റിട്ടയര്‍മെന്റ് സമ്പാദ്യമായി എത്ര തുക വേണം? 4 ശതമാനം പിന്‍വലിക്കല്‍ നിയമം പറയുന്നതെന്തെന്ന് അറിയാമോ?

ദീര്‍ഘകാല നിക്ഷേപത്തിന് തയ്യാറെടുക്കുമ്പോള്‍ നിക്ഷേപകന് എപ്പോഴും തന്റെ സാമ്പത്തിക ലക്ഷ്യങ്ങളെക്കുറിച്ച് പൂര്‍ണമായ ബോധ്യം വേണം. റിട്ടയര്‍മെന്റ് കാല സമ്പാദ്യത്തിനായി നിക്ഷേപം നടത്തുമ്പോള്‍ തീര്‍ച്ചയായും പണപ്പെരുപ്പവും മനസ്സില്‍ വയ്‌ക്കേണ്ടതുണ്ട്. അത്തരം നിക്ഷേപകര്‍ത്ത് തങ്ങളുടെ സാമ്പത്തിക ലക്ഷ്യം എളുപ്പത്തില്‍ കൈവരിക്കുന്നതിന് സാധിക്കും.

എന്നാല്‍ സാമ്പത്തീകമായി സുരക്ഷതയുള്ള റിട്ടയര്‍മെന്റ് കാലത്തിനായി ആകെ എത്ര തുക കരുതി വയ്ക്കണമെന്ന് കണക്കാക്കുവാന്‍ അല്‍പം പ്രയാസമുള്ള കാര്യമാണ്. നികുതി വിദഗ്ധരുടെ അഭിപ്രായ പ്രകാരം ഒരു വ്യക്തിയുടെ റിട്ടയര്‍മെന്റിന് ശേഷം എത്ര തുക കൈയ്യില്‍ വേണമെന്ന് കണ്ടെത്തുവാനുള്ള എളുപ്പ വഴി അയാളുടെ പ്രതിമാസ ചിലവുകള്‍ ഇപ്പോഴുള്ള വിലയില്‍ കണക്കാക്കുക എന്നതാണ്. പിന്നീട് 7 ശതമാനം പണപ്പെരുപ്പം കണക്കാക്കി റിട്ടയര്‍മെന്റ് കാലത്തേക്കുളള തുകയുടെ മൂല്യം കണക്കാക്കാം.

മധ്യവര്‍ഗക്കാര്‍ക്ക് ഏകദേശം 45,000 മുതല്‍ 50,000 രൂപ വരെയാണ് റിട്ടയര്‍മെന്റ് കാലത്തില്‍ ഒരു മാസത്തേക്ക് ആവശ്യമായി വരിക. അതായത് ഒരു വര്‍ഷം 6 ലക്ഷം രൂപ. റിട്ടയര്‍മെന്റിനായി 4 ശതമാനം പിന്‍വലിക്കല്‍ നിയമം ഉപയോഗിച്ചാല്‍ ഇന്ന് റിട്ടയര്‍ ചെയ്യുന്ന ഒരു വ്യക്തിയ്ക്ക് 1.5 കോടി രൂപ ( 6ലക്ഷം x 25) യാണ് ആവശ്യം വരിക. 4 ശതമാനം പിന്‍വലിക്കല്‍ നിയമം റിട്ടയര്‍മെന്റിന് ശേഷമുള്ള 25 വര്‍ഷത്തേക്കാണ് നിക്ഷേപ തുക കണക്കാക്കുക.

ഇന്ന് 30 വയസ്സുള്ള ഒരു നിക്ഷേപകന്‍ ഈ 1.5 കോടിയുടെ കണക്ക് മനസ്സില്‍ വയ്‌ക്കേണ്ടതുണ്ട്.ഒപ്പം റിട്ടയര്‍മെന്റിന് ശേഷമുള്ള ജീവിതച്ചിലവുകള്‍ക്കായി എത്ര തുക വേണമെന്ന് കണക്കാക്കുമ്പോള്‍ 7 ശതമാനം പണപ്പെരുപ്പ നിരക്കും ഓര്‍മയില്‍ വയ്‌ക്കേണ്ടതുണ്ട്. മ്യൂച്വല്‍ ഫണ്ട് കാല്‍ക്കുലേറ്റര്‍ പ്രകാരം 7 ശതമാനം വാര്‍ഷിക പണപ്പെരുപ്പ വര്‍ധനവ്് പരിഗണിച്ചാല്‍ 30 വര്‍ഷത്തിന് ശേഷം റിട്ടയര്‍ ചെയ്യുന്ന വ്യക്തിയ്ക്ക് വേണ്ടത് 11.5 കോടി രൂപയാണ്.

7 ശതമാനമോ അതില്‍ കൂടുതലോ പലിശ നിരക്ക് ആദായം ലഭിക്കുന്ന നിക്ഷേപ പദ്ധതികളില്‍ നിക്ഷേപിക്കുന്നതാണ് പണപ്പെരുപ്പത്തെ മറികടന്ന് മതിയായ റിട്ടയര്‍മെന്റ് സമ്പാദ്യം ഉറപ്പു വരുത്തുന്നതിനുള്ള മാര്‍ഗം.