റിട്ടയർമെന്റ് ഫണ്ട് എങ്ങനെ സുരക്ഷിതമാക്കാം? മാസ വരുമാനം ഉറപ്പാക്കാൻ 'ത്രീ-ബക്കറ്റ് സ്ട്രാറ്റജി'

കഷ്ടപ്പെട്ട് ജോലി ചെയ്ത്, ഓരോ മാസവും കൃത്യമായി നിക്ഷേപം നടത്തി നിങ്ങളൊരു വലിയ റിട്ടയർമെന്റ് ഫണ്ട് ഉണ്ടാക്കിയെടുത്തിട്ടുണ്ടാകാം. വിശ്രമജീവിതത്തിൽ ഈ സമ്പാദ്യത്തിൽ നിന്ന് മാസം തോറും നിശ്ചിത തുക പിൻവലിക്കാനും ബാക്കി തുക വളരാൻ അനുവദിക്കാനുമാണ് മിക്കവരും ആഗ്രഹിക്കുന്നത്.

എന്നാൽ ആഗോള യുദ്ധങ്ങളും സാമ്പത്തിക പ്രതിസന്ധികളും കാരണം ഓഹരി വിപണി തകരുമ്പോൾ പലരും ആശങ്കയിലാകുന്നു. വിപണി ഇടിയുമ്പോൾ കയ്യിലുള്ള നിക്ഷേപം വേഗത്തിൽ തീരുമോ എന്ന പേടി സ്വാഭാവികമാണ്. വിപണിയിലെ ഇത്തരം ചാഞ്ചാട്ടങ്ങളിൽ നിന്ന് നിങ്ങളുടെ റിട്ടയർമെന്റ് ഫണ്ടിനെ സംരക്ഷിക്കാൻ സാമ്പത്തിക വിദഗ്ധർ നിർദ്ദേശിക്കുന്ന ഒരു പ്രധാന രീതിയാണ് 'ത്രീ-ബക്കറ്റ് സ്ട്രാറ്റജി'.

എന്താണ് ത്രീ-ബക്കറ്റ് സ്ട്രാറ്റജി?

മുഴുവൻ പണവും സുരക്ഷിതമായ നിക്ഷേപങ്ങളിൽ മാത്രം ഇട്ടാൽ പണപ്പെരുപ്പത്തെ മറികടക്കാൻ കഴിയില്ല. എന്നാൽ മുഴുവൻ പണവും ഓഹരികളിൽ ഇട്ടാൽ വിപണി ഇടിയുമ്പോൾ അത് വലിയ നഷ്ടമുണ്ടാക്കും. ഈ രണ്ട് പ്രശ്നങ്ങൾക്കും പരിഹാരമാണ് ത്രീ ബക്കറ്റ് സ്ട്രാറ്റജി.

1. സേഫ്റ്റി ബക്കറ്റ്: സുരക്ഷയ്ക്ക് മുൻഗണന

അടുത്ത 1 മുതൽ 3 വർഷത്തേക്കുള്ള നിങ്ങളുടെ നിത്യജീവിത ചെലവുകൾക്കുള്ള പണമാണ് ഇതിൽ സൂക്ഷിക്കേണ്ടത്. ഈ പണം ഒരു സേവിംഗ്സ് അക്കൗണ്ടിലോ ലിക്വിഡ് ഫണ്ടിലോ നിക്ഷേപിക്കാം. സേവിംഗ്സ് അക്കൗണ്ടിലുള്ള പണം യുപിഐ, ഡെബിറ്റ് കാർഡ്, എടിഎം പിൻവലിക്കലുകൾ, ഫണ്ട് ട്രാൻസ്ഫർ എന്നിവയിലൂടെ ഉടനടി ലഭ്യമാകും.

പല ലിക്വിഡ് ഫണ്ടുകളും 'ഇൻസ്റ്റാ-റിഡംപ്ഷൻ' അല്ലെങ്കിൽ സമാനമായ പേരിൽ ഉടനടി പണം പിൻവലിക്കാനുള്ള സൗകര്യം നൽകുന്നുണ്ട്. ഈ സൗകര്യം പ്രകാരം, സാധാരണയായി ഒരു നിക്ഷേപകന് 50,000 വരെയോ അല്ലെങ്കിൽ ഫണ്ട് മൂല്യത്തിന്റെ 90 ശതമാനമോ (ഏതാണോ കുറവ് അത്) ഉടനടി പിൻവലിക്കാൻ സാധിക്കും. ഈ പരിധി സാധാരണയായി ഒരു നിക്ഷേപകന് ഒരു സ്കീമിൽ ഒരു ദിവസം ലഭിക്കുന്നതാണ്. പിൻവലിക്കുന്ന പണം 30 മിനിറ്റിനുള്ളിൽ നിക്ഷേപകന്റെ ബാങ്ക് അക്കൗണ്ടിലേക്ക് എത്തുന്നതാണ്.

2. സേവിംഗ്സ് ബക്കറ്റ്: സ്ഥിരതയുള്ള വളർച്ച

അടുത്ത 3 മുതൽ 7 വർഷത്തിനുള്ളിൽ ആവശ്യമായി വന്നേക്കാവുന്ന തുക ഈ ബക്കറ്റിൽ സൂക്ഷിക്കാം. ബാലൻസ്ഡ് ഹൈബ്രിഡ് ഫണ്ടുകൾ, ഡൈനാമിക് അസറ്റ് അലോക്കേഷൻ ഫണ്ടുകൾ, അല്ലെങ്കിൽ മൾട്ടി-അസറ്റ് അലോക്കേഷൻ ഫണ്ടുകൾ എന്നിവ ഇതിനായി തിരഞ്ഞെടുക്കാം. ഓഹരി വിപണിയിലെ അമിതമായ റിസ്ക് ഒഴിവാക്കിക്കൊണ്ടുതന്നെ ബാങ്ക് പലിശയെക്കാൾ മികച്ച വരുമാനം ഇത് നൽകും. സേഫ്റ്റി ബക്കറ്റിലെ പണം തീരുമ്പോൾ ഇതിൽ നിന്ന് അങ്ങോട്ട് മാറ്റാം.

3. വെൽത്ത് ബക്കറ്റ്: ദീർഘകാല വളർച്ച

സുരക്ഷിതത്വത്തിനായുള്ള തുകയും സമ്പാദ്യത്തിനായുള്ള തുകയും മാറ്റിവെച്ചതിനുശേഷം ബാക്കിയുള്ള പണം വെൽത്ത് ബക്കറ്റിൽ നിലനിർത്താം. ഏഴ് വർഷത്തിൽ കൂടുതൽ നിക്ഷേപിക്കാൻ സാധിക്കുന്ന തുകയാണ് ഈ ബക്കറ്റിൽ ഉൾപ്പെടുത്തേണ്ടത്. ഈ തുക നിങ്ങൾക്ക് താഴെ പറയുന്ന ഇക്വിറ്റി മ്യൂച്വൽ ഫണ്ട് സ്കീമുകളിൽ നിക്ഷേപിക്കാവുന്നതാണ്. ദീർഘകാലാടിസ്ഥാനത്തിൽ പണം വലിയ രീതിയിൽ വളരാൻ ഇത് സഹായിക്കും. വിപണിയിൽ താൽക്കാലികമായി ഇടിവുണ്ടായാലും നിങ്ങൾക്ക് ഉടനെ പണം പിൻവലിക്കേണ്ട ആവശ്യമില്ലാത്തതിനാൽ പേടിക്കേണ്ടതില്ല. വിപണി തിരിച്ചു കയറുന്നത് വരെ ശാന്തമായി കാത്തിരിക്കാം.

ഈ തന്ത്രത്തിന്റെ ഗുണങ്ങൾ

വിപണി ഇടിയുമ്പോൾ നിങ്ങളുടെ അടുത്ത മാസത്തെ ചെലവിനുള്ള പണം സേഫ്റ്റി ബക്കറ്റിൽ സുരക്ഷിതമായതിനാൽ പരിഭ്രാന്തരാകേണ്ടി വരില്ല. നിങ്ങളുടെ ആവശ്യാനുസരണം ഓരോ ബക്കറ്റിലുമുള്ള തുക ക്രമീകരിക്കാം. വെൽത്ത് ബക്കറ്റിലെ നിക്ഷേപം പണപ്പെരുപ്പത്തെക്കാൾ ഉയർന്ന ആദായം നൽകാൻ സഹായിക്കും.