ഒരു ആധാര്‍ കാര്‍ഡ് ഉപയോഗിച്ച് എത്ര സിം കാര്‍ഡുകള്‍ വാങ്ങിക്കാം?

2018-ലാണ് ഒരു ഉപയോക്താവിന്റെ പേരിലുള്ള കണക്ഷനുകളുടെ എണ്ണം 18 ആക്കി ഉയര്‍ത്തിക്കൊണ്ട് ടെലികമ്യൂണിക്കേഷന്‍ ഡിപ്പാര്‍ട്ട്‌മെന്റ് ഉത്തരവ് പുറപ്പെടുവിച്ചത്. എം ടു എം കമ്യൂണിക്കേഷനുകള്‍ക്ക് ഉപയോഗിക്കേണ്ടുന്ന സിം കാര്‍ഡുകള്‍ വലിയ അളവില്‍ ആവശ്യമായതിനാലാണ് ഈ വര്‍ധനവ് വരുത്തിയത്. ഇപ്പോള്‍ 18 സിമ്മുകളാണ് സാധാരണ മൊബൈല്‍ ഫോണ്‍ കമ്യൂണിക്കേഷനുകള്‍ക്കും സ്ലോട്ട് ഉള്ള ഡിവൈസുകളിലും ഉപയോഗിക്കുവാന്‍ സാധിക്കുക.

ബാക്കിയുള്ള 9 സിമ്മുകള്‍ എംടുഎം കമ്യൂണിക്കേഷനുകള്‍ക്കായി (മെഷീന്‍ ടു മെഷീന്‍ കമ്യൂണിക്കേഷനുകള്‍) വാങ്ങിക്കാം. ഇ സിം സര്‍വീസ് മാത്രമുള്ള ആപ്പിള്‍ വാച്ച് സീരീസ് 3 റിലയന്‍സ് ജിയോയും ഭാരതി എയര്‍ടെലും വില്‍പ്പന നടത്തുവാന്‍ ആരംഭിച്ചതിന് ശേഷമാണ് ടെലികോം മന്ത്രാലയത്തിന്റെ പുതുക്കിയ മാര്‍ഗ നിര്‍ദേശങ്ങള്‍ പുറത്തിറക്കിയിരിക്കുന്നത്.

പുതിയ മാര്‍ഗ നിര്‍ദേശങ്ങള്‍ പ്രകാരം എംടുഎം പ്രീ ഇന്‍സ്റ്റാള്‍ ചെയ്യേണ്ടതുണ്ടെങ്കില്‍ സബ്‌സ്‌ക്രൈബര്‍ വെരിഫിക്കേഷന്‍ ഡിവൈസ് നിര്‍മാതാവിന്റെ ഉത്തരവാദിത്വമാണ്. മറ്റൊരു വ്യക്തിയ്ക്ക് ഡിവൈസ് കൈമാറുകയാണെങ്കില്‍ അപ്പോള്‍ ഉപയോക്താവിന്റെ വിവരങ്ങള്‍ പുതുക്കേണ്ടുന്ന ചുമതല കൈമാറ്റം നടത്തുന്ന വ്യക്തിയ്ക്കാണ്.

2019ല്‍ തട്ടിപ്പുകള്‍ കൈകാര്യം ചെയ്യുന്നതിനും ഉപഭോക്തൃ സംരക്ഷണത്തിനുമായി ടെലികോം വകുപ്പ് ടെലികോം അനലറ്റിക്‌സ് വികസിപ്പിച്ചിരുന്നു. ഉപയോക്താവിന് അയാളുടെ പേരിലുള്ള കണക്ഷനുകള്‍ ഏതൊക്കെയെന്ന് അറിയുവാന്‍ ഇതിലൂടെ സാധിക്കും. താന്‍ ഉപയോഗിക്കാത്ത കണക്ഷന്‍ സ്വന്തം പേരില്‍ ഉണ്ടെങ്കില്‍ അതിനെതിരെ നടപടിയുമെടുക്കാം.

സ്വന്തം പേരില്‍ 9 ല്‍ അധികം കണക്ഷനുകളുള്ള ഉപയോക്താക്കളെ പ്രസ്തുത വിവരം എസ്എംഎസ് സന്ദേശത്തിലൂടെ അറിയിക്കും. https://tafcop.dgtelecom.gov.in/ എന്ന വെബ്‌സൈറ്റില്‍ നിന്നും വ്യക്തികളുടെ പേരിലുള്ള കണക്ഷനുകള്‍ അറിയാം. ഇതില്‍ നിങ്ങളുടെ മൊബൈല്‍ നമ്പര്‍ നല്‍കി ശേഷം ലഭിക്കുന്ന ഒടിപി നമ്പര്‍ കൂടി നല്‍കിയാല്‍

നിങ്ങളുടെ ആധാര്‍ ഉപയോഗിച്ച് എടുത്തിരിക്കുന്ന കണക്ഷനുകളുടെ വിവരങ്ങള്‍ കാണുവാന്‍ സാധിക്കും.