പ്രതിമാസം 5000 രൂപ നേടാനൊരു കിടിലൻ പോസ്റ്റ് ഓഫീസ് പദ്ധതി; വിശദമായി അറിയാം

കുട്ടികൾക്കും ചെറുപ്പക്കാർക്കും പ്രായമായവർക്കും തുടങ്ങി എല്ലാ പ്രായക്കാർക്കും വേണ്ടി നിരവധി തരത്തിലുള്ള സമ്പാദ്യ പദ്ധതികൾ പോസ്റ്റ്‌ ഓഫീസ് നടത്തുന്നുണ്ട്. സുരക്ഷിത നിക്ഷേപത്തിന്റെയും മികച്ച വരുമാനത്തിന്റെയും കാര്യത്തിൽ ഈ പദ്ധതികൾ വളരെ ജനപ്രിയമാണ്. സ്ഥിരമായ വരുമാനത്തിന് വേണ്ടിയുള്ള നിക്ഷേപമാണെങ്കിൽ പോസ്റ്റ്‌ ഓഫീസിന്റെ മന്ത്ലി ഇൻകം സ്കീം (എം.ഐ.എസ്) തിരഞ്ഞെടുക്കുന്നതായിരിക്കും ഏറ്റവും ഉചിതം. ഈ പദ്ധതിയിൽ ഒറ്റത്തവണ നിക്ഷേപിച്ചാൽ, അടുത്ത മാസം മുതൽ തന്നെ നിങ്ങൾക്ക് പലിശ ലഭിച്ചു തുടങ്ങും.

പോസ്റ്റ്‌ ഓഫീസിന്റെ വെബ്സൈറ്റിൽ പറയുന്നതനുസരിച്ച്, ഈ പദ്ധതിയിലെ നിക്ഷേപത്തിന് 7.4 ശതമാനം പലിശ നിരക്ക് സർക്കാർ വാഗ്ദാനം ചെയ്യുന്നുണ്ട്. എം.ഐ.എസിൽ അക്കൗണ്ട് തുറന്ന് ഒരു മാസത്തിന് ശേഷം മാത്രമേ നിങ്ങൾക്ക് പലിശയുടെ ആനുകൂല്യം ലഭിക്കാൻ തുടങ്ങുകയുള്ളൂ. അതായത്, നിക്ഷേപത്തിന്റെ അടുത്ത മാസം മുതൽ ഈ സർക്കാർ പദ്ധതി സ്ഥിരമായ വരുമാനം ഉറപ്പുനൽകുന്നു. വ്യക്തമായി പറഞ്ഞാൽ, നിങ്ങളുടെ നിക്ഷേപ തുകയ്ക്കുള്ള പലിശ പ്രതിമാസമായി നിങ്ങൾക്ക് ലഭിക്കും.

വെറും 1000 രൂപ നിക്ഷേപിക്കുന്നതിലൂടെ, പോസ്റ്റ്‌ ഓഫീസ് എം.ഐ.എസിൽ നിങ്ങൾക്ക് അക്കൗണ്ട് തുറക്കാൻ സാധിക്കും. സിംഗിളായും ജോയിന്റായും ഈ പദ്ധതിയിൽ അക്കൗണ്ട് തുറക്കാൻ സാധിക്കും. സിംഗിൾ അക്കൗണ്ടിലെ പരമാവധി നിക്ഷേപം 9 ലക്ഷം രൂപയും ജോയിന്റ് അക്കൗണ്ടിലെ പരമാവധി നിക്ഷേപം 15 ലക്ഷം രൂപയുമാണ്. എം.ഐ.എസിൽ നിക്ഷേപിക്കുന്നതിന്, പോസ്റ്റ്‌ ഓഫീസിൽ ഒരു സേവിംഗ്സ് അക്കൗണ്ട് ഉണ്ടായിരിക്കേണ്ടത് അത്യാവശ്യമാണ്. 18 വയസോ അതിൽ കൂടുതലോ പ്രായമുള്ള ഏതൊരു വ്യക്തിക്കും ഈ പദ്ധതിയിൽ നിക്ഷേപിക്കാൻ സാധിക്കും.

5 വർഷത്തേക്ക് പ്രതിമാസം 5,000 രൂപ നിക്ഷേപിച്ചാൽ 3,56,830 രൂപ റിട്ടേൺ; വിശദമായി അറിയാം

നിങ്ങൾ പോസ്റ്റ്‌ ഓഫീസ് എം.ഐ.എസിൽ 5 ലക്ഷം രൂപ നിക്ഷേപിച്ചാൽ, 7.4 ശതമാനം നിരക്കിൽ എല്ലാമാസവും 3083 രൂപ പലിശയായി നിങ്ങൾക്ക് ലഭിക്കും. പരമാവധി 9 ലക്ഷം രൂപ നിക്ഷേപിക്കുമ്പോൾ, പ്രതിമാസമുള്ള പലിശ നിരക്ക് 5550 രൂപയായിരിക്കും. ഈ പദ്ധതിയുടെ ലോക്ക് ഇൻ കാലയളവ് അഞ്ച് വർഷമാണ്. ഇനി നിങ്ങൾ ജോയിന്റ് അക്കൗണ്ടാണ് തുറക്കുന്നതെങ്കിൽ, 15 ലക്ഷം രൂപ ഒറ്റത്തവണ നിക്ഷേപിക്കുമ്പോൾ, 7.4 ശതമാനം നിരക്കിൽ പ്രതിമാസം നിങ്ങൾക്ക് 9250 രൂപ പലിശയായി ലഭിക്കും.