മാസ വരുമാനം എത്രയുണ്ട്? ഇനി ക്രെഡിറ്റ് കാർഡ് എടുക്കണമെങ്കിൽ ഈ വിവരങ്ങൾ നിർബന്ധം....

ഇന്ന് മുതൽ സാമ്പത്തിക മേഖലയിൽ രാജ്യത്ത് വലിയ മാറ്റങ്ങളാണ് വന്നിരിക്കുന്നത്. ഇതിന്റെ ഭാ​ഗമായി എല്ലാ ബാങ്കുകളിലും നിയമങ്ങൾ പരിഷ്കരിച്ചിട്ടുണ്ട്. ബാങ്ക് ഇടപാടുകളിൽ പ്രത്യേകിച്ച് ക്രെഡിറ്റ്, ഡെബിറ്റ് കാർഡുകളുടെ ഉപയോ​ഗത്തിലും ഈ മാറ്റങ്ങൾ ബാധകമാണ്. ഈ അവസരത്തിൽ എച്ച്.ഡി.എഫ്.സി ബാങ്ക് അതിൻ്റെ പ്രീമിയം ക്രെഡിറ്റ് കാർഡുകൾക്കുള്ള യോഗ്യത പുതുക്കി. എച്ച്.ഡി.എഫ്.സിയുടെ സൂപ്പർ പ്രീമിയം ക്രെഡിറ്റ് കാർഡുകളായ ഇൻഫിനിയ, ഡൈനേഴ്‌സ് ക്ലബ് ബ്ലാക്ക്' ഉപയോ​ഗിക്കുന്നവർക്കാണ് ഇത്ബാധകം.

എച്ച്‌ഡിഎഫ്‌സി ബാങ്ക് അതിൻ്റെ സൂപ്പർ പ്രീമിയം ക്രെഡിറ്റ് കാർഡുകളായ 'ഇൻഫിനിയ', 'ഡൈനേഴ്‌സ് ക്ലബ് ബ്ലാക്ക്' എന്നിവയ്ക്കുള്ള യോഗ്യതാ മാനദണ്ഡം ഉയർത്തി. 'ഇൻഫിനിയ' കാർഡ് ലഭിക്കുന്നതിന് സ്വകാര്യ മേഖലയിലെ ശമ്പളമുള്ള വ്യക്തികൾക്ക് പ്രതിമാസ വരുമാനം 5 ലക്ഷം ഉണ്ടായിരിക്കണം. സ്വയം തൊഴിൽ ചെയ്യുന്ന വ്യക്തികൾക്ക് കാർഡ് ലഭിക്കുന്നതിന് 60 ലക്ഷം രൂപയുടെ ഐ.ടി.ആർ (ആദായ നികുതി റിട്ടേൺ) ഉണ്ടായിരിക്കണം. സർക്കാർ ജീവനക്കാർക്ക് ഈ കാർഡിന് യോഗ്യത നേടുന്നതിനായി 3.5 ലക്ഷം രൂപ മാസവരുമാനം ഉണ്ടായിരിക്കണം .

മികച്ച ചെലവുകളും ചെലവ് അനുപാതവും ലഭിക്കുന്നതിന് ഈ സൂപ്പർ/അൾട്രാ പ്രീമിയം ശ്രേണിയിലുള്ള ക്രെഡിറ്റ് കാർഡുകൾ ശരിയായ കസ്റ്റമറിന് നൽകേണ്ടത് പ്രധാനമാണ്.

'ഡൈനേഴ്‌സ് ക്ലബ് ബ്ലാക്ക്' എന്ന ക്രെഡിറ്റ് കാർഡ് ഉപയോ​ഗിക്കുന്നതിന് കൃത്യമായ സാലറി ലിമിറ്റിനെ കുറിച്ച് പ്രതിപാതിക്കുന്നുണ്ട്. അതായത് സ്വകാര്യ മേഖലയിൽ ജോലി ചെയ്യുന്നവരുടെ ശമ്പള പരിധി പ്രതിമാസം 2.5 ലക്ഷം രൂപയും സർക്കാർ ജീവനക്കാർക്ക് പ്രതിമാസം 1.75 ലക്ഷം രൂപയും ആയി നിശ്ചയിച്ചിട്ടുണ്ട്. എന്നാൽ സെൽഫ് എംപ്ലോയ്മെന്റ് അഥവാ സ്വയം തൊഴിൽ ചെയ്യുന്ന വ്യക്തികൾക്ക് ഈ കാർഡ് നേടാൻ 30 ലക്ഷം രൂപയുടെ ഐ.ടി.ആർ ഉണ്ടായിരിക്കണം.

റി​ഗാലിയ ​ഗോൾഡ് ക്രെഡിറ്റ് കാർഡിന് യോ​ഗ്യത നേടുവാനും ഇത്തരത്തിൽ ശമ്പള പരിധി നിശ്ചയിച്ചിട്ടുണ്ട്. ഇതിൽ സ്വകാര്യ മേഖലയിലെ ജീവനക്കാർക്ക് പ്രതിമാസം 1.5 ലക്ഷം രൂപയും സർക്കാർ ജീവനക്കാർക്ക് പ്രതിമാസം ഒരു ലക്ഷം രൂപയുമാണ് പരിധി പറഞ്ഞിരിക്കുന്നത്. സ്വയം തൊഴിൽ ചെയ്യുന്ന വ്യക്തികൾക്ക് കാർഡ് ലഭിക്കുന്നതിന് 18 ലക്ഷം രൂപയുടെ ഐ.ടി.ആർ നിർബന്ധമായും ഉണ്ടായിരിക്കണം. പുതിയ അപേക്ഷകൾക്ക് പുതിയ വരുമാന യോഗ്യതാ മാനദണ്ഡം ഉടൻ പ്രാബല്യത്തിൽ വന്നു.

ഈ കാർഡുകളുടെ യോഗ്യതാ മാനദണ്ഡങ്ങൾ ബാങ്ക് വ്യക്തമായി വെളിപ്പെടുത്തിയിട്ടില്ല. എന്നാൽ പ്രതിമാസം 3 ലക്ഷം രൂപയിൽ കൂടുതലോ പ്രതിവർഷം 36 ലക്ഷം രൂപയിൽ കൂടുതലോ ഉള്ള വ്യക്തികളെ മാത്രമേ ഇൻഫിനിയ കാർഡിനായി പരിഗണിക്കാറുള്ളു. നല്ല ക്രെഡിറ്റ് സ്കോർ, ഉയർന്ന വാർഷിക വരുമാനം, വേഗത്തിലുള്ള തിരിച്ചടവ് റെക്കോർഡ്, ബാങ്കിലെ ലോം​ഗ് ക്രെഡിറ്റ് ഹിസ്റ്ററി എന്നിവയുള്ള ഉപഭോക്താക്കൾക്ക് ഇൻഫിനിയ പോലുള്ള സൂപ്പർ പ്രീമിയം ക്രെഡിറ്റ് കാർഡുകൾ ഇൻവിറ്റേഷൻ അടിസ്ഥാനത്തിലാണ് കൊടുക്കുന്നത്.

ശമ്പളം ഒരു നിർണായക ഘടകമാണ് 

പ്രതിമാസം 1 ലക്ഷം സമ്പാദിക്കുന്ന ഒരു വ്യക്തിക്ക് എച്ച്.ഡി.എഫ്‌.സി ബാങ്ക് റിഗാലിയ ഗോൾഡ് ക്രെഡിറ്റ് കാർഡിന് അർഹതയുണ്ടായേക്കാം. മറുവശത്ത്, പ്രതിമാസം 25,000 സമ്പാദിക്കുന്ന ഒരു വ്യക്തിക്ക് എച്ച്.ഡി.എഫ്‌.സി ബാങ്ക് മണിബാക്ക് + ക്രെഡിറ്റ് കാർഡിന് അർഹത നേടാം. അതായത് ഒരു വ്യക്തിയുടെ ശമ്പളം ക്രെഡിറ്റ് കാർഡ് സ്വന്തമാക്കുന്നതിനുള്ള നിർണായക ഘടകമാണ്. ഒരു ക്രെഡിറ്റ് കാർഡിനായി അപേക്ഷിക്കുന്നതിന് നിങ്ങൾ ഒന്നുകിൽ ശമ്പളമുള്ള അല്ലെങ്കിൽ സ്വയം തൊഴിൽ ചെയ്യുന്ന വ്യക്തിയായിരിക്കണം.

എന്നാൽ നിങ്ങൾ സ്വയം തൊഴിൽ ചെയ്യുന്ന ആളാണെങ്കിൽ നിങ്ങളുടെ ഏറ്റവും പുതിയ ആദായ നികുതി റിട്ടേൺസ് പകർപ്പ് വരുമാന തെളിവായി സമർപ്പിക്കാൻ നിങ്ങളോട് ആവശ്യപ്പെട്ടേക്കാം. ഇത്തരം സൂപ്പർ പ്രീമിയം ക്രെഡിറ്റ് കാർഡുകൾ കൊണ്ട് ഡൈനിങ്ങിൽ ഡിസ്കൗണ്ടുകൾ, എയർപോർട്ടുകളിൽ സൗജന്യ ലോഞ്ച് ആക്സസ്, മറ്റു ഉയർന്ന റിവാർഡ് പോയിൻ്റുകൾ എന്നീ ആനുകൂല്യങ്ങൾ ലഭിക്കുന്നു. റിവാർഡ് പോയിൻ്റുകൾ ഉപയോഗിച്ച് ഫ്ലൈറ്റ് ടിക്കറ്റുകൾ ബുക്ക് ചെയ്യാനും സാധിക്കും.