ആരോഗ്യ ഇൻഷുറൻസ് പ്രീമിയത്തിൽ 1 ലക്ഷം വരെ നികുതി ആനുകൂല്യങ്ങൾ ഉറപ്പാക്കാം: ഇതുപോലെ ക്ലെയിം ചെയ്യാം

ഇന്നത്തെ കാലത്ത് ആശുപത്രി ചെലവുകൾ വർദ്ധിച്ചു വരുന്നതിനാൽ ആരോ​ഗ്യ ഇൻഷുറൻസ് അത്യന്താപേക്ഷിതമായി മാറുന്നു. എന്നാൽ സാധാരണക്കാരെ ആശങ്കപ്പെടുത്തുന്നത് അമിതമായ പ്രീമിയം തുകയാണ്. പല ഇൻഷുറൻസ് കമ്പനികളും വമ്പൻ പ്രീമിയം തുക ആവശ്യപ്പെടുന്നു. എന്നാൽ ഇത് കുറക്കാൻ സാധിക്കുമോ? ആദായനികുതി നിയമത്തിലെ സെക്ഷൻ 80D അനുസരിച്ച് നിങ്ങളുടെ ആരോഗ്യ ഇൻഷുറൻസ് പോളിസിയിൽ അടച്ച പ്രീമിയങ്ങൾ കുറയ്ക്കാൻ സാധിക്കും.

ഐആർഡിഎഐ അംഗീകരിച്ച ഏതെങ്കിലും ഇൻഷുറൻസ് കമ്പനിയിൽ നിന്ന് എടുത്ത മെഡിക്ലെയിം, ഫാമിലി ഫ്ലോട്ടർ, ക്രിട്ടിക്കൽ ഇൽനെസ് അല്ലെങ്കിൽ ടോപ്പ്-അപ്പ് പോളിസികൾ എന്നിവയ്‌ക്കും ഈ ആനുകൂല്യം ബാധകമാണ്. ഈ കിഴിവ് ക്ലെയിം ചെയ്യുന്നതിന് യുപിഐ, കാർഡ്, ചെക്ക് അല്ലെങ്കിൽ നെറ്റ് ബാങ്കിംഗ് പോലുള്ള നോൺ-ക്യാഷ് മോഡിൽ പ്രീമിയം അടയ്ക്കേണം.

കിഴിവ് നേടാനുള്ള രേഖകൾ

നിങ്ങൾ പ്രതിമാസ ശമ്പളം വാങ്ങുന്ന വ്യക്തിയാണെങ്കിൽ പ്രീമിയം പേയ്‌മെന്റിന്റെ തെളിവും പോളിസി രേഖയും തൊഴിലുടമയ്ക്ക് സമർപ്പിക്കുക. അങ്ങനെ ഈ ആനുകൂല്യം ഫോം 16-ൽ ഉൾപ്പെടുത്തും. അല്ലെങ്കിൽ, ഐടിആർ സമർപ്പിക്കുമ്പോൾ നേരിട്ട് കിഴിവ് ക്ലെയിം ചെയ്യാം. അടച്ച പ്രീമിയം, പണമടയ്ക്കുന്നയാളുടെ പേര്, പോളിസി കാലാവധി എന്നിവ കാണിക്കുന്ന രസീത് ഇൻഷുററിൽ നിന്ന് ഉറപ്പാക്കണം. സൂക്ഷ്മപരിശോധന സമയത്ത് നികുതി ക്ലെയിം സുഗമമാക്കാൻ ഇത് സഹായിക്കും.

ലഭിക്കുന്ന കിഴിവ് പരിധികൾ

കിഴിവിൻ്റെ പരിധി ഓരോരുത്തർക്കും വ്യത്യാസമായിരിക്കും. അതായത് നിങ്ങൾക്കും പങ്കാളിക്കും കുട്ടികൾക്കും വേണ്ടി നിങ്ങൾ അടയ്ക്കുന്ന മെഡിക്കൽ ഇൻഷുറൻസ് പ്രീമിയത്തിന്, നിങ്ങൾക്ക് പ്രതിവർഷം 25,000 രൂപ ക്ലെയിം ചെയ്യാം. നിങ്ങളുടെ മാതാപിതാക്കളുടെ ആരോഗ്യ പദ്ധതിയും നിങ്ങൾ അടയ്ക്കുന്നുണ്ടെങ്കിൽ, നിങ്ങൾക്ക് 25,000 രൂപ അധികമായി ക്ലെയിം ചെയ്യാം, അല്ലെങ്കിൽ അവർ 60 വയസ്സ് പൂർത്തിയായ മുതിർന്ന പൗരന്മാരാണെങ്കിൽ 50,000 രൂപ ക്ലെയിം ചെയ്യാം. നിങ്ങളും നിങ്ങളുടെ മാതാപിതാക്കളും മുതിർന്ന പൗരന്മാരാണെങ്കിൽ സെക്ഷൻ 80D പ്രകാരമുള്ള 1 ലക്ഷം രൂപയായിരിക്കും ആകെ കിഴിവ്.

പ്രിവൻ്റീവ് ഹെൽത്ത് പരിശോധനകൾ

നിങ്ങൾക്ക് പ്രതിവർഷം 5,000 രൂപ വരെ പരിശോധനകൾക്കായി ക്ലെയിം ചെയ്യാം. ഇത് 80D പരിധിയുടെ ഒരു ഭാഗമാണ്. നിങ്ങളുടെ പ്രീമിയം 22,000 രൂപയാണെന്നും ഒരു പരിശോധനയ്ക്കായി നിങ്ങൾ 3,000 രൂപ ചെലവഴിച്ചുവെന്നും കരുതുക. നിങ്ങളുടെ ആകെ കിഴിവ് ഇപ്പോഴും വർഷത്തിൽ 25,000 രൂപയായി തുടരും.

ഒന്നിലധികം പോളിസികൾ ഉണ്ടെങ്കിലും ക്ലെയിം ചെയ്യാം

ഒന്നിലധികം പോളിസികൾ അടക്കുന്നുണ്ടെങ്കിലും നിങ്ങൾക്ക് സെക്ഷൻ 80D പ്രകാരമുള്ള കിഴിവുകൾ ക്ലെയിം​ ചെയ്യാൻ സാധിക്കും. അതായത് ഒന്ന് തനിക്കും കുടുംബത്തിനും, മറ്റൊന്ന് മുതിർന്ന പൗരന്മാരായ മാതാപിതാക്കൾക്കുമുള്ള പോളിസിയാണെങ്കിൽ ഓരോ പോളിസിക്കും ക്ലെയിം ചെയ്യാൻ സാധിക്കും.

ആരോ​ഗ്യ ഇൻഷുറൻസ് ഉണ്ടെങ്കിൽ ആശുപത്രി വാസങ്ങളും ചികിത്സകളും ഭാരമേറിയതായി തോന്നില്ല. മാത്രമല്ല വലിയൊരു തുക നിങ്ങൾക്ക് നഷ്ടമാവാതെ സേവ് ചെയ്യാനും സാധിക്കുന്നു.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.