ലോഞ്ച് ആക്സസ് ഇനി അത്ര എളുപ്പമല്ല; എച്ച്ഡിഎഫ്സി ഈ ക്രെഡിറ്റ് കാർഡുകളുടെ പോളിസി പരിഷ്കരിക്കുന്നു

നിങ്ങളുടെ ക്രെഡിറ്റ് കാർഡ് ഏതാണ്? അറിഞ്ഞോ! എച്ച്ഡിഎഫ്സിയുടെ ടാറ്റ ന്യൂ ഇൻഫിനിറ്റി, ടാറ്റ ന്യൂ പ്ലസ് ക്രെഡിറ്റ് കാർഡ് ഉടമകൾക്ക് പുതിയ വാർത്ത. ക്രെഡിറ്റ് കാർഡ് ഉപയോ​ഗിക്കാത്തവരില്ല, എന്നാൽ എല്ലാ ക്രെഡിറ്റ് കാർഡ് ഉടമകളും ചില പ്രത്യേക ആനുകൂല്യങ്ങൾ ആ​ഗ്രഹിക്കുന്നു. പർച്ചേസിം​ഗ് ഓഫറുകളും, സിനിമാ ടിക്കറ്റ് ഓഫറുകളോ, ടൈനിം​ഗ് ഓഫറുകളോ ആ​ഗ്രഹിക്കുന്നവരാണ് എല്ലാവരും. അത്തരത്തിൽ എയർപോർട്ട് ലോഞ്ച് ആക്സസ് ആ​ഗ്രഹിക്കുന്ന നിരവധി ആളുകളുണ്ട്.

എച്ച്ഡിഎഫ്സിയുടെ ഈ രണ്ട് ക്രെഡിറ്റ് കാർഡും അതിൻ്റെ ലോഞ്ച് ആക്‌സസ് നയം 2025 ജൂൺ 10 മുതൽ പരിഷ്കരിക്കുന്നു. പുതിയ നിയമങ്ങൾ അനുസരിച്ച്, ലോഞ്ചുകളിൽ നേരിട്ട് ക്രെഡിറ്റ് കാർഡുകൾ സ്വൈപ്പ് ചെയ്‌ത് ഗാർഹിക ലോഞ്ച് ആക്‌സസ് ആക്‌സസ് ചെയ്യാൻ കഴിയില്ല. പകരം ഉപഭോക്താക്കൾക്ക് അവരുടെ ത്രൈമാസ ചെലവുകളെ അടിസ്ഥാനമാക്കി ലോഞ്ച് വൗച്ചറുകൾ നൽകപ്പെടും. ഉയർന്ന കാർഡ് ഉപയോഗം പ്രോത്സാഹിപ്പിക്കുന്നതിനൊപ്പം ആനുകൂല്യങ്ങൾ കാര്യക്ഷമമാക്കുക എന്നതാണ് ഈ മാറ്റത്തിലൂടെ എച്ച്ഡിഎഫ്സി ലക്ഷ്യമിടുന്നത്.

ലോഞ്ച് വൗച്ചറുകൾ എങ്ങനെ ഉറപ്പാക്കാം?

2025 ജൂൺ 10 മുതൽ പ്രാബല്യത്തിൽ വരുന്ന ആഭ്യന്തര ലോഞ്ച് ആക്‌സസിന്റെ ആനുകൂല്യം ഉപഭോക്താവിൻ്റെ ചിലവിനെ അടിസ്ഥാനമാക്കിയുള്ളതാണ്. ഒരു കലണ്ടർ പാദത്തിൽ കുറഞ്ഞത് 50,000 രൂപ ചെലവഴിച്ചാൽ ലോഞ്ച് വൗച്ചർ ലഭ്യമാകും. കൂടാതെ, ടാറ്റ ന്യൂ ഇൻഫിനിറ്റി എച്ച്‌ഡി‌എഫ്‌സി ബാങ്ക് ക്രെഡിറ്റ് കാർഡിനായി ഒരു കലണ്ടർ പാദത്തിൽ പരമാവധി രണ്ട് കോംപ്ലിമെന്ററി ഡൊമസ്റ്റിക് ലോഞ്ച് വൗച്ചറുകൾ (ഒരു കലണ്ടർ വർഷത്തിൽ എട്ട് വരെ) ആക്‌സസ് ചെയ്യാൻ കഴിയുമെന്ന് ബാങ്കിന്റെ വെബ്‌സൈറ്റ് പ്രകാരം പറയുന്നു.

ടാറ്റ ന്യൂ പ്ലസ് എച്ച്‌ഡി‌എഫ്‌സി ബാങ്ക് ക്രെഡിറ്റ് കാർഡ് ഉടമകൾക്കുള്ള ആഭ്യന്തര ലോഞ്ച് ആക്‌സസ് ആനുകൂല്യവും ചെലവുകളെ അടിസ്ഥാനമാക്കിയുള്ളതാണ്. ഈ മാറ്റങ്ങൾ 2025 ജൂൺ 10 മുതൽ പ്രാബല്യത്തിൽ വരും. ഈ കാർഡ് ഉടമകൾക്ക് ആ പാദത്തിനുള്ളിൽ 50,000 രൂപയോ അതിൽ കൂടുതലോ ചെലവഴിച്ചാൽ ഒരു കലണ്ടർ പാദത്തിൽ ഒരു കോംപ്ലിമെന്ററി ഡൊമസ്റ്റിക് ലോഞ്ച് വൗച്ചർ ഉറപ്പാക്കാം. ഒരു കലണ്ടർ വർഷത്തിൽ പരമാവധി നാല് വൗച്ചറുകൾ ഇത്തരത്തിൽ സ്വന്തമാക്കാൻ സാധിക്കുന്നു.

നിങ്ങൾക്ക് ഈ ലോഞ്ച് വൗച്ചർ സ്വന്തമാക്കാൻ യോ​ഗ്യതയുണ്ടോ?

നിങ്ങൾ ഈ ലോഞ്ച് വൗച്ചർ ലഭിക്കാൻ യോ​ഗ്യതയുണ്ടെങ്കിൽ, യോഗ്യതയെക്കുറിച്ച് നിങ്ങളെ അറിയിക്കുന്ന ഒരു SMS ഉം ഇമെയിലും നിങ്ങൾക്ക് ലഭിക്കും. നിങ്ങൾ ആനുകൂല്യത്തിന് യോഗ്യത നേടിയിട്ടുണ്ടെങ്കിൽ ആദ്യം SMS അല്ലെങ്കിൽ ഇമെയിലിൽ പരിശോധിക്കുക. നിങ്ങളുടെ ബാങ്കിൽ രജിസ്റ്റർ ചെയ്ത മൊബൈൽ നമ്പർ ഉപയോഗിച്ച് ലോഗിൻ ചെയ്യുക. യോഗ്യത നേടിയതിന് ശേഷം 120 ദിവസത്തിനുള്ളിൽ നിങ്ങളുടെ ലോഞ്ച് വൗച്ചർ ക്ലെയിം ചെയ്യാവുന്നതാണ്. വൗച്ചർ ക്ലെയിം ചെയ്താൽ 180 ദിവസത്തിനുള്ളിൽ ലിസ്റ്റിലുള്ള വൗച്ചർ നിങ്ങൾക്ക് ഉപയോഗിക്കാം.

ചെലവുകളും യോഗ്യതയും എങ്ങനെ പരിശോധിക്കാം?

2025 ജൂൺ 10 മുതലാണ് ഈ മാറ്റങ്ങൾ വരുന്നത്. നിങ്ങൾ എത്ര തുക ചെലവഴിച്ചുവെന്നും നിലവിലെ പാദത്തിൽ ലോഞ്ച് ആക്‌സസ് ആനുകൂല്യങ്ങൾക്ക് നിങ്ങൾ യോഗ്യനാണോ എന്നും പരിശോധിക്കണമെങ്കിൽ ഈ ഘട്ടങ്ങൾ തിരിച്ചറിയുക.

• എച്ച്ഡിഎഫ്സി ബാങ്കിൻ്റെ നെറ്റ്ബാങ്കിംഗിലോ മൊബൈൽബാങ്കിംഗ് ആപ്പിലോ ആദ്യം നിങ്ങൾ ലോഗിൻ ചെയ്യുക.

• ലോ​ഗിൻ ചെയ്ത ശേഷം ക്രെഡിറ്റ് കാർഡ് വിഭാഗത്തിലേക്ക് പോകുക.

• നിങ്ങളുടെ ടാറ്റ ന്യൂ എച്ച്ഡിഎഫ്‌സി ബാങ്ക് ക്രെഡിറ്റ് കാർഡ് തിരഞ്ഞെടുക്കുക.

• ക്രെഡിറ്റ് കാർഡ് തിരഞ്ഞെടുത്ത ശേഷം റിഡീം റിവാർഡ് പോയിന്റുകളിൽ ക്ലിക്കുചെയ്യുക (ഇതി നിങ്ങളെ റിവാർഡ് പോർട്ടലിലേക്ക് എത്തിക്കുന്നു).

• റിവാർഡ് പോർട്ടൽ സന്ദർശിച്ച ശേഷം നിങ്ങളുടെ ചെലവും യോഗ്യതയും കാണുന്നതിന് MyReward Spend Promo Details എന്ന ഓപ്ഷനിൽ ക്ലിക്ക് ചെയ്ത് വിശദ വിവരങ്ങൾ പരിശോധിക്കുക.

നിങ്ങളുടെ കാർഡ് അപ്‌ഗ്രേഡ് ചെയ്യുകയോ നഷ്ടപ്പെടുകയോ വീണ്ടും ഇഷ്യൂ ചെയ്യുകയോ ചെയ്‌താൽ, പുതിയ കാർഡിനുള്ള ചെലവ് മാത്രമേ പരിഗണിക്കൂ. മുൻ കാർഡ് വഴി നടത്തിയ ചെലവുകൾ യോഗ്യതയ്ക്കായി പരിഗണിക്കില്ല എന്നത് പ്ത്യേകം ഓർമിക്കുക.

നിലവിലുള്ള ലോഞ്ച് ആനുകൂല്യങ്ങൾ എത്ര കാലം വരെ ലഭിക്കും?

ടാറ്റ ന്യൂ ഇൻഫിനിറ്റി എച്ച്ഡിഎഫ്‌സി ബാങ്ക് ക്രെഡിറ്റ് കാർഡ് ഉടമകൾക്ക് പ്രതിവർഷം 8 സൗജന്യ ആഭ്യന്തര ലോഞ്ച് ആക്‌സസുകൾ ആസ്വദിക്കാം. ഒരു പാദത്തിൽ രണ്ട് എന്ന കണക്കിലാണ് ഈ ആനുകൂല്യം ഉറപ്പാക്കുന്നത്. ഓരോ ലോഞ്ച് പ്രവേശനത്തിനും 2 രൂപ (വിസ അല്ലെങ്കിൽ റുപേ കാർഡുകൾക്ക്) ഫീസ് ഈടാക്കും.

ടാറ്റ ന്യൂ പ്ലസ് എച്ച്ഡിഎഫ്സി ബാങ്ക് ക്രെഡിറ്റ് കാർഡുകൾ ഉള്ളവർക്ക് ഒരു കലണ്ടർ വർഷത്തിൽ 4 സൗജന്യ ആഭ്യന്തര ലോഞ്ച് ആക്‌സസുകൾ ഉറപ്പാക്കാം. അതായത് പാദത്തിൽ ഒന്ന് എന്ന കണക്കിലാണ് ഈ നേട്ടം. ലോഞ്ച് ആക്‌സസിനായി ക്രെഡിറ്റ് കാർഡ് ഉടമയിൽ നിന്ന് 2 രൂപ (വിസ / റുപേ) ഈടാക്കും.

2025 ജൂൺ 9 വരെ ഈ ആനുകൂല്യങ്ങൾ ക്രെഡിറ്റ് കാർഡ് ഉടമകൾക്ക് ഉറപ്പാക്കാം.

അന്താരാഷ്ട്ര ലോഞ്ച് ആക്‌സസ് - വിസ കാർഡ്

2025 ജൂൺ 1 മുതൽ, അന്താരാഷ്ട്ര ലോഞ്ച് ആക്‌സസിനുള്ള പ്രയോറിറ്റി പാസ് റിക്വസ്റ്റ് പ്രകാരം മാത്രമേ നൽകൂ ആനുകൂല്യം ലഭ്യമാകുകയുള്ളൂ. നിങ്ങൾക്ക് പുതിയതോ പുതുക്കിയതോ അല്ലെങ്കിൽ പകരം നൽകിയതോ ആയ ടാറ്റ ന്യൂ ഇൻഫിനിറ്റി വിസ കാർഡ് ലഭിച്ചിട്ടുണ്ടെങ്കിൽ, പ്രയോറിറ്റി പാസിനായി നിങ്ങൾ പ്രത്യേകം അപേക്ഷിക്കേണ്ടി വരും.

പ്രയോറിറ്റി പാസിലൂടെ, നിങ്ങൾക്കും കാർഡിൽ ആഡ്-ഓൺ ചെയ്ത അംഗത്തിനും പ്രതിവർഷം നാല് സൗജന്യ അന്താരാഷ്ട്ര ലോഞ്ച് വിസിറ്റ് (ഒരു പാദത്തിൽ ഒന്ന് എന്ന കണക്കിൽ) ലഭിക്കും. ഈ പരിധിക്ക് പുറമേയുള്ള ഏതൊരു സന്ദർശനത്തിനും ഒരാൾക്ക് യുഎസ് ഡോളർ 27 + ജിഎസ്ടി ഫീസ് ഈടാക്കും. പ്രയോറിറ്റി പാസ് ഉപയോഗിക്കുന്ന എല്ലാ അതിഥികളുടെയും സന്ദർശനത്തിന് ഓരോ അതിഥിക്കും യുഎസ് ഡോളർ 27 + ജിഎസ്ടി ഈടാക്കും. ഇത് ജൂൺ 1 മുതൽ പ്രാബല്യത്തിൽ വരുന്നു.

അന്താരാഷ്ട്ര ലോഞ്ച് ആക്‌സസ് - റുപേ

റുപേ കാർഡ് ഉടമകൾക്ക് പ്രതിവർഷം നാല് സൗജന്യ അന്താരാഷ്ട്ര ലോഞ്ച് ആക്‌സസുകൾ ഉറപ്പാക്കാം. അതായത് ഒരു പാദത്തിൽ ഒന്ന് എന്ന അടിസ്ഥാനത്തിലാണ് ലഭിക്കുന്നത്. എന്നാൽ ശ്രദ്ധിക്കേണ്ട കാര്യമെന്തെന്നാൽ യുഎസ് ഡോളർ 3.25 എന്ന നിരക്കിൽ ഇടപാട് ഫീസ് ഈടാക്കും, എന്നാൽ അത് പിന്നീട് റിവേഴ്സ് ചെയ്യും. ലോഞ്ചിൽ കൂടുതൽ സന്ദർശനങ്ങൾ അനുവദിക്കുകയും അതിനെല്ലാം വിവിധ നിരക്കുകൾ ഈടാക്കുകയും ചെയ്‌തേക്കാം.

ഇതെല്ലാമാണ് എച്ച്ഡിഎഫ്സിയുടെ ടാറ്റ ന്യൂ ഇൻഫിനിറ്റി, ടാറ്റ ന്യൂ പ്ലസ് എന്നീ ക്രെഡിറ്റ് കാർഡുകളിൽ സംഭവിക്കാനിരിക്കുന്ന പ്രധാന മാറ്റങ്ങൾ.