ഇപിഎഫിൽനിന്നും 3.5 കോടി നേടാൻ പ്രതിമാസം എത്ര നിക്ഷേപിക്കണം?

സ്വകാര്യ മേഖലയിലെ ജീവനക്കാർക്ക് നിശ്ചിത പലിശ നിരക്ക് ലഭിക്കുന്ന ഒരു റിട്ടയർമെന്റ് സ്കീമാണ് എംപ്ലോയീസ് പ്രൊവിഡന്റ് ഫണ്ട് (ഇപിഎഫ്). ഒരു സാമ്പത്തിക വർഷത്തിൽ 1.50 ലക്ഷം രൂപ വരെ നിക്ഷേപിച്ച് പലിശയും കാലാവധി പൂർത്തിയാകുമ്പോൾ മെച്യൂരിറ്റി തുകയ്ക്ക് നികുതിയില്ലാതെ നേടിയെടുക്കാവുന്ന ചുരുക്കം ചില പദ്ധതികളിൽ ഒന്നാണിത്.

ഒരാൾ തന്റെ ജോലിയിൽ ഉടനീളം സ്ഥിരമായി ഇപിഎഫിൽ നിക്ഷേപിക്കുകയാണെങ്കിൽ, റിട്ടയർമെന്റ് സമയത്ത് നികുതി ഇല്ലാതെ വലിയൊരു തുക സമ്പാദിക്കാൻ സാധിക്കും. 15,000 രൂപ അടിസ്ഥാന ശമ്പളമുള്ള ഒരു ജീവനക്കാരന് ഇപിഎഫിലേക്ക് എല്ലാ മാസവും കുറഞ്ഞത് 1,800 രൂപ സംഭാവന ചെയ്യാം. അവർക്ക് സംഭാവന ചെയ്യാൻ കഴിയുന്ന പരമാവധി തുക അടിസ്ഥാന ശമ്പളത്തിന്റെയും ക്ഷാമബത്തയുടെയും (ഡിഎ) 12 ശതമാനമാണ്.

അവർക്ക് 12 ശതമാനത്തിൽ കൂടുതൽ വേണമെങ്കിൽ സംഭാവന ചെയ്യാം, പക്ഷേ അത് അവരുടെ വോളണ്ടറി പ്രൊവിഡന്റ് ഫണ്ടായി (VPF) കണക്കാക്കും. അധിക സംഭാവനകൾക്കും അതിലൂടെ ലഭിക്കുന്ന അധിക തുകയ്ക്കും അവർക്ക് നികുതി ആനുകൂല്യങ്ങൾ ലഭിക്കില്ല. ഇപിഎഫ് വരിക്കാർക്ക് 8.25 ശതമാനം കൂട്ടുപലിശ ലഭിക്കും. ഈ നിരക്ക് ധനമന്ത്രാലയത്തിന് പരിഷ്കരിക്കാനാകും. ജീവനക്കാരന്റെ അക്കൗണ്ടിലേക്ക് തൊഴിലുടമയും തുല്യമായ തുക സംഭാവന ചെയ്യുന്നു എന്നതാണ് ഇപിഎഫിന്റെ പ്രത്യേകത .

തൊഴിലുടമയുടെ ഭാഗത്ത് നിന്ന്, 3.67 ശതമാനം സംഭാവന ജീവനക്കാരന്റെ ഇപിഎഫ് അക്കൗണ്ടിലേക്കും ബാക്കി 8.33 ശതമാനം അവരുടെ എംപ്ലോയീസ് പെൻഷൻ സ്കീമിലേക്കും (ഇപിഎസ്) പോകുന്നു. ഇപിഎഫിന്റെ നിക്ഷേപ കാലാവധി 35 വർഷമായിരിക്കും (25 വയസ്സ് മുതൽ 60 വയസ്സ് വരെ). പ്രതിമാസ വിഹിതം തുടക്കം മുതൽ അവസാനം വരെ ഒരുപോലെ തുടരും. റിട്ടയർമെന്റ് കാലത്ത് സാമ്പത്തിക സ്വാതന്ത്ര്യം നേടുന്നതിന് നല്ലൊരു സമ്പാദ്യം സൃഷ്ടിക്കാൻ ഇപിഎഫ് സംഭാവന ഒരാളെ സഹായിക്കും.

1.5 കോടി എങ്ങനെ സമ്പാദിക്കാം

റിട്ടയർമെന്റ് സമയത്ത് 1.5 കോടി നേടാൻ ഒരാൾ പ്രതിമാസം 6,340 രൂപ സംഭാവന ചെയ്യണം. 35 വർഷത്തിനുള്ളിൽ മൊത്തം ഇപിഎഫ് വിഹിതം 26,62,800 രൂപയും ഇപിഎഫ് റിട്ടയർമെന്റ് കോർപ്പസ് 1,50,05,465.25 രൂപയും ആയിരിക്കും.

2.5 കോടി എങ്ങനെ നേടാം

പ്രതിമാസം 10,570 രൂപ ഇപിഎഫിലേക്ക് സംഭാവന ചെയ്യുക. 35 വർഷത്തിനുള്ളിൽ മൊത്തം ഇപിഎഫ് വിഹിതം 44,39,400 രൂപയും ഇപിഎഫ് റിട്ടയർമെൻ്റ് കോർപ്പസ് 2,50,16,998.06 രൂപയും ആയിരിക്കും.

3.5 കോടി എങ്ങനെ സമ്പാദിക്കാം

പ്രതിമാസ സംഭാവന 14,790 രൂപയായിരിക്കും. 35 വർഷത്തിനുള്ളിൽ ഇപിഎഫ് വിഹിതം 62,11,800 രൂപയും ഇപിഎഫ് റിട്ടയർമെന്റ് കോർപ്പസ് 3,50,04,862.95 രൂപയും ആയിരിക്കും.