ക്രെഡിറ്റ് കാർഡിന്റെ പലിശ നിരക്ക് കുറക്കാൻ എളുപ്പ മാർഗം; ഈ നാല് കാര്യങ്ങൾ ശ്രദ്ധിച്ചാൽ മതി...

ഇന്ത്യയിലെ ക്രെഡിറ്റ് കാർഡ് ഉപയോക്താക്കളുടെ എണ്ണം ക്രമാതീതമായി വർദ്ധിച്ചു വരുന്നുണ്ട്. ഒരു മികച്ച വായ്പാ മാർ​ഗമാണ് ക്രെഡിറ്റ് കാർഡ്. വ്യാപകമായിട്ട് ക്രെഡിറ്റ് കാർഡ് ഉപയോ​ഗിക്കുന്നുണ്ടെങ്കിലും ഇതിന് ഒരേ സമയം ​ഗുണവും ദോഷവും ഉണ്ട് എന്നതാണ് സത്യം. കൃത്യമായ രീതിയിൽ ക്രെഡിറ്റ് കാർഡുകൾ ഉപയോഗിച്ചില്ലെങ്കിൽ പ്രതികൂലമായി ബാധിക്കും. കാരണം ഇത്തരം വായ്പാ മാർ​ഗങ്ങൾ നൽകുന്ന മാർ​ഗ നിർദ്ദേശങ്ങളിൽ ഇതെല്ലാം പരാമർശിക്കും. എന്നാൽ പലപ്പോഴും ജനങ്ങൾ ഈ നിർദ്ദേശങ്ങളൊന്നും സ്വീകരിക്കാറില്ല.

ക്രെഡിറ്റ് കാർഡ് മുഖേന നിങ്ങളുടെ ബില്ലുകൾ അടയ്ക്കുന്നതിന് നിങ്ങൾക്ക് 40 മുതൽ 50 ദിവസം വരെ പലിശ രഹിത കാലയളവിന് അർഹതയുണ്ട്. എന്നാൽ ഈ ദിവസങ്ങളിൽ നിങ്ങളുടെ ക്രെഡിറ്റ് കാർഡ് ബിൽ ക്ലിയർ ചെയ്യുന്നില്ലെങ്കിലോ ഏറ്റവും കുറഞ്ഞ തുക മാത്രം അടക്കുകയാണെങ്കിലോ ഇടപാട് തീയതി മുതൽ നിങ്ങൾക്ക് പലിശ അടയ്‌ക്കേണ്ടി വരും.

ക്രെഡിറ്റ് കാർഡുകളുടെ പലിശ നിരക്ക് ക്രെഡിറ്റ് കാർഡ് സ്റ്റേറ്റ്‌മെൻ്റിലെ വാർഷിക ശതമാന നിരക്ക് പ്രതിനിഥീകരിക്കുന്നു. നിബന്ധനകൾ സൂചിപ്പിക്കുന്നത് പോലെ, ഇത് മാസത്തേക്കാളും വർഷം മുഴുവനും ബാധകമാണ്.

‍ഡെബിറ്റ് കാർഡ് പോലെയല്ല ക്രെഡിറ്റ് കാർഡ്. ഡെബിറ്റ് കാർഡുകൾ വഴി ഉപയോഗിക്കുന്നത് നിങ്ങളുടെ അക്കൗണ്ടിലുള്ള പണമാണ്. എന്നാൽ ക്രെഡിറ്റ് കാർഡ് ഉപയോ​ഗിച്ച് എടുക്കുന്ന ഓരോ രൂപയും തിരിച്ചടയ്ക്കാൻ നിങ്ങൾ ബാധ്യസ്ഥരാണ്. ക്രെഡിറ്റ് കാർഡിലൂടെ എടുക്കുന്ന ഓരോ രൂപയും വായ്പയാണ്.

ഒരു ക്രെഡിറ്റ് കാർഡിനായി അപേക്ഷിക്കുമ്പോൾ നിരവധി നിബന്ധനകളും നിർദ്ദേശങ്ങളും പാലിക്കേണ്ടതുണ്ട്. അതിൽ ഏറ്റവും ശ്രദ്ധിക്കേണ്ട കാര്യങ്ങളാണ് വാർഷിക ഫീസ്, പലിശ നിരക്ക്, ഓവർ ലിമിറ്റ് ഫീസ്, അന്താരാഷ്ട്ര ഇടപാടുകൾ, ലേറ്റ് പേയ്മെന്റ് ഫീസ് എന്നിവ. പലിശ നിരക്കിലെ വ്യതിയാനങ്ങൾ ശ്രദ്ധിക്കേണ്ട വിഷയമാണ്. അതിനാൽ തന്നെ പലിശ നിരക്ക് ലാഭിക്കാനായി എന്തെല്ലാം ചെയ്യേണ്ടതുണ്ടെന്ന് പരിശോധിക്കാം.

പലിശ നിരക്ക് ലാഭിക്കാൻ ചെയ്യേണ്ട കാര്യങ്ങൾ

1) ആദ്യം ശ്രദ്ധിക്കേണ്ട കാര്യമാണ് നിങ്ങളുടെ ക്രെഡിറ്റ് കാർഡ് ബിൽ കൃത്യസമയത്ത് അടക്കുക എന്നത്. ഓരോ ബാങ്കും പലിശ രഹിത ഗ്രേസ് പിരീഡ് നൽകുന്നു, ഈ കാലയളവിൽ പലിശ നൽകേണ്ടതില്ല.

2) കുറഞ്ഞ കുടിശ്ശിക അടയ്ക്കാതിരിക്കുക. അതായത് കുറഞ്ഞ തുക അടക്കുമ്പോൾ ഇടപാട് തീയതി മുതൽ മുഴുവൻ കാലയളവിലും മുഴുവൻ തുകയ്‌ക്കും പലിശ ഈടാക്കും.

3) ക്രെഡിറ്റ് കാർഡിന് അപേക്ഷിക്കുന്നതിന് മുമ്പ് അവർ നൽകുന്ന പലിശ നിരക്ക് ഏതെന്ന് പരിശോധിക്കുക. ചില ബാങ്കുകൾ വാർഷിക ഫീസ് ഈടാക്കുന്നുണ്ടെങ്കിലും പലിശ നിരക്ക് കൂടുതലായിരിക്കും.

4) ക്രെഡിറ്റിൽ ഈടാക്കുന്ന പലിശ നിരക്കിന് വിപരീത അനുപാതത്തിലുള്ള ഉയർന്ന ക്രെഡിറ്റ് സ്കോർ സൂക്ഷിക്കുക.

ഈ കാര്യങ്ങളെല്ലാം കൃത്യമായി പാലിച്ചാൽ ക്രെഡിറ്റ് കാർഡ് ഉപയോ​ഗത്തിലൂടെ മികച്ച സേവനം ലഭിക്കും. മാത്രമല്ല ഇത്രയും കാര്യങ്ങൾ പാലിച്ചാൽ നല്ല ക്രെഡിറ്റ് സ്കോർ നിലനിർത്താനും സാധിക്കും.