വെറും 899 രൂപയ്ക്ക് 15 ലക്ഷത്തിന്റെ കവറേജ്; സർക്കാർ ഉറപ്പിലൊരു ആരോഗ്യ ഇൻഷുറൻസ്

ചികിത്സാ ചിലവുകൾ കുതിച്ചുയരുന്ന ഈ കാലഘട്ടത്തിൽ സാധാരണക്കാർക്ക് വലിയൊരു ആശ്വാസവാർത്തയുമായി എത്തിയിരിക്കുകയാണ് ഇന്ത്യ പോസ്റ്റ് പേയ്മെന്റ്സ് ബാങ്ക്. വെറും 899 രൂപ പ്രീമിയത്തിൽ 15 ലക്ഷം രൂപ വരെ കവറേജ് ലഭിക്കുന്ന ആകർഷകമായ ഹെൽത്ത് ഇൻഷുറൻസ് പ്ലാനാണ് തപാൽ വകുപ്പിന്റെ ബാങ്കിംഗ് പങ്കാളിയായ ഐപിപിബി അവതരിപ്പിച്ചിരിക്കുന്നത്.

സാധാരണഗതിയിൽ 18 വയസ്സിന് മുകളിലുള്ള ഒരാൾക്ക് ഇൻഷുറൻസ് എടുക്കണമെങ്കിൽ കുറഞ്ഞത് 5,000 രൂപയെങ്കിലും പ്രീമിയം നൽകേണ്ടി വരാറുണ്ട്. എന്നാൽ നിവ ബൂപ ഇൻഷുറൻസുമായി ചേർന്നുള്ള ഈ പ്ലാനിൽ വളരെ കുറഞ്ഞ നിരക്കിൽ സുരക്ഷ ഉറപ്പാക്കാം. പോളിസി ഉടമയ്ക്ക് കുടുംബത്തിനായി പോളിസി വാങ്ങുകയാണെങ്കിൽ കൂടുതൽ കിഴിവുകൾ ലഭിക്കും. രണ്ട് മുതിർന്നവർക്ക് 1399 രൂപയും, രണ്ട് മുതിർന്നവർക്കും അവരുടെ കുട്ടിക്കും 1799 രൂപയും, രണ്ട് മുതിർന്നവർക്കും അവരുടെ രണ്ട് കുട്ടികൾക്കും 2199 രൂപയും ആയിരിക്കും. ഈ പദ്ധതി പ്രകാരം, പോളിസി ഉടമയ്ക്ക് 15 ലക്ഷം രൂപ വരെ ആരോഗ്യ ഇൻഷുറൻസ് പരിരക്ഷ ആസ്വദിക്കാൻ കഴിയും.

ഇന്ത്യ പോസ്റ്റ് പേയ്മെന്റ്സ് ബാങ്കിൽ അക്കൗണ്ട് ഉള്ളവർക്ക് മാത്രമേ ഈ പോളിസി എടുക്കാൻ സാധിക്കൂ. നിലവിൽ അക്കൗണ്ട് ഇല്ലാത്തവർക്ക് 200 രൂപ നൽകി ഉടനടി അക്കൗണ്ട് ആരംഭിക്കാവുന്നതാണ്. 18 വയസ്സ് മുതൽ 60 വയസ്സ് വരെയുള്ളവർക്ക് പോളിസിയിൽ അംഗമാകാം. 91 ദിവസം പ്രായമായ കുട്ടികളെയും പോളിസിയിൽ ഉൾപ്പെടുത്താം. ആശുപത്രി വാസത്തിന്റെ ആദ്യഘട്ടത്തിൽ 2 ലക്ഷം രൂപ വരെയുള്ള ക്ലെയിമുകൾക്ക് ചില നിബന്ധനകൾ ഉണ്ടെങ്കിലും, അംഗീകൃത ആശുപത്രികളിൽ 5 ലക്ഷം രൂപ വരെ ക്യാഷ്‌ലെസ് സൗകര്യം ലഭ്യമാണ്. പോളിസി എടുത്ത് 30 ദിവസത്തിന് ശേഷം മിക്ക രോഗങ്ങൾക്കും പരിരക്ഷ ലഭിക്കും. എന്നാൽ ചില പ്രത്യേക രോഗങ്ങൾക്ക് ആദ്യ രണ്ട് വർഷം കവറേജ് ലഭിക്കില്ല.

എങ്ങനെ അപേക്ഷിക്കാം?

നിങ്ങളുടെ അടുത്തുള്ള പോസ്റ്റ് ഓഫീസിലോ അല്ലെങ്കിൽ പ്രദേശത്തെ പോസ്റ്റ്മാൻ വഴിയോ ഈ ഇൻഷുറൻസ് പോളിസി എടുക്കാവുന്നതാണ്. നിലവിൽ മറ്റ് ഇൻഷുറൻസ് പോളിസികൾ ഉള്ളവർക്കും ഈ പ്ലാൻ ഒരു 'ടോപ്പ്-അപ്പ്' ആയി ഉപയോഗിക്കാൻ സാധിക്കുമെന്നത് ഇതിന്റെ മറ്റൊരു സവിശേഷതയാണ്.