കയ്യിൽ 5,400 രൂപയുണ്ടോ, 3.65 കോടി രൂപ നേടാൻ വഴിയുണ്ട്, ജോലി, ശമ്പളം ഒന്നും പ്രശ്നമല്ല, വിശദമായി അറിയാം

സ്ഥിരമായ നിക്ഷേപത്തിലൂടെ ഏതൊരാൾക്കും കോടീശ്വരനാകാൻ സാധിക്കുമൊ. അതെങ്ങനെ സാധിക്കുമെന്നാണ് നിങ്ങളുടെ ചോദ്യമെങ്കിൽ താഴെ പറയുന്ന മുഴുവൻ കാര്യങ്ങളും വായിക്കണം. സാമ്പത്തിക അച്ചടക്കവും, പ്രതിമാസം ഒരു നിശ്ചിത തുക നിക്ഷേപിക്കുകയും ചെയ്താൽ ഏത് മനുഷ്യനും കുറച്ച് കാലം കൊണ്ട് 1 കോടി രൂപയ്ക്ക് മുകളിൽ സമ്പാദ്യം കണ്ടെത്താൻ സാധിക്കും. എങ്ങനെയാണെന്ന് നമുക്ക് വിശദമായി നോക്കാം.

എസ്ഐപി അഥവാ സിസ്റ്റമാറ്റിക് ഇൻവെസ്റ്റ്മെന്‍റ് പ്ലാൻ

പുതിയ കാലത്ത് നിരവധി നിക്ഷേപ പദ്ധതികൾ നിലവിലുണ്ട്. അതിൽ എസ്ഐപി വഴിയുള്ള മ്യൂച്വൽ ഫണ്ട് നിക്ഷേപം ഏറ്റവും മികച്ചതാണ്. എസ്ഐപികൾ ഏതെങ്കിലും മ്യൂച്വൽ ഫണ്ടിൽ ഒരു നിശ്ചിത തുക സ്ഥിരമായ ഇടവേളയിൽ നിക്ഷേപിക്കാൻ അനുവദിക്കുന്നു. ആ തുക ഒരു പക്ഷെ 1000,2000,3000 അല്ലെങ്കിൽ 500 രൂപ വരയാകാം.

ശരാശരി 12 മുതൽ 15 ശതമാനം വരെ വരുമാനമാണ് പ്രതിവർഷം എസ്ഐപി നിക്ഷേപത്തിലൂടെ ലഭിക്കുക. അതോടൊപ്പം കൂട്ടുപലിശയുടെ ഗുണം കൂടി ലഭിക്കും എന്നതും എസ്ഐപി നിക്ഷേപത്തിന്‍റെ നേട്ടമാണ്.

സ്റ്റെപ്പ്-അപ്പ് എസ്ഐപി

നിരവധി എസ്ഐപി നിക്ഷേപ മാർഗങ്ങളുണ്ട്. എന്നാൽ സ്റ്റെപ്പ്-അപ്പ് എസ്ഐപികൾ കുറഞ്ഞ കാലത്തിനുള്ളിൽ കൂടുതൽ തുക കണ്ടെത്താൻ നിങ്ങളെ സഹായിക്കും. നിക്ഷേപകർ അവരുടെ എസ്ഐപി തുക ഓരോ വർഷവും ഒരു നിശ്ചിത ശതമാനം വർധിപ്പിക്കുക എന്നതാണ് സ്റ്റെപ്പ് അപ്പ് എസ്‌ഐ‌പി കൊണ്ട് ഉദ്ദേശിക്കുന്നത്.

1 കോടി രൂപ എങ്ങനെ കണ്ടെത്താം...?

നിങ്ങൾ എല്ലാ മാസവും 5,400 രൂപ എസ്ഐപി വഴി മ്യൂച്വൽ ഫണ്ടിൽ നിക്ഷേപിക്കുന്നു എന്ന് കരുതുക. അതായത് ഒരു വർഷം 64,800 രൂപ. ഈ നിക്ഷേപം നിങ്ങൾ 20 വർഷം തുടരുകയാണെങ്കിൽ സമ്പാദ്യമായി 49.67 ലക്ഷം രൂപ ലഭിക്കും. എന്നാൽ 25 വർഷമാണ് നിക്ഷേപ കാലാവധിയെങ്കിൽ 91.9 ലക്ഷം രൂപ നേടാം.

എന്നാൽ സ്റ്റെപ്പ്-അപ്പ് എസ്ഐപിയാണ് നിങ്ങൾ തിരഞ്ഞെടുക്കുന്നതെങ്കിൽ കൂടുതൽ തുക കണ്ടെത്താൻ സാധിക്കും. എല്ലാ വർഷവും നിക്ഷേപ തുകയിൽ 5 ശതമാനം വർധനവ് വരുത്തുക. അതായത് ആദ്യ വർഷം എല്ലാ വർഷവും 5,400 രൂപ. രണ്ടാം വർഷത്തിൽ എല്ലാ മാസവും 5,670 രൂപ നിക്ഷേപിക്കണം. വീണ്ടും, മൂന്നാം വർഷത്തിൽ, നിങ്ങളുടെ പ്രതിമാസ നിക്ഷേപം 5% വർദ്ധിപ്പിക്കണം. അതായത് എല്ലാ മാസവും 5,953.5 രൂപ നിക്ഷേപിക്കും.

20 വർഷം ഈ രീതിയിൽ നിക്ഷേപം ക്രമീകരിച്ചാൽ നിങ്ങൾക്ക് 68.87 ലക്ഷം രൂപ നേടാം. എന്നാൽ 5 വർഷത്തേക്ക് കൂടി നിക്ഷേപം തുടർന്നാൽ അതായത് 25 വർഷം കൊണ്ട് ലഭിക്കുന്ന തുക 1.34 കോടി രൂപയായിരിക്കും.

3.65 കോടി രൂപ നേടാം

മുകളിൽ പറഞ്ഞ രീതിയിൽ നിങ്ങൾ 10 ശതമാനം വർധനവ് എല്ലാ വർഷവും വരുത്തിയാൽ 25 വർഷം കൊണ്ട് 2.12 കോടി രൂപ നേടാം. എന്നാൽ എല്ലാ വർഷവും നിക്ഷേപ തുകയിൽ 15 ശതമാനം വർധനവ് വരുത്താൻ നിങ്ങൾക്ക് സാധിച്ചാൽ 25 വർഷം കൊണ്ട് ലഭിക്കുന്ന തുക എന്നത് 3.65 കോടി രൂപയായിരിക്കും.

ദീർഘകാല ലക്ഷ്യങ്ങൾക്ക് ഏറ്റവും അനുയോജ്യം

കുട്ടികളുടെ വിദ്യാഭ്യാസം, വിവാഹം, വസ്തു വാങ്ങൽ അല്ലെങ്കിൽ വിരമിക്കൽ തുടങ്ങിയ വിവിധ ദീർഘകാല ലക്ഷ്യങ്ങൾക്ക് എസ്ഐപി നിക്ഷേപം ഏറ്റവും അനുയോജ്യമാണ്. സ്റ്റെപ്പ്-അപ്പ് എസ്ഐപി പണപ്പെരുപ്പത്തിൻ്റെ പ്രതികൂല ആഘാതം നേരിടാൻ സഹായിക്കുക മാത്രമല്ല, ശമ്പള വർദ്ധനവ് പോലെയുള്ള വരുമാനത്തിലെ വർദ്ധനവിന് അനുസൃതമായി നിങ്ങളുടെ സമ്പാദ്യം വർദ്ധിപ്പിക്കാനും സഹായിക്കുന്നു.