കാലാവധിയ്ക്കു മുന്നേ കെ.എസ്.എഫ്.ഇ ചിട്ടി ക്ലോസ് ചെയ്താൽ വെറുതേ പൈസ കിട്ടും

കെ.എസ്.എഫ്.ഇ ഒരു വിശ്വാസ്യതയാണ്. ഏത് നിക്ഷേപവും കെ.എസ്.എഫ്.ഇയിൽ സുരക്ഷിതമാണെന്ന ചിന്തയിൽ നിന്നാണ് ജനങ്ങൾ കെ.എസ്.എഫ്.ഇയെ വിശ്വസിക്കുന്നത്. ഒരു ബാങ്ക് ഇതര ധനകാര്യ സ്ഥാപനമെന്ന നിലയിലും കേരള സർക്കാറിന്റെ നിയന്ത്രണത്തിൽ പ്രവർത്തിക്കുന്ന സ്ഥാപനം എന്ന നിലയിലും കെ.എസ്.എഫ്.ഇ സുരക്ഷിതമാണ്. കുറഞ്ഞ പലിശയിൽ മികച്ച നേട്ടം ഉറപ്പാക്കാനും സാധിക്കുന്നു. സാധാരണയായി ആളുകൾ കെ.എസ്.എഫ്.ഇയുടെ ചിട്ടികളിൽ നിക്ഷേപിക്കാനാണ് താത്പര്യം പ്രകടിപ്പിക്കാറ്. എന്നാൽ അതിനു പുറമേയും നിരവധി നിക്ഷേപ മാർ​ഗങ്ങൾ ഇവിടെയുണ്ട്.

കെ.എസ്.എഫ്.ഇയിൽ വിവിധ ചിട്ടികളുണ്ട്. ഓരോന്നും ഓരോ കാലാവധിയുള്ള ചിട്ടികളാണ്. മൊത്തം ചിട്ടിത്തുകയും കാലാവധിയുമെല്ലാം നിങ്ങളുടെ സാമ്പത്തിക ആവശ്യത്തിന് അനുസരിച്ചാണ് തിരഞ്ഞെടുക്കേണ്ടത്. ഒരു വലിയ തുകയുടെ നേട്ടത്തിനായി മാത്രം ചിട്ടിയിൽ ചേരുന്നവർക്ക് 1 കോടിയുടെ ചിട്ടിയോ അതിനു മുകളിലുള്ള ചിട്ടികളോ നല്ല ഓപ്ഷനായിരിക്കും. എന്നാൽ ഒരു സാധാരണക്കാരനെ സംബന്ധിച്ച് അത് താങ്ങാവുന്നതിലും വലുതാവും.

പലപ്പോഴും ആളുകളെ കെ.എസ്.എഫ്.ഇ ചിട്ടിയിൽ നിന്നും പിൻവലിക്കുന്നത് ഇതിന്റെ കാലാവധിയാണ്. 100 മാസം മുതൽ 120 മാസം വരെ കാലാവധിയുണ്ട്, 30, 40, 50 മാസത്തെ ചിട്ടികളുണ്ട്. 120 മാസം എന്ന് ചിന്തിക്കുമ്പോൾ ഏകദേശം 10 വർഷം വരും. ചിട്ടിയിൽ ചേർന്ന് ലേലം വിളിച്ച് ചിട്ടിത്തുക കിട്ടിയതിനു ശേഷം ഈ കാലാവധി കുറയുമോ? മാത്രമല്ല കാലാവധി പൂർത്തിയാവുന്നതിനു മുന്നേ ഈ ചിട്ടി ക്ലോസ് ചെയ്യാൻ സാധിക്കുമോ? അറിയാം....

ഉദാഹരണത്തിന് നിങ്ങളുടെ ചിട്ടി 40 മാസത്തെ കാലാവധിയുള്ള 2 ലക്ഷത്തിന്റെ ചിട്ടിയാണെന്ന് കരുതുക. ഇതിന്റെ പ്രതിമാസ തവണ 5000 രൂപയാണ്. ചിട്ടി ആരംഭിച്ച് തുടക്കത്തിൽ തന്നെ ലേലം വിളിച്ച് തുക ലഭിച്ചിട്ടുണ്ടെന്ന് കരുതാം. അതായത്, ചിട്ടിയുടെ മൂല്യത്തിന് അനുസൃതമായ ജാമ്യം വെച്ച് ആ തുക പിൻവലിച്ചു. ഏകദേശം 25 മാസത്തോളം ചിട്ടി തവണകൾ കൃത്യമായി പൂർത്തിയാക്കിയ ശേഷം ഈ ചിട്ടി ക്ലോസ് ചെയ്യാൻ പദ്ധതിയിടുന്നു.

ഇതു പ്രകാരം നിങ്ങൾക്ക് കാലാവധിയ്ക്കു മുന്നേ ചിട്ടി ക്ലോസ് ചെയ്യാൻ സാധിക്കും. അതിനു രണ്ട് മാർ​ഗങ്ങളുണ്ട്. ആ രണ്ട് മാർ​ഗങ്ങൾ എന്തെല്ലാമെന്ന് പരിശോധിക്കാം.

1. മുകളിൽ പറഞ്ഞതു പോലെ നിങ്ങൾ 25 മാസത്തെ തവണകൾ അടച്ചതിനാൽ ഇനി ബാക്കി 15 മാസത്തെ തവണകളുണ്ട്. അതായത് പ്രതിമാസം 5000 രൂപ കണക്കാക്കിയാൽ 15 മാസത്തേക്ക് 75,000 രൂപ. ഈ തുക ഒറ്റത്തവണയായി കെ.എസ്.എഫ്.ഇയിൽ അടച്ചാൽ ചിട്ടി ക്ലോസ് ചെയ്യാം. ഒപ്പം നിങ്ങൾ നൽകിയ ജാമ്യവും തിരിച്ചെടുക്കാം.

എന്നാൽ ഇത് മറ്റൊരു തരത്തിൽ ചിന്തിച്ചാൽ നഷ്ടമാണ്. കാരണം എല്ലാ മാസവും 5000 രൂപ തന്നെ അടക്കേണ്ടി വരില്ല. ഓരോ മാസത്തേയും കിഴിവ് അനുസരിച്ച് ഈ തുകയിൽ വ്യത്യാസം വരും. എന്നാൽ 15 മാസത്തെ ഒരുമിച്ച് അടക്കുമ്പോൾ ആ കിഴിവ് പ്രവചിക്കാൻ സാധിക്കില്ല. എന്നാൽ കാലാവധി പൂർത്തിയാവുമ്പോൾ ഒറ്റത്തവണയായി അടച്ച തുകയിൽ അധികമായി അടച്ച തുക കെ.എസ്.എഫ്.ഇയിൽ നിന്നും തിരികെ കിട്ടും.

2. രണ്ടാമത്തെ മാർ​ഗം അനുസരിച്ച് 15 മാസത്തേക്കുള്ള 75,000 രൂപ കെ.എസ്.എഫ്.ഇയുടെ സു​ഗമ സേവിം​ഗ്സ് അക്കൗണ്ടിൽ നിക്ഷേപിക്കുക. അതിലൂടെ ചിട്ടി ക്ലോസ് ചെയ്യുകയും ജാമ്യം തിരിച്ചെടുക്കുകയും ചെയ്യാം. ഈ സു​ഗമ സേവിം​ഗ്സ് അക്കൗണ്ടിൽ നിക്ഷേപിച്ച 75,000 ഓരോ മാസവും ഡെബിറ്റ് ചെയ്യാൻ സാധിക്കും. മാത്രമല്ല സു​ഗമ സേവിം​ഗ്സ് അക്കൗണ്ടിൽ ബാലൻസുള്ള തുകയ്ക്ക് പലിശ ലഭിക്കും.