പ്രായം 60 കഴിഞ്ഞോ? ഇരട്ടി ലാഭം തരുന്ന ഈ സ്കീമുകളിൽ നിക്ഷേപിക്കാം, ഉറപ്പുള്ള വരുമാനവും കിട്ടും

മുതിർന്ന പൗരൻമാർക്ക് സാമ്പത്തിക സുരക്ഷ ആവശ്യമാണ്. അതിനായി വാർദ്ധക്യ കാലത്ത് മികച്ച നിക്ഷേപങ്ങൾ വേണം. മുതിർന്ന പൗരൻമാർക്കായി നിരവധി നിക്ഷേപ ഓപ്ഷനുകളുണ്ട്. സാധാരണ പൗരൻമാരെ അപേക്ഷിച്ച് മുതിർന്ന പൗരൻമാർക്ക് പലിശ നിരക്ക് കൂടുതലായിരിക്കും. മറ്റുള്ളവരെ ആശ്രയിക്കാതെ ഉറപ്പുള്ള ഒരു സാമ്പത്തിക സ്രോതസ്സിനായി മുതിർന്നവർക്ക് നിക്ഷേപിക്കാവുന്ന സ്കീമുകളാണ് സീനിയർ സിറ്റിസൺ സേവിംഗ്സ് സ്കീം (SCSS), കിസാൻ വികാസ് പത്ര (KVP), പോസ്റ്റ് ഓഫീസ് പ്രതിമാസ വരുമാന പദ്ധതി (POMIS), നാഷണൽ സേവിംഗ്സ് സർട്ടിഫിക്കറ്റ് (NSC) എന്നിവ.

ബാങ്കുകളും, പോസ്റ്റ് ഓഫീസും മറ്റു ധനകാര്യ സ്ഥാപനങ്ങളുമെല്ലാം മുതിർന്ന പൗരൻമാർക്ക് വിവിധ സ്കീമുകൾ നൽകുന്നുണ്ട്. ഓരോ നിക്ഷേപങ്ങൾക്കും ഉയർന്ന പലിശയും വാ​ഗ്ദാനം ചെയ്യുന്നു. നിങ്ങൾ ജോലി ചെയ്ത കാലത്ത് സമ്പാദിച്ച തുക ഈ സ്കീമുകളിൽ നിക്ഷേപിച്ച് വലിയ ഉറപ്പുള്ള റിട്ടേണുകൾ നേടാൻ സാധിക്കും. ഓരോ പദ്ധതികളെ കുറിച്ചും വിശദമായി പരിശോധിക്കാം.

1) സീനിയർ സിറ്റിസൺ സേവിംഗ്സ് സ്കീം (SCSS)

60 വയസ്സിന് മുകളിലുള്ള ഏതൊരു വ്യക്തിക്കും ഈ പദ്ധതിയിൽ നിക്ഷേപിക്കാം. 5 വർഷത്തെ കാലാവധിയിലേക്കാണ് ഈ നിക്ഷേപം. 55 വയസ്സിൽ നിന്ന് ജോലിയിൽ നിന്ന് വിരമിക്കുന്നവർക്കും ഈ സ്കീമിൽ നിക്ഷേപിക്കാം എന്നതാണ് പ്രത്യേകത. നിങ്ങൾക്ക് ഒറ്റത്തവണയായി വലിയ തുക നിക്ഷേപിക്കാം. പരമാവധി 30 ലക്ഷം വരെ നിക്ഷേപിക്കാൻ സാധിക്കും.

ഏറ്റവും കുറഞ്ഞ നിക്ഷേപം 1000 രൂപയാണ്. നിങ്ങൾക്ക് ഈ സേവിം​ഗ്സ് സ്കീമിലൂടെ പ്രതിവർഷം 8.2 ശതമാനമാണ് പലിശ. സിം​ഗിൾ അക്കൗണ്ടിന് പുറമേ ജോയിന്റ് അക്കൗണ്ടുകളും നിങ്ങൾക്ക് തുടങ്ങാൻ സാധിക്കും. ആവശ്യമെങ്കിൽ കാലാവധി പൂർത്തിയാവുന്നതിനു മുന്നേ നിങ്ങൾ നിക്ഷേപ തുക പിൻവലിക്കാം. എന്നാൽ അതിന് ചില നിബന്ധനകളുണ്ട്.

2) കിസാൻ വികാസ് പത്ര (KVP)

പോസ്റ്റ് ഓഫീസ് ആരംഭിച്ച ഒരു സേവിം​ഗ്സ് സ്കീമാണ് കിസാൻ വികാസ് പത്ര. ഈ നിക്ഷേപത്തിന്റെ കാലാവധി 115 മാസമാണ് (ഒമ്പത് വർഷവും ഏഴ് മാസവും). ഈ കാലം കൊണ്ട് നിങ്ങളുടെ നിക്ഷേപം ഇരട്ടിയാകും. നിങ്ങൾക്ക് ഏറ്റവും കുറഞ്ഞത് 1,000 രൂപ നിക്ഷേപിച്ച് ഈ അക്കൗണ്ട് ആരംഭിക്കാം. പരമാവധി തുകയ്ക്ക് നിയന്ത്രണങ്ങളില്ല. സിം​ഗിൾ അല്ലെങ്കിൽ ജോയിന്റ് അക്കൗണ്ടായും നിക്ഷേപിക്കാൻ സാധിക്കും. 7.5% പലിശയാണ് കിസാൻ വികാസ് പത്ര വാ​ഗ്ദാനം ചെയ്യുന്നത്. ഈ നിക്ഷേപത്തിന് പലിശ ആനുകൂല്യങ്ങൾ ലഭ്യമല്ല.

3) പോസ്റ്റ് ഓഫീസ് പ്രതിമാസ വരുമാന പദ്ധതി (POMIS)

പോസ്റ്റ് ഓഫീസ് പ്രതിമാസ വരുമാന പദ്ധതി ഒരു ജനപ്രിയ നിക്ഷേപ പദ്ധതിയാണ്. 5 വർഷത്തെ കാലാവധിയുള്ള ഈ സ്കീമിന്റെ പലിശ നിരക്ക് പ്രതിവർഷം 7.4 ശതമാനമാണ്. ഈ സ്കീമിൽ ഏറ്റവും കുറഞ്ഞത് 1000 രൂപ നിക്ഷേപിച്ച് അക്കൗണ്ട് തുടങ്ങാം. സിം​ഗിൾ അക്കൗണ്ടുകൾക്ക് പരമാവധി 9 ലക്ഷം രൂപയും, ജോയിൻ്റ് അക്കൗണ്ടുകൾക്ക് പരമാവധി 15 ലക്ഷം രൂപയാണ് നിക്ഷേപ പരിധി. പോസ്റ്റ് ഓഫീസ് പ്രതിമാസ വരുമാന പദ്ധതിയിലൂടെ മുതിർന്ന പൗരൻമാർക്ക് സ്ഥിരമായ വരുമാനം എല്ലാ മാസവും ഉറപ്പാക്കാൻ സാധിക്കും.

4) നാഷണൽ സേവിംഗ്സ് സർട്ടിഫിക്കറ്റ് (NSC)

പോസ്റ്റ് ഓഫീസ് സ്കീമുകൾക്ക് കീഴിലുള്ള ഒരു ചെറുകിട സമ്പാദ്യ പദ്ധതിയാണ് നാഷണൽ സേവിംഗ്സ് സർട്ടിഫിക്കറ്റ്. മുതിർന്ന പൗരൻമാർക്ക് മികച്ച നേട്ടം കൈവരിക്കാൻ ഇതിലൂടെ സാധിക്കും. ഒപ്പം ഉയർന്ന റിട്ടേണും. 5 വർഷത്തേ കാലാവധിയിലേക്ക് പ്രതിവർഷം 7.7% നിരക്കിൽ പലിശയും വാ​ഗ്ദാനം ചെയ്യുന്നു. ഒരാൾക്ക് കുറഞ്ഞത് 1000 രൂപ നിക്ഷേപിച്ച് ഇവിടെ അക്കൗണ്ട് ആരംഭിക്കാം. പരമാവധി നിക്ഷേപത്തിന് പരിധിയില്ല.