മ്യൂച്വൽ ഫണ്ട് നിക്ഷേപമുണ്ടോ? നിക്ഷേപം പിൻവലിക്കുമ്പോൾ നൽകേണ്ട നികുതി അറിയാം

ഇക്വിറ്റി മാർക്കറ്റിൽ പെട്ടന്ന് ലാഭം കാണുമ്പോൾ നിക്ഷേപം വിറ്റുമാറുന്നവരാണെങ്കിൽ ശ്രദ്ധിക്കേണ്ട കാര്യാണ് നികുതി. നിക്ഷേപ ചെലവുകളും നികുതിയും കിഴിച്ചാൽ ലാഭം നഷ്ടമാകുന്ന സാഹചര്യങ്ങൾ ഉണ്ടാകാറുണ്ട്. അതിനാൽ ആദായ നികുതി നിയമപ്രകാരം നിക്ഷേപത്തിന് എത്ര നികുതി എന്ന ആദ്യം അറിഞ്ഞിരിക്കണം.

ഓഹരിയെ പോലെ തന്നെ മ്യൂച്വൽ ഫണ്ട് വിറ്റാലും ആദായ നികുതി ബാധകമാകും. മൂലധന നേട്ട നികുതിയാണ് ഇവിടെ ബാധകമാകുന്നത്. മ്യൂച്വൽ ഫണ്ടിൽ മൂലധന നേട്ട നികുതി ബാധകമാകുന്നതിന് രണ്ട് കാര്യങ്ങളാണ് പരിശോധിക്കുന്നത്. മ്യൂച്വൽ ഫണ്ടിന്റെ തരവും കാലാവധിയും.
ഡെറ്റ് മ്യൂച്വൽ ഫണ്ട്, ഇക്വിറ്റി മ്യൂച്വൽ ഫണ്ട് എന്നിവയ്ക്ക് വ്യത്യസ്ത തരത്തിലാണ് മൂലധന നേട്ട നികുതി. എത്രകാലം നിക്ഷേപം നടത്തി എന്നതിനെ അടിസ്ഥാനമാക്കിയാണ് മൂലധന നേട്ട നികുതി ഈടാക്കുക. അതായത്, ഹ്രസ്വകാല മൂലധന നേട്ട നികുതിയും ദീർഘകാല മൂലധന നേട്ട നികുതിയും.

ഇക്വിറ്റി മ്യൂച്വൽ ഫണ്ട്

65 ശതമാനത്തിലധികം ഇക്വിറ്റിയിൽ നിക്ഷേപമുള്ള മ്യൂച്വൽ ഫണ്ടുകളാണ് ഇക്വിറ്റി മ്യൂച്വൽ ഫണ്ടുകൾ. ഇവ വാങ്ങിയതിന് ഒരു വർഷത്തിനുള്ളിൽ വിറ്റാൽ ഹ്രസ്‌കാല മൂലധന നേട്ട നികുതിയായി 20 ശതമാനം ഈടാക്കും. ഒരു വർഷത്തിന് ശേഷം ലാഭമെടുക്കുമ്പോൾ, ലാഭം 1.25 ലക്ഷത്തിൽ കൂടുതലാണെങ്കിൽ 12.5 ശതമാനമാണ് മൂലധന നേട്ട നികുതി. ലാർജ് കാപ്, സ്മോൾ കാപ്, മൾട്ടികാപ്, തീമാറ്റിക് ഫണ്ട് എന്നിങ്ങനെ വ്യത്യസ്ത ഫണ്ടുകൾക്ക് ബാധകമാകുന്നത് ഈ നികുതിയാണ്.

ഇക്കഴിഞ്ഞ യൂണിയൻ ബജറ്റിലാണ് നികുതി പരിഷ്കരിച്ചത്. നേരത്തെ ഹ്രസ്വകാല മൂലധന നേട്ടനികുതി 15 ശതമാനവും ദീർഘകാല നികുതി 1.25 ലക്ഷം രൂപയ്ക്ക് മുകളിൽ 10 ശതമാനവുമായിരുന്നു.

ഡെബ്റ്റ് മ്യൂച്വൽ ഫണ്ടുകൾ

ബോണ്ട് പോലുള്ള ഡെബ്റ്റ് നിക്ഷേപങ്ങളിൽ അലോക്കഷനുള്ള മ്യൂച്വൽ ഫണ്ടുകളാണ് ഡെബ്റ്റ് മ്യൂച്വൽ ഫണ്ടുകൾ. സർക്കാർ, പൊതുമേഖലാ കമ്പനിനികൾ എന്നിവ പുറത്തിറക്കുന്ന കടപത്രം പോലുള്ളവയിലാണ് ഡെബ്റ്റ് മ്യൂച്വൽ ഫണ്ട് നിക്ഷേപിക്കുന്നത്. നികുതി കാര്യങ്ങൾക്കായി ഡെബ്റ്റ് മ്യൂച്വൽ ഫണ്ടുകളെ സെപെഫിഫൈഡ് മ്യൂച്വൽ ഫണ്ടുകൾ എന്നാണ് തിരിച്ചിരിക്കുന്നത്. ആഭ്യന്തര കമ്പനികളുടെ ഓഹരികളിൽ നിക്ഷേപം 35 ശതമാനത്തിലധികമാകാത്ത മ്യൂച്വൽ ഫണ്ടുകളാണിവ.

എത്ര ശതമാനം നികുതി

ഡെബ്റ്റ് മ്യൂച്വൽ ഫണ്ടിന്റെ നികുതി, ഏത് ദിവസം വിൽപ്പന നടത്തി എന്നതിനെ ആശ്രയിച്ചിരിക്കും. 2023 ഏപ്രിൽ ഒന്നിന് മുൻപ് വാങ്ങിയ യൂണിറ്റുകൾ രണ്ടു വർഷത്തിന് ശേഷം വിറ്റാൽ ദീർഘകാല മൂലധന നേട്ട നികുതിയായി, 12.5 ശതമാനം നികുതി ഈടാക്കും. രണ്ടു വർഷത്തിന് മുൻപാണ് വിൽപ്പനയെങ്കിൽ നികുതിദായകന്റെ ടാക്‌സ് സ്ലാബ് അനുസരിച്ചാണ് ഹ്രസ്വകാല മൂലധന നേട്ട നികുതി ബാധകമാകുക.

2023 ഏപ്രിൽ ഒന്നിന് ശേഷം വാങ്ങിയ ഡെബ്റ്റ് മ്യൂച്വൽ ഫണ്ടുകൾ വിറ്റാൽ ലാഭത്തിന് മുകളിൽ നികുതി ഈടാക്കുന്നത് നികുതിദായകന്റെ ടാക്‌സ് സ്ലാബ് അനുസരിച്ചാണ്. ഇവിടെ എത്രകാലം നിക്ഷേപം ഹോൾഡ് ചെയ്തു എന്നത് അടിസ്ഥാനമാക്കുന്നില്ല.