ഹോം ലോൺ: ഇങ്ങനെ ചെയ്താൽ 15 ലക്ഷം ലാഭം, കാലാവധി 5 വർഷം കുറയും

സ്വന്തമായൊരു വീട് എന്നത് ഏതൊരാളുടെയും സ്വപ്നമാണ്. ഇന്നത്തെ കാലത്ത് സാമ്പത്തികമായ വലിയ ബാധ്യതകളില്ലാതെ ഈ സ്വപ്നം സാക്ഷാത്കരിക്കാൻ ഭവന വായ്പകൾ വലിയ പങ്കുവഹിക്കുന്നു. എന്നാൽ, വീട് പണിയാനോ വാങ്ങാനോ എടുത്ത ഭവന വായ്പയുടെ തിരിച്ചടവ് പലപ്പോഴും വലിയൊരു ബാധ്യതയായി മാറാറുണ്ട്. 20-25 വർഷത്തെ വായ്പാ കാലാവധി എന്നത് കേൾക്കുമ്പോൾ തന്നെ പലർക്കും ആശങ്കയാണ്. എന്നാൽ നിസാരമെന്നു തോന്നുന്ന ഒരു ചെറിയ മാറ്റത്തിലൂടെ ലക്ഷക്കണക്കിന് രൂപ ലാഭിക്കാനും ലോൺ കാലാവധി വർഷങ്ങളോളം കുറയ്ക്കാനും സാധിക്കുമെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.

ആർബിഐ പലിശ നിരക്കുകളിൽ മാറ്റം വരുത്താത്ത സാഹചര്യത്തിൽ, പുതിയ ഇളവുകൾക്കായി കാത്തിരിക്കുന്നതിനേക്കാൾ നിലവിലുള്ള ഭവന വായ്പകൾ മികച്ച രീതിയിൽ ക്രമീകരിക്കാൻ വായ്പക്കാർക്ക് ലഭിക്കുന്ന നല്ലൊരു ഘട്ടമാണിത്. ആകെ അടച്ചുതീർക്കേണ്ട പലിശ കുറയ്ക്കുന്നതിലായിരിക്കണം ശ്രദ്ധ കേന്ദ്രീകരിക്കേണ്ടത്. പലിശ നിരക്കുകളിൽ മാറ്റമില്ലാത്ത സാഹചര്യത്തിൽ, നിലവിലുള്ള ഇഎംഐ തന്നെ തുടരുന്നത് വായ്പാ കാലാവധി വേഗത്തിൽ കുറയ്ക്കാൻ സഹായിക്കും. ബോണസുകളോ വാർഷിക ശമ്പള വർദ്ധനവോ ഉപയോഗിച്ച് വായ്പയുടെ ഒരു ഭാഗം മുൻകൂട്ടി അടയ്ക്കുന്നത് കാലക്രമേണ പലിശ ബാധ്യത കുറയ്ക്കാൻ ഉപകരിക്കും.

ഒരു അധിക ഇഎംഐയുടെ മാജിക്

50 ലക്ഷം രൂപ 8.5% പലിശ നിരക്കിൽ 25 വർഷത്തേക്ക് ലോൺ എടുത്ത ഒരാൾ വർഷത്തിൽ ഒരു അധിക ഇഎംഐ (അതായത് വർഷം 12 ഇഎംഐക്ക് പകരം 13 തവണ) അടയ്ക്കുകയാണെങ്കിൽ ഏകദേശം 5 വർഷത്തോളം ലോൺ കാലാവധി കുറയ്ക്കാൻ ഇതിലൂടെ സാധിക്കും. വായ്പാ കാലാവധിയിലുടനീളം നൽകേണ്ടി വരുന്ന പലിശയിൽ ഏകദേശം 15 ലക്ഷം രൂപയോളം ലാഭിക്കാൻ ഈ ഒരു അധിക തവണയിലൂടെ സാധിക്കും.

ജോലിയിൽ നിന്ന് ലഭിക്കുന്ന ബോണസ്, ഇൻക്രിമെന്റ് അല്ലെങ്കിൽ മറ്റ് അധിക വരുമാനങ്ങൾ എന്നിവ ലോൺ പ്രീ-പെയ്‌മെന്റിനായി ഉപയോഗിക്കാവുന്നതാണ്. ഇഎംഐ തുക കുറയ്ക്കുന്നതിനേക്കാൾ, ലോൺ കാലാവധി കുറയ്ക്കുന്നതിനായിരിക്കണം മുൻഗണന നൽകേണ്ടത്.

വായ്പക്കാർ ശ്രദ്ധിക്കേണ്ട മറ്റ് കാര്യങ്ങൾ

നിങ്ങളുടെ ലോൺ 'എക്സ്റ്റേണൽ ബെഞ്ച്മാർക്ക്' പ്രകാരമാണോ എന്ന് ഉറപ്പുവരുത്തുക. ഇത് പലിശ കുറയുമ്പോൾ അതിന്റെ ഗുണം വേഗത്തിൽ ലഭിക്കാൻ സഹായിക്കും. നിലവിലെ ബാങ്കിനേക്കാൾ കുറഞ്ഞ നിരക്കിൽ മറ്റ് ബാങ്കുകൾ ലോൺ നൽകുന്നുണ്ടെങ്കിൽ ലോൺ അവിടേക്ക് മാറ്റുന്നതിനെക്കുറിച്ച് ആലോചിക്കാവുന്നതാണ്. (0.50% മുതൽ 0.75% വരെ വ്യത്യാസമുണ്ടെങ്കിൽ മാത്രം മാറ്റുന്നത് ലാഭകരമാകൂ). നിങ്ങളുടെ വരുമാനത്തിലോ ക്രെഡിറ്റ് സ്കോറിലോ പുരോഗതി ഉണ്ടായിട്ടുണ്ടെങ്കിൽ ബാങ്കുമായി സംസാരിച്ച് പലിശ നിരക്കിൽ ഇളവ് ആവശ്യപ്പെടാവുന്നതാണ്.

കൃത്യമായ ആസൂത്രണത്തോടെ ഭവന വായ്പ എടുത്താൽ സാമ്പത്തിക പ്രയാസങ്ങളില്ലാതെ നിങ്ങളുടെ സ്വപ്ന ഭവനം സ്വന്തമാക്കാം. ലോൺ അടച്ചുതീർക്കാൻ വർഷങ്ങളോളം കാത്തിരിക്കുന്നതിന് പകരം, ചെറിയ തുകകൾ മുൻകൂട്ടി അടയ്ക്കുന്നതിലൂടെ സാമ്പത്തിക സ്വാതന്ത്ര്യം വേഗത്തിൽ കൈവരിക്കാൻ സാധിക്കും.