റിട്ടയർമെന്റിൽ പ്രതിമാസം 1 ലക്ഷം പെൻഷൻ വേണോ? 20-ാം വയസിൽ നിക്ഷേപിക്കേണ്ടത് എത്ര?

ജോലിയിൽനിന്നും വിരമിക്കുന്നതോടെ പ്രതിമാസം ലഭിക്കുന്ന വരുമാനം അവസാനിക്കും. ഈ സമയത്ത് മറ്റു വരുമാന സ്രോതസുകൾ ഇല്ലെങ്കിൽ സാമ്പത്തിക ബുദ്ധിമുട്ടുകൾ നേരിടേണ്ടി വരും. വാർധക്യത്തിൽ സാമ്പത്തിക ഭദ്രതയും സ്ഥിരതയും പ്രദാനം ചെയ്യുന്ന ജനപ്രിയ നിക്ഷേപ പദ്ധതികളിലൊന്നാണ് നാഷണൽ പെൻഷൻ സിസ്റ്റം (എൻപിഎസ്). റിട്ടയർമെന്റ് സമയത്ത്, ഒരു ആന്വിറ്റി പ്ലാനിലൂടെ ഒറ്റത്തവണയായി നിക്ഷേപിക്കുന്നതിലൂടെ സ്ഥിര വരുമാനം ലഭിക്കും

എൻപിഎസ് റിട്ടയർമെന്റ് ജീവിതത്തിൽ ഒരാൾക്ക് പെൻഷൻ രൂപത്തിൽ സ്ഥിര വരുമാനം നൽകുന്നു. റിട്ടയർമെന്റ് സമയത്ത് സാമ്പത്തിക സ്വാതന്ത്ര്യവും സുരക്ഷയും ഉറപ്പാക്കുന്നു. ഇതിനായി, ജീവനക്കാർ അവരുടെ ജോലി സമയത്ത് പ്രതിമാസം അല്ലെങ്കിൽ വാർഷിക അടിസ്ഥാനത്തിൽ നിക്ഷേപം നടത്തേണ്ടതുണ്ട്. വളരെ നേരത്തെ തുടങ്ങുകയും വർഷം തോറും സംഭാവനകൾ കൂട്ടുകയും ചെയ്യുന്നതിലൂടെ വിരമിക്കൽ സമയത്ത് വലിയൊരു തുക നേടാനാകും.

18 നും 70 നും ഇടയിൽ പ്രായമുള്ള ഏതൊരു പൗരനും നിക്ഷേപിക്കാവുന്ന പദ്ധതിയാണ് എൻപിഎസ്. ഈ സ്കീമിൽ എത്ര പണം നിക്ഷേപിച്ചാലും ആ പണം രണ്ട് ഭാഗങ്ങളായി വിഭജിക്കപ്പെടും. അതായത്, വിരമിക്കുമ്പോൾ തുകയുടെ 60 ശതമാനം ഒറ്റത്തവണയായി എടുക്കാം, 40 ശതമാനം ആന്വിറ്റിയിലേക്ക് പോകും. ഈ വാർഷിക തുകയിൽ നിന്നാണ് പെൻഷൻ ലഭിക്കുന്നത്.

75 വയസ് വരെ എൻപിഎസിൽ നിക്ഷേപിക്കാം. എൻപിഎസിൽ തുടർന്നും നിക്ഷേപം നടത്താനും നികുതി ആനുകൂല്യങ്ങൾ പ്രയോജനപ്പെടുത്താനും കഴിയും. എൻ‌പി‌എസ് നിക്ഷേപത്തിന് ഉയർന്ന പരിധിയില്ല. എന്നാൽ, നികുതി ലാഭിക്കൽ ലക്ഷ്യം വയ്ക്കുന്നുവെങ്കിൽ, പ്രതിവർഷം 2 ലക്ഷം രൂപ വരെയുള്ള നിക്ഷേപത്തിന് നികുതി ആനുകൂല്യം ലഭിക്കും.

വിരമിക്കുമ്പോൾ മൊത്തം കോർപ്പസിന്റെ 60% വരെ ഒറ്റത്തവണയായി പിൻവലിക്കാം, ബാക്കി 40% നിർബന്ധമായും ഒരു ആന്വിറ്റി പ്ലാനിൽ നിക്ഷേപിക്കണം. പുതിയ എൻപിഎസ് മാർഗനിർദ്ദേശങ്ങൾ പ്രകാരം, മൊത്തം കോർപ്പസ് 5 ലക്ഷം രൂപയോ അതിൽ കുറവോ ആണെങ്കിൽ, ഒരു ആന്വിറ്റി പ്ലാൻ വാങ്ങാതെ തന്നെ മുഴുവൻ തുകയും പിൻവലിക്കാം. ഈ പിൻവലിക്കലുകളും നികുതി രഹിതമാണ്.

1 ലക്ഷം പെൻഷൻ ലഭിക്കാൻ പ്രതിമാസം എത്ര നിക്ഷേപിക്കണം?

20 വയസിൽ പ്രതിമാസം 7,850 രൂപ നിക്ഷേപിക്കാൻ തുടങ്ങുകയും 60 വയസ്സിൽ വിരമിക്കുന്നതുവരെ 40 വർഷം നിക്ഷേപിക്കുകയും ചെയ്താൽ, പ്രതിമാസം 1 ലക്ഷം രൂപ പെൻഷനായി നേടാൻ സാധിക്കും. അതായത്, നിക്ഷേപത്തിൽനിന്നും പ്രതീക്ഷിക്കുന്ന വരുമാന നിരക്ക് 10 ശതമാനമാണെന്ന് കരുതുക. ആകെ നിക്ഷേപ തുക 37,68,000 രൂപയാണ്. നിക്ഷേപത്തിൽ നിന്നുള്ള പലിശ 4,62,89,792 രൂപയാണ്. നിങ്ങൾക്ക് കിട്ടുന്ന മൊത്തം തുക 5,00,57,792 രൂപയാണ്. ഇതിൽ 40 ശതമാനം അതായത്, 2,00,23,117 രൂപ ആന്വിറ്റിയിൽ നിക്ഷേപിക്കുക. 6% ആന്വിറ്റി നിരക്ക് കണക്കാക്കുമ്പോൾ നിങ്ങൾക്ക് പെൻഷനായി പ്രതിമാസം കിട്ടുന്ന തുക 1,00,116 രൂപയാണ്.

 അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.