നിങ്ങളുടെ സ്വർണം സുരക്ഷിതമാണോ? വീട്ടിൽ എത്ര സ്വർണം വരെ സൂക്ഷിക്കാം? നികുതി നിയമങ്ങൾ അറിയാം

ഇന്ത്യയിൽ സ്വർണവില ഓരോ ദിവസവും കുതിച്ചുയരുന്നു. ഇപ്പോൾ ഉത്സവ സീസണും എത്തിയതോടെ സ്വർണത്തിൻ്റെ ഡിമാൻഡ് വർദ്ധിക്കുകയാണ്. സ്വർണം സമ്പത്തിന്റെയും ഐശ്വര്യത്തിന്റെയും പ്രതീകമായതിനാൽ, വിവാഹങ്ങൾക്കും ആഘോഷങ്ങൾക്കുമെല്ലാം സ്വർണം വാങ്ങുന്നത് നമ്മുടെ സംസ്കാരത്തിന്റെ ഭാഗമാണ്. എന്നാൽ ഒരു വ്യക്തി വീട്ടിൽ എത്ര സ്വർണം സൂക്ഷിക്കണം? ഇതിന് എന്തെങ്കിലും നിയമപരമായ പരിധിയുണ്ടോ? അമിതമായി സ്വർണം സൂക്ഷിച്ചാൽ നികുതി നൽകേണ്ടി വരുമോ?

സത്യത്തിൽ ഒരാൾക്ക് കൈവശം വെക്കാവുന്ന സ്വർണത്തിന്റെ അളവിനെക്കുറിച്ച് ഒരു നിയമത്തിലും കൃത്യമായ പരിധി നിശ്ചയിച്ചിട്ടില്ല. എങ്കിലും, നിയമപരമായി പ്രധാനമായ ഒരു വ്യവസ്ഥയുണ്ട്. അതായത് നിങ്ങളുടെ കൈവശമുള്ള സ്വർണത്തിന്റെ ഉറവിടം വ്യക്തമാക്കണം. നിങ്ങളുടെ കൈവശമുള്ള സ്വർണം ആദായനികുതി വകുപ്പ് പരിശോധിക്കുകയാണെങ്കിൽ, ആ സ്വർണം വാങ്ങിയതിന്റെ നിയമപരമായ വരുമാന രേഖകൾ നിങ്ങൾ ഹാജരാക്കേണ്ടി വരും.

നിയമപരമായി വീട്ടിൽ സൂക്ഷിക്കാവുന്ന സ്വർണത്തിൻ്റെ പരിധി

• വിവാഹിതരും അവിവാഹിതരുമായ പുരുഷന്മാർക്ക് 100 ഗ്രാം വരെ സ്വർണം കൈവശം വെക്കാം.
• അവിവാഹിതരായ സ്ത്രീകൾക്ക് 250 ഗ്രാം വരെ സ്വർണം കൈവശം വെക്കാം.
• വിവാഹിതരായ സ്ത്രീകൾക്ക് 500 ഗ്രാം വരെ സ്വർണം സൂക്ഷിക്കാം.

അനധികൃതമായ എന്തെങ്കിലും കാരണത്താൽ വീട്ടിൽ റെയ്ഡ് നടത്തുമ്പോൾ നികുതി ഉദ്യോഗസ്ഥർക്ക് നിയമാനുസൃതവും നിയമവിരുദ്ധവുമായ രീതിയിൽ എത്രത്തോളം സ്വർണം സൂക്ഷിക്കുന്നുണ്ടെന്ന് വേർതിരിച്ചറിയാൻ ഈ പരിധികൾ സഹായിക്കുന്നു. കുടുംബത്തിൽ നിന്ന് പാരമ്പര്യമായി ലഭിച്ചതും മുകളിൽ വ്യക്തമാക്കിയതുമായ രീതിയിൽ കൈവശം വെച്ചിരിക്കുന്ന സ്വർണത്തിന് നികുതി ചുമത്തേണ്ടതില്ലെന്ന് സെൻട്രൽ ബോർഡ് ഓഫ് ഡയറക്ട് ടാക്സസ് വ്യക്തമാക്കുന്നുണ്ട്.

പരിധിക്കു മുകളിൽ വീട്ടിൽ സ്വർണം സൂക്ഷിച്ചാൽ പിഴ അടക്കണോ?

വീട്ടിൽ സൂക്ഷിക്കുന്ന സ്വർണം മുകളിൽ പറഞ്ഞ പരിധിക്കു മുകളിലാണെങ്കിലും, വ്യക്തമല്ലാത്ത വരുമാന സ്രോതസ്സ് ഇല്ലെങ്കിലും പിഴ ചുമത്താൻ അധികാരികൾക്ക് സാധിക്കും.

വിൽപ്പന സമയത്തെ നികുതി

നിങ്ങൾ വാങ്ങിയ സ്വർണം മൂന്ന് വർഷത്തിനുള്ളിൽ വിൽക്കുകയാണെങ്കിൽ അതിന് ഹ്രസ്വകാല മൂലധന നേട്ട നികുതി ബാധകമാകും. എന്നാൽ സ്വർണം വാങ്ങി മൂന്ന് വർഷത്തിന് ശേഷമാണ് വിൽക്കുന്നതെങ്കിൽ അതിനെ ദീർഘകാല മൂലധന നേട്ട നികുതിയിനത്തിൽ കണക്കാക്കാം.

സ്വർണ നിക്ഷേപങ്ങൾക്ക് പരിധിയുണ്ടോ?

ഭൗതിക സ്വർണമല്ലെങ്കിൽ നികുതിയുണ്ടോ? ഡിജിറ്റൽ സ്വർണം, സോവറിൻ ഗോൾഡ് ബോണ്ട്, ​ഗോൾഡ് ഇടിഎഫ് എന്നിവ സൂക്ഷിക്കുന്നതിനും പരിധിയുണ്ടോ എന്ന് പരിശോധിക്കാം;

1. ഡിജിറ്റൽ സ്വർണം

ഡിജിറ്റൽ സ്വർണം വാങ്ങുന്നതിന് പ്രത്യേക പരിധിയില്ല. ഒരു ദിവസം 2 ലക്ഷം വരെയുള്ള ഡിജിറ്റൽ സ്വർണം വാങ്ങാൻ സാധിക്കും. ഡിജിറ്റൽ സ്വർണം വിൽക്കുമ്പോൾ ഹ്രസ്വകാല മൂലധന നേട്ട നികുതി (STCG) ബാധകമല്ല. എന്നാൽ ദീർഘകാല മൂലധന നേട്ട നികുതി (LTCG) 20% നിരക്കിൽ ബാധകമാണ്. ഇവിടെ ഡിജിറ്റൽ സ്വർണം വാങ്ങുമ്പോൾ നിശ്ചിത നിരക്കിൽ ജിഎസ്ടിയും മറ്റ് ചെറിയ ഫീസുകളും ഈടാക്കുന്നു.

2. സോവറിൻ ഗോൾഡ് ബോണ്ട് (SGB)

ഡിജിറ്റൽ സ്വർണം പോലെ മറ്റൊരു മികച്ച നിക്ഷേപമാണ് സോവറിൻ ഗോൾഡ് ബോണ്ട്. നിങ്ങൾക്ക് ഒരു സാമ്പത്തിക വർഷത്തിൽ 4 കിലോഗ്രാം വരെ സോവറിൻ ഗോൾഡ് ബോണ്ടിൽ നിക്ഷേപിക്കാൻ അനുവാദമുണ്ട്. സോവറിൻ ഗോൾഡ് ബോണ്ടിൽ നിന്ന് ലഭിക്കുന്ന പലിശ നിങ്ങളുടെ മൊത്തം നികുതി വരുമാനത്തിൽ ഉൾപ്പെടുത്തും. എന്നാൽ ഈ നിക്ഷേപത്തിൻ്റെ കാലാവധി അവസാനിക്കുമ്പോൾ നേടുന്ന ലാഭത്തിന് നികുതി നൽകേണ്ടതില്ല.

3. ഗോൾഡ് ഇടിഎഫുകളും മ്യൂച്വൽ ഫണ്ടുകളും

​ഗോൾഡ് ഇടിഎഫുകളും, ഗോൾഡ് മ്യൂച്വൽ ഫണ്ടുകളും വിൽക്കുമ്പോൾ നിക്ഷേപ കാലാവധിയെ ആശ്രയിച്ച് ദീർഘകാല മൂലധന നേട്ട നികുതി നൽകേണ്ടി വരും.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.