നിക്ഷേപം ചില്ലറ കളിയല്ല; 1000 രൂപ എസ്‌ഐപി 10 വർഷം കൊണ്ട് എത്രയാകും

ചെറിയ തുക മാത്രം മാസത്തിൽ മാറ്റിവെയ്ക്കാൻ സാധിക്കുന്നൊരാൾക്ക് വലിയ സ്വപ്‌നങ്ങൾ കാണാൻ സാധിക്കുമോ? എസ്‌ഐപി വഴി മ്യൂച്വൽ ഫണ്ടിൽ നിക്ഷേപം തുടങ്ങിയാൽ സ്വപ്‌നങ്ങൾക്ക് ചിറക് മുളയ്ക്കുമെന്ന് പറയാം. നിശ്ചിത ഇടവേളകളിൽ കൃത്യമായൊരു തുക മ്യൂച്വൽ ഫണ്ട് സ്‌കീമിലേക്ക് നിക്ഷേപിക്കുകയാണ് എസ്‌ഐപി വഴി നിക്ഷേപകർ ചെയ്യേണ്ടത്. ബാങ്കിലെ ആവർത്തന നിക്ഷേപത്തിന് സമാനമായ നിക്ഷേപ രീതി തന്നെയാണ് എസ്‌ഐപി.

എസ്‌ഐപിയുടെ ഏറ്റവും വലിയ ഗുണം നിക്ഷേപകനുള്ള ഓപ്ഷനുകളാണ്. എത്ര തുക നിക്ഷേപിക്കണം എന്നതും നിക്ഷേപത്തിനുള്ള ഇടവേളകളും നിക്ഷേപകന് തന്നെ തീരുമാനിക്കാം. ആഴ്ചയിലും മാസത്തിലും ത്രൈമാസത്തിലും എസ്‌ഐപി നടത്താം. ശമ്പള തീയതിക്ക് അനുസരിച്ച് എസ്‌ഐപി ക്രമീകരിക്കുന്നത് നിക്ഷേപം മുടങ്ങാതെ തുടരുന്നതിന് സഹായിക്കും.

ചെറിയ തുക മുതൽ എസ്‌ഐപി നിക്ഷേപം തുടങ്ങാം. ഫണ്ടുകൾ അനുസരിച്ച് 500 രൂപ മുതൽ എസ്‌ഐപി തുടങ്ങാനാകും. പ്രതിമാസ കാലയളവിൽ 1000 രൂപ എസ്‌ഐപി വഴി നിക്ഷേപിക്കുമ്പോൾ സമ്പാദ്യം എത്ര കണ്ട് വളരുമെന്ന് നോക്കാം.

1,000 രൂപയുടെ എസ്ഐപി

കുറഞ്ഞ തുകയുടെ നിക്ഷേപം വഴിയും വലിയ സമ്പാദ്യം ഉണ്ടാക്കാൻ എസ്‌ഐപി വഴിയുള്ള മ്യൂച്വൽ ഫണ്ട് നിക്ഷേപത്തിന് സാധിക്കും. ഇവിടെ കാലയളവാണ് പ്രധാന ഘടകം. 1,000 രൂപ പ്രതിമാസ എസ്‌ഐപി വഴി നിക്ഷേപിക്കുന്നൊരാൾക്ക് 12 ശതമാനം റിട്ടേൺ പ്രതീക്ഷിച്ചാൽ 30 വർഷം കൊണ്ട് നിക്ഷേപം 34.9 ലക്ഷം രൂപയായി വളരും. 30 വർഷത്തിനിടെ 360 മാസത്തെ എസ്‌ഐപി വഴി നിക്ഷേപിക്കുന്നത് വെറും 3.6 ലക്ഷം രൂപയാണ്.

കാലയളവ് ചുരുക്കുകയാണെങ്കിൽ സമ്പാദ്യവും ചുരുങ്ങും. 20 വർഷത്തേക്ക് എസ്‌ഐപി വഴി പ്രതിമാസം 1,000 രൂപ നിക്ഷേപിക്കുന്നൊരാൾക്ക് 12 ശതമാനം റിട്ടേൺ ലഭിച്ചാൽ പോർട്ട്‌ഫോളിയോ മൂല്യം 9.89 ലക്ഷം രൂപയായിരിക്കും. ഇക്കാലയളവിൽ നിക്ഷേപിക്കുന്നത് 2.40 ലക്ഷം രൂപയാണ്. 1000 രൂപയുടെ എസ്‌ഐപി 10 വർഷത്തേക്കാണെങ്കിൽ 1.20 ലക്ഷത്തിന്റെ നിക്ഷേത്തിൽ നിന്ന് 2,30,038 രൂപ സമ്പാദിക്കാൻ സാധിക്കും.

5,000 രൂപയുടെ എസ്ഐപി

നിക്ഷേപിക്കുന്ന തുക ഉയരുമ്പോൾ റിട്ടേണും ഇതിന് അനുസരിച്ച് ഉയരും. 5,000 രൂപയുടെ പ്രതിമാസ എസ്ഐപി അഞ്ചു വർഷത്തേക്ക് തുടരുമ്പോൾ നിക്ഷേപിക്കുന്ന തുക 3,00,000 രൂപയാണ്. 12 ശതമാനം റിട്ടേൺ പ്രതീക്ഷിച്ചാൽ 1,05,518 രൂപയുടെ നേട്ടത്തോടെ 4,05,518 രൂപയാകും ആകെ സമ്പാദ്യം. നിക്ഷേപം പത്തുവർഷത്തേക്ക് തുടരുമ്പോൾ 5,20,179 രൂപയുടെ നേട്ടം പ്രതീക്ഷിക്കാം പോർട്ട്ഫോളിയോ മൂല്യം 11,20,179 രൂപയിലെത്തും. ഇതേസമയത്ത് 10,000 രൂപ മാസം നിക്ഷേപിക്കാൻ സാധിച്ചാൽ 10 വർഷം കൊണ്ട് 20 ലക്ഷം രൂപയോളം ഉണ്ടാക്കാൻ സാധിക്കും.