മുതിര്‍ന്ന പൗരന്മാര്‍ക്കുളള പ്രത്യേക സ്ഥിര നിക്ഷേപ പദ്ധതി കാലാവധി എച്ച്ഡിഎഫ്‌സി ബാങ്ക് നീട്ടി

സ്വകാര്യ മേഖലാ ബാങ്കായ എച്ച്ഡിഎഫ്‌സി ബാങ്ക് മുതിര്‍ന്ന പൗരന്മാര്‍ക്കുള്ള പ്രത്യേക നിക്ഷേപ പദ്ധതിയുടെ കാലാവധി നീട്ടി. ഇത് മൂന്നാം തവണയാണ് ബാങ്ക് പദ്ധതിയുടെ സമയ പരിധി നീട്ടുന്നത്. സീനിയര്‍ സിറ്റിസണ്‍ കെയര്‍ ഫിക്‌സഡ് ഡെപ്പോസിറ്റ് സ്‌കീം എന്ന പേരിലാണ് മുതിര്‍ന്ന പൗരന്മാര്‍ക്കായുള്ള പ്രത്യേക സ്ഥിര നിക്ഷേപ പദ്ധതി ബാങ്ക് നടപ്പിലാക്കുന്നത്. ഈ പദ്ധതിയ്ക്ക് കീഴിലുള്ള മുതിര്‍ന്ന പൗരന്മാരുടെ സ്ഥിര നിക്ഷേപങ്ങള്‍ക്ക് ഉയര്‍ന്ന നിരക്കിലുള്ള പലിശയാണ് ബാങ്ക് വാഗ്ദാനം ചെയ്യുന്നു. 2020 മെയ് 18ന് കോവിഡ് വ്യാപനത്തിന്റെ നടുവിലാണ് ബാങ്ക് ഈ പദ്ധതി പ്രഖ്യാപിക്കുന്നത്.

75 ബേസിസ് പോയിന്റ് ഉയര്‍ന്ന പലിശ നിരക്കാണ് എച്ച്ഡിഎഫ്‌സി ബാങ്ക് ഇത്തരം നിക്ഷേപങ്ങള്‍ക്ക് ഈടാക്കുന്നത്. അതായത് സീനിയര്‍ സിറ്റിസണ്‍ കെയര്‍ എഫ്ഡി യില്‍ നിക്ഷേപിച്ചാല്‍ ആ വ്യക്തിയ്ക്ക് നിക്ഷേപത്തിന്മേല്‍ 6.25 ശതമാനം പലിശ നിരക്ക് ലഭിക്കും.

എച്ച്ഡിഎഫ്‌സി ബാങ്ക് സ്ഥിര നിക്ഷേപ പലിശ നിരക്കുകള്‍

7 മുതല്‍ 29 ദിവസം വരെയുള്ള സ്ഥിര നിക്ഷേപങ്ങള്‍ക്ക് എച്ച്ഡിഎഫ്‌സി ബാങ്ക് വാഗ്ദാനം ചെയ്യുന്നത് 2.50 ശതമാനം പലിശ നിരക്കാണ്. 30 മുതല്‍ 90 ദിവസം വരെയുള്ള സ്ഥിര നിക്ഷേപങ്ങള്‍ക്ക് 3 ശതമാനം പലിശ നിരക്ക് ലഭിക്കും. 91 ദിവസം ദിവസം മുതല്‍ 6 മാസം വരെയുള്ള നിക്ഷേപങ്ങള്‍ക്ക് 3.5 ശതമാനവും 6 മാസം മുതല്‍ ഒരു വര്‍ഷത്തിന് ഒരു ദിവസം കുറവ് വരെയുള്ള സമത്തെ സ്ഥിര നിക്ഷേപത്തിന് 4.4 ശതമാനവും പലിശ നിരക്ക് ലഭിക്കും. ഒരു വര്‍ഷത്തേക്കുള്ള സ്ഥിര നിക്ഷേപങ്ങള്‍ക്ക് 4.9 ശതമാനമാണ് ബാങ്ക് നല്‍കുന്ന പലിശ നിരക്ക്.

ഒരു വര്‍ഷം മുതല്‍ രണ്ട് വര്‍ഷം വരെയുള്ള ടേം ഡെപ്പോസിറ്റുകള്‍ക്ക് 4.9 ശതമാനം പലിശയാണ് എച്ച്ഡിഎഫ്‌സി ബാങ്ക് നല്‍കുന്നത്. 2 വര്‍ഷം മുതല്‍ 3 വര്‍ഷം വരെയുള്ള സ്ഥിര നിക്ഷേപങ്ങള്‍ക്ക് 5.15 ശതമാനവും, 3 വര്‍ഷം മുതല്‍ 5 വര്‍ഷം വരെയുള്ള നിക്ഷേപങ്ങള്‍ക്ക് 5.30 ശതമാനവുമാണ് പലിശ നിരക്ക്. 5 വര്‍ഷം മുതല്‍ 10 വര്‍ഷം വരെയുള്ള സ്ഥിര നിക്ഷേപങ്ങള്‍ക്ക് 5.50 ശതമാനം പലിശ ലഭിക്കും.

നേരത്തെ സ്റ്റേറ്റ് ബാങ്ക് ഓഫ് ഇന്ത്യയും മുതിര്‍ന്ന പൗരന്മാര്‍ക്കുള്ള പ്രതേക നിക്ഷേപ പദ്ധതിയുടെ കാലാവധി 2021 ജൂണ്‍ 30 വരെ നീട്ടിയിരുന്നു. ഒരു സാധാരണ വ്യക്തിയ്ക്ക് നിലവില്‍ 5.4 ശതമാനമാണ് എസ്ബിഐയില്‍ അഞ്ച് വര്‍ഷത്തെ സ്ഥിര നിക്ഷേപത്തിന്മേല്‍ ലഭിക്കുന്ന പലിശ നിരക്ക്. മുതിര്‍ന്ന പൗരന്മാര്‍ക്കായുള്ള പ്രത്യേക നിക്ഷേപ പദ്ധതിയില്‍ 6.20 ശതമാനം പലിശ ലഭിക്കും.