കുട്ടികളുടെ വിദ്യാഭ്യാസത്തിനായി നിങ്ങള്‍ എത്ര നിക്ഷേപിക്കണം? അറിയാമോ?

നിലവില്‍ രാജ്യത്തെ ഒരു സ്വകാര്യ വിദ്യാഭ്യാസ സ്ഥാപനത്തില്‍ ബിരുദ പഠനത്തിനായി ഒരു വിദ്യാര്‍ഥിയ്ക്ക് ആവശ്യമായി വരുന്ന ഫീസ് ഏകദേശം 8 ലക്ഷം രൂപ മുതല്‍ 15 ലക്ഷം രൂപ വരെ. ബിരുദാനന്തര ബിരുദ പഠനത്തിനായി ഇത് 25 ലക്ഷം രൂപവരെയാകാം. വിദ്യാഭ്യാസ ചിലവുകളില്‍ പ്രതിവര്‍ഷം ഏകദേശം 12 ശതമാനത്തിന്റെ വര്‍ധനവ് കൂടി കണക്കാക്കിയാല്‍ ആകെ ചിലവ് ശരാശി 14 ലക്ഷം രൂപയും അതിന് മുകളിലേക്കും വരും. അതായത് നിങ്ങളുടെ കുട്ടിയുടെ ഉന്നത വിദ്യാഭ്യാസത്തിനായി ശരാശി 4.5 ലക്ഷം രൂപ ഓരോ വര്‍ഷവും ആവശ്യമായി വരും.

അതുപോലെ തന്നെ വിദേശ രാജ്യങ്ങളില്‍ ഉന്നത പഠനത്തിനായും ഉയര്‍ന്ന തുക ആവശ്യമായി വരുന്നുണ്ട്. യുഎസ്എയിലെ ഐവി ലീഗ് കോളേജുകളില്‍ ട്യൂഷന്‍ ഫീസായി ഈടാക്കുന്നത് 50,000 ഡോളറിനും മുകളിലാണ്. താമസം, പുസതകങ്ങള്‍, മറ്റ് ചിലവുകള്‍ എന്നിവ കൂടി ചേരുമ്പോള്‍ ആകെ ചിലവ് ഇന്ന് 70,000 ഡോളറിന് മുകളിലാകും. അത്തരമൊരു സാഹചര്യത്തില്‍ നിങ്ങളുടെ പോര്‍ട്ട്‌ഫോളിയോവില്‍ യുഎസ് ഇക്വിറ്റി ഫണ്ടുകള്‍ കൂടി ഉള്‍ക്കൊള്ളിക്കുന്നത് അഭികാമ്യമാണെന്ന് സാമ്പത്തിക വിദഗ്ധര്‍ പറയുന്നു. നിലവിലെ പണപ്പെരുപ്പ അവസ്ഥയില്‍ നിന്നും അത് നിങ്ങള്‍ക്ക് സംരക്ഷണം നല്‍കുമെന്നും അവര്‍ കൂട്ടിച്ചേര്‍ക്കുന്നു.

നിങ്ങള്‍ ലക്ഷ്യമിട്ട തുക സമ്പാദിക്കുന്നതിനായി ചുരുങ്ങിയത് 10 വര്‍ഷത്തെ നിക്ഷേപ ആസൂത്രണം അവശ്യമാണ്. ഓരോ മാസവും നിക്ഷേപം നടത്തേണ്ടതായുണ്ട്. നിങ്ങള്‍ക്ക് മതിയായ തുകയിലേക്ക് നിങ്ങള്‍ അടുക്കുമ്പോള്‍ മൂലധനം സുരക്ഷിതമാക്കുന്നതിനായി അത് ഒരു ഡബ്റ്റ് ഫണ്ടിലേക്ക് മാറ്റാവുന്നതാണ്. പ്രതിമാസ എസ്‌ഐപി (സിസ്റ്റമാറ്റിക് ഇന്‍വസ്റ്റ്‌മെന്റ് പ്ലാന്‍) എന്നത് നിങ്ങളുടെ ഇക്വിറ്റി നിക്ഷേപം നിങ്ങള്‍ ഉദ്ദേശിച്ച തുകയിലെത്തുന്നതിന് അനുസൃതമായിരിക്കണം.

ഓഹരി നിക്ഷേപങ്ങളിലെ ഹ്രസ്വകാല നിക്ഷേപങ്ങള്‍ അസ്ഥിരമാണെന്നും നമ്മള്‍ ഓര്‍ക്കേണ്ടതുണ്ട്. അതുകൊണ്ട് തന്നെ ഓഹരിയില്‍ നിന്നും മതിയായ ആദായം ലഭിക്കുന്നതിനായി നിക്ഷേപ കാലാവധി മുഴുവന്‍ ക്ഷമയോടെയും അച്ചടക്കത്തോടെയും നിക്ഷേപം നടത്തേണ്ടതുണ്ട്.