നിങ്ങളുടെ പണം ഇരട്ടിക്കാന്‍ എത്ര നാളുകള്‍ വേണം?

'നിങ്ങള്‍ ധൈര്യമായി നിക്ഷേപിക്കൂ, നിക്ഷേപിക്കുന്ന തുക ഇരട്ടിയായി ഞങ്ങള്‍ തിരികെ നല്‍കും.' ആള്‍ക്കാരെ നിക്ഷേപങ്ങളിലേക്ക് ആകര്‍ഷിക്കുവാന്‍ ഇത്തരം പ്രലോഭിപ്പിക്കുന്ന പരസ്യങ്ങള്‍ കണ്ണില്‍ പെടാത്തവരുണ്ടാകില്ല. നിക്ഷേപിക്കാന്‍ ആഗ്രഹിക്കുന്നവര്‍ക്കും ഏറെ ആകര്‍ഷകമായ വാഗ്ദാനമാണിത്.

എന്നാല്‍ ഈ പണം ഇരട്ടിപ്പിക്കുക എന്ന് പറയുന്നത് അത്ര എളുപ്പമാണോ? നമ്മള്‍ നിക്ഷേപിച്ച തുകയുടെ ഇരട്ടി തന്നെ തിരിച്ചു ലഭിക്കുമോ ? അതിന് ചുരുങ്ങിയത് എത്ര സമയം വേണ്ടി വരും? വാഗ്ദാനം കണ്ട് കണ്ണുംപൂട്ടി നിക്ഷേപം നടത്താന്‍ ഒരുങ്ങിയാല്‍ ഇനി എട്ടിന്റെ പണിയാണോ നമ്മളെ കാത്തിരിക്കുന്നത്? നിക്ഷേപിച്ച തുക കൂടി നഷ്ടപ്പെടുമോ? എന്നിങ്ങനെ നിരവധി സംശയങ്ങളും എല്ലാവരുടേയും മനസ്സിലുണ്ടാകും.

നിക്ഷേപത്തിന്റെയും അവര്‍ നല്‍കുന്ന വാഗ്ദാനങ്ങളുടെയും സാധുത നമ്മുടെ നിക്ഷേപ മാര്‍ഗത്തെ അടിസ്ഥാനമാക്കിയായിരിക്കും. നിക്ഷേപം നടത്തുന്നതിനായി വിശ്വസ്തതയുള്ള നിക്ഷേപ മാര്‍ഗങ്ങള്‍ തെരഞ്ഞെടുക്കുക എന്നതാണ് ഏറ്റവും പ്രധാനമായും ശ്രദ്ധിക്കേണ്ട കാര്യം.

നാം നിക്ഷേപിക്കുന്ന തുക എത്ര കാലം കൊണ്ട് അതിന്റെ ഇരട്ടി തുകയായി മാറും എന്ന് നമുക്ക് തന്നെ എളുപ്പത്തില്‍ കണ്ടെത്താന്‍ സാധിക്കും. റൂള്‍ ഓഫ് 72 എന്ന മാര്‍ഗത്തിലൂടെയാണ് തുക ഇരട്ടിയാകാനെടുക്കുന്ന സമയം നമുക്ക് കണക്കാക്കാന്‍ സാധിക്കുന്നത്. കൂട്ടുപലിശ ലഭിക്കുന്ന നിക്ഷേപ പദ്ധതികള്‍ക്കാണ് റൂള്‍ ഓഫ് 72 മാര്‍ഗം ബാധകമാവുക. നിക്ഷേപത്തിന് ലഭിക്കുന്ന പലിശ നിരക്കിനെ 72 കൊണ്ട് ഹരിക്കുകയാണ് വേണ്ടത്. ഉത്തരമായി ലഭിക്കുന്ന സംഖ്യയാണ് തുക ഇരട്ടിക്കാന്‍ ആവശ്യമായ സമയം. ഉദാഹരണത്തിന് നിങ്ങള്‍ 6 ശതമാനം പലിശ നിരക്കില്‍ 1 ലക്ഷം രൂപ നിക്ഷേപിച്ചു എന്ന് കരുതുക. അത് 2 ലക്ഷം രൂപയാകുന്നതിനായി വേണ്ടത് 72/6 = 12 വര്‍ഷമായിരിക്കും.

സയന്റിഫിക് കാല്‍ക്കുലേറ്റര്‍ ഉപയോഗിച്ചും എക്‌സല്‍ ഷീറ്റ് വഴിയുമൊക്കെ കൃത്യമായി എത്ര വര്‍ഷങ്ങള്‍, എത്ര മാസങ്ങള്‍, എത്ര ദിവസങ്ങള്‍ എന്നൊക്കെ കണക്കാക്കാന്‍ സാധിക്കുമെങ്കിലും നിക്ഷേപം നടത്തുവാന്‍ നമ്മളെ ചാക്കിലാക്കുന്നതിനായി ആരെങ്കിലും വന്നാല്‍ റൂള്‍ ഓഫ് 72 മാര്‍ഗത്തിലൂടെ മനസ്സില്‍ എളുപ്പത്തില്‍ ഏകദേശ സമയം കണക്കാക്കുവാന്‍ സാധിക്കും.

ഇനി ഒരു നിശ്ചിത കാലത്തേക്ക് ഒരു തുക നിക്ഷേപിക്കുകയാണെങ്കില്‍ അതിന് എത്ര പലിശ നിരക്ക് ലഭിച്ചാല്‍ നിക്ഷേപ തുക ഇരട്ടിയാകും എന്ന് കണ്ടെത്താനും റൂള്‍ ഓഫ് 72 ഉപയോഗിച്ച് സാധിക്കും. അതായത് 10 വര്‍ഷത്തേക്ക് നിക്ഷേപിക്കുന്ന നിങ്ങളുടെ തുക ഇരട്ടിയാകണമെങ്കില്‍ 72/10= 7.2% പലിശ നിരക്കു ലഭിക്കുന്ന നിക്ഷേപ മാര്‍ഗം സ്വീകരിക്കണം എന്നര്‍ഥം.

5% മുതല്‍ 10% വരെ പലിശനിരക്ക് ലഭിക്കുന്ന നിക്ഷേപങ്ങളുടെ കാര്യത്തിലാണ് റൂള്‍ ഓഫ് 72 കൂടുതല്‍ കൃത്യമായി പ്രാവര്‍ത്തികമാവുക. പലിശ നിരക്ക് അതിനു താഴെയാണെങ്കില്‍ 69 ഉപയോഗിക്കുന്നുണ്ട്. ഇനി 10ല്‍ കൂടുതലാണ് പലിശ നിരക്കെങ്കില്‍ 73 മുതലുള്ള സംഖ്യകളും ഇതേ രീതിയില്‍ സൂത്രവാക്യമായി ഉപയോഗിക്കുന്നവരുണ്ട്.