് സീനിയർ സിറ്റിസൺസ് സേവിംഗ്സ് സ്കീം. 60 വയസിന് മുകളിൽ പ്രായമുള്ളവർക്കാണ് നിക്ഷേപിക്കാൻ സാധിക്കുക. സൈന്യത്തിൽ നിന്ന് വിരമിച്ചവർക്ക് 50 വയസും സൂപ്പർആനുവേഷനിൽ വിരമിച്ചവരുമാണെങ്കിൽ 55 വയസും മതിയാകും. 1,000 രൂപ മുകൽ പരമാവധി 30 ലക്ഷം രൂപയാണ് നിക്ഷേപിക്കാൻ സാധിക്കുക. പദ്ധതിക്ക് അഞ്ച് വർഷത്തെ ലോക്ക്-ഇൻ കാലയളവ് ഉണ്ട്. പലിശ നിരക്ക് പ്രതിവർഷം 8.20 ശതമാനമാണ്. ത്രൈമാസത്തിലൊരിക്കലാണ് പലിശ നൽകുക. അക്കൗണ്ട് തുറക്കാൻ അടുത്തുള്ള പോസ്റ്റ് ഓഫീസോ ബാങ്കോ സന്ദർശിച്ചാൽ മതിയാകും.

പോസ്റ്റ് ഓഫീസ് പ്രതിമാസ വരുമാന പദ്ധതി

പോസ്റ്റ് ഓഫീസ് നടത്തുന്ന മറ്റൊരു കേന്ദ്ര സർക്കാർ നിക്ഷേപ പദ്ധതിയാണ് പ്രതിമാസ വരുമാന പദ്ധതി. മാസത്തിൽ പലിശ വരുമാനം നൽകുന്നു. സ്ഥിരമായ പ്രതിമാസ വരുമാനം ആവശ്യമുണ്ടെങ്കിൽ, ബാങ്ക് സ്ഥിര നിക്ഷേപങ്ങളെ അപേക്ഷിച്ച് നിക്ഷേപ നിരക്ക് കൂടുതലായതിനാൽ ഇതൊരു മികച്ച ഓപ്ഷനാണ്. ഏറ്റവും കുറഞ്ഞ നിക്ഷേപം 1,000 രൂപയാണ്. പരമാവധി നിക്ഷേപം വ്യക്തിഗത അക്കൗണ്ടിൽ 9 ലക്ഷം രൂപയും ജോയിന്റ് അക്കൗണ്ടിന് 15 ലക്ഷം രൂപയുമാണ്. പ്രതിവർഷം 7.4 ശതമാനമാണ് പലിശ. 5 വർഷമാണ് കാലാവധി.

സിസ്റ്റമാറ്റിക്ക് വിത്ത്ഡ്രോവൽ പ്ലാൻ

മ്യൂച്വൽ ഫണ്ട് നിക്ഷേപകന് ഒരു സ്കീമിൽ നിന്ന് ബാങ്ക് അക്കൗണ്ടിലേക്ക് ഘട്ടം ഘട്ടമായി പണം പിൻവലിക്കാനുള്ള രീതിയാണ് സിസ്റ്റമാറ്റിക്ക് വിത്ത്ഡ്രോവൽ പ്ലാൻ. മ്യൂച്വൽ ഫണ്ട് നിക്ഷേപം ആരംഭിച്ച ശേഷം പ്രതിമാസം ഒരു നിശ്ചിത തുക അല്ലെങ്കിൽ നിശ്ചിത യൂണിറ്റ് പിൻവലിക്കാം. സിസ്റ്റമാറ്റിക് ഇൻവെസ്റ്റ്മെന്റ് പ്ലാനിന്റെ (എസ്ഐപി) നേർ വിപരീതമാണ് സിസ്റ്റമാറ്റിക് വിത്ത്ഡ്രോവൽ പ്ലാൻ.

മ്യൂച്വൽ ഫണ്ടുകളിലെ നിക്ഷേപങ്ങൾ വിപണിയിലെ ഏറ്റക്കുറച്ചിലുകൾക്ക് വിധേയമാണ്. സ്കീമിന്റെ പ്രകടനം മോശമായാൽ പിൻവലിക്കുന്ന തുക നിക്ഷേപത്തിൽ നിന്നായിരിക്കും. വിപണി മികച്ച നേട്ടമുണ്ടാക്കുന്ന കാലത്ത് അനുയോജ്യമായ രീതിയാണിത്.

50 ലക്ഷം രൂപ ഇക്വിറ്റി മ്യൂച്വൽ ഫണ്ടിൽ നിക്ഷേപിച്ചൊരാൾക്ക് എട്ടു ശതമാനം വാർഷിക റിട്ടേൺ ലഭിച്ചാൽ വർഷത്തിൽ 1.75 ലക്ഷം രൂപ മുതൽ 2 ലക്ഷം രൂപ വരെ ലഭിക്കും. ഇത് മാസത്തിസേക്ക് കണക്കാക്കിയാൽ 14,600 രൂപ മുതൽ 16700 രൂപ വരെയാണ്. നികുതി, പണപ്പെരുപ്പം എന്നിവ പരിഗണിക്കാതെയുള്ള കണക്കാണിത്.