സേവിംഗ്‌സ് അക്കൗണ്ടുകളില്‍ ഉയര്‍ന്ന പലിശ നിരക്ക് നല്‍കുന്ന പൊതുമേഖലാ ബാങ്കുകള്‍ ഐഡിബിഐ ബാങ്കും, പിഎന്‍ബിയും

സ്ഥിര നിക്ഷേപങ്ങളെക്കാള്‍ പൊതുവേ കുറഞ്ഞ പലിശ നിരക്കാണ് സേവിംഗ്‌സ് ബാങ്ക് അക്കൗണ്ടുകളില്‍ ലഭിക്കാറ്. ഉയര്‍ന്ന ഒരു തുക നിങ്ങള്‍ക്ക് സേവിംഗ്‌സ് അക്കൗണ്ടില്‍ സൂക്ഷിക്കുവാന്‍ പദ്ധതിയുണ്ടെങ്കില്‍ തീര്‍ച്ചയായും നിങ്ങള്‍ ബാങ്കുകള്‍ വാഗ്ദാനം ചെയ്യുന്ന പലിശ നിരക്കും അതുവഴി നിങ്ങള്‍ക്ക് ലഭിക്കുന്ന ആദായവും വിലയിരുത്തേണ്ടതുണ്ട്. പൊതുമേഖലാ ബാങ്കുകളെക്കാളും ഉയര്‍ന്ന പലിശ നിരക്ക് സ്വകാര്യ ബാങ്കുകളും സ്‌മോള്‍ ഫിനാന്‍സ് ബാങ്കുകളും വാഗ്ദാനം ചെയ്യുന്നുണ്ട്. എന്നാല്‍ ഭൂരിഭാഗം പേരും പൊതുമേഖലാ ബാങ്കുകളെ തന്നെയാണ് സേവിംഗ്‌സ് ്ക്കൗണ്ട് നിക്ഷേപങ്ങള്‍ നടത്തുവാനായി തിരഞ്ഞെടുക്കാറ്.

പലിശ നിരക്ക്

ഐഡിബിഐ ബാങ്ക് 3 ശതമാനം മുതല്‍ 3.50 ശതമാനം വരെയാണ് സേവിംഗ്‌സ് ബാങ്ക് അക്കൗണ്ടുകളില്‍ പലിശ നിരക്കായി വാഗ്ദാനം ചെയ്യുന്നത്. 500 രൂപ മുതല്‍ 5000 രൂപ വരെയാണ് അക്കൗണ്ടുകളില്‍ ആവശ്യമായ മിനിമം ബാലന്‍സ് തുക. പഞ്ചാബ് നാഷണല്‍ ബാങ്കും ഐഡിബിഐ ബാങ്കിന് സമാനമായി 3 ശതമാനം മുതല്‍ 3.50 ശതമാനം വരെയാണ് പലിശ നിരക്ക് വാഗ്ദാനം ചെയ്യുന്നത്. 500 രൂപ മുതല്‍ 2000 രൂപ വരെയാണ് അക്കൗണ്ടുകളില്‍ ആവശ്യമായ മിനിമം ബാലന്‍സ് തുക. 2.90 ശതമാനം മുതല്‍ 3.20 ശതമാനം വരെയാണ് കാനറ ബാങ്ക് സേവിംഗ്‌സ് അക്കൗണ്ടുകളില്‍ വാഗ്ദാനം ചെയ്യുന്ന പലിശ നിരക്ക്. 500 മുതല്‍ 1000 രൂപ വരെയാണ് അക്കൗണ്ടില്‍ ആവശ്യമായ മിനിമം ബാലന്‍സ് തുക.

പലിശ നിരക്ക് പൊതുമേഖലാ ബാങ്കുകളില്‍

ബാങ്ക് ഓഫ് ബറോഡയില്‍ 2.75 ശതമാനം മുതല്‍ 3.20 ശതമാനം വരെയാണ് സേവിംഗ്‌സ് ബാങ്ക് അക്കൗണ്ടുകളിലെ പലിശ നിരക്ക്. 500 മുതല്‍ 2000 രൂപ വരെയാണ് ആവശ്യമായ മിനിമം ബാലന്‍സ് തുക. പഞ്ചാബ് സിന്ധ് ബാങ്കില്‍ 3.10 ശതമാനമാണ് പലിശ നിരക്ക്. 500 മുതല്‍ 1000 രൂപ വരെ മിനിമം ബാലന്‍സായി വേണം. ഇന്ത്യന്‍ ഓവര്‍സീസ് ബാങ്കില്‍ 3.05 ശതമാനമാണ് സേവിംഗ്‌സ് ബാങ്ക് അക്കൗണ്ടുകള്‍ക്ക് നല്‍കി വരുന്ന പലിശ നിരക്ക്. യൂണിയന്‍ ബാങ്ക് 3.00 ശതമാനം പലിശ നിരക്കാണ് സേവിംഗ്‌സ് അക്കൗണ്ടുകള്‍ക്ക് പലിശയായി നല്‍കുന്നത്.

താരതമ്യേന കുറഞ്ഞ പലിശ നിരക്ക്

2.75 ശതമാനം മുതല്‍ 2.90 ശതമാനം വരെയാണ് സെന്‍ട്രല്‍ ബാങ്ക് ഓഫ് ഇന്ത്യയില്‍ സേവിംഗ്‌സ് അക്കൗണ്ടുകളില്‍ ലഭിക്കുന്ന പലിശ നിരക്ക്. ബാങ്ക് ഓഫ് ഇന്ത്യയിലും ഇന്ത്യന്‍ ബാങ്കിലും 2.90 ശതമാനം പലിശ നിരക്കും ലഭിക്കുന്നു. എന്നാല്‍ മിക്ക മുന്‍നിര പൊതുമേഖലാ ബാങ്കുകളും ചെറിയ പലിശ നിരക്കാണ് ഉപയോക്താക്കള്‍ക്ക് നല്‍കുന്നത്. സ്‌റ്റേറ്റ് ബാങ്ക് ഓഫ് ഇന്ത്യ 2.70 ശതമാനമാണ് സേവിംഗ്‌സ് അക്കൗണ്ടുകളില്‍ നല്‍കുന്ന പലിശ നിരക്ക്. യുകോ ബാങ്ക് നല്‍കുന്നത് 2.50 ശതമാനം പലിശയാണ്.

സ്‌മോള്‍ ഫിനാന്‍സ് ബാങ്കുകളില്‍

പൊതുമേഖലാ ബാങ്കുകളെക്കാളും ഉയര്‍ന്ന പലിശ നിരക്കാണ് സ്‌മോള്‍ ഫിനാന്‍സ് ബാങ്കുകള്‍ സേവിംഗ്‌സ് അക്കൗണ്ടുകളില്‍ നല്‍കുന്നതിന്. ഉദാഹരണത്തിന് എയു സ്‌മോള്‍ ഫിനാന്‍സ് ബാങ്ക്, ഇക്വിറ്റാസ് സ്‌മോള്‍ ഫിനാന്‍സ് ബാങ്ക്, ഉജ്ജീവന്‍ സ്‌മോള്‍ ഫിനാന്‍സ് ബാങ്ക് എന്നീ സ്ഥാപനങ്ങള്‍ 7 ശതമാനം വരെ പലിശ നിരക്ക് സേവിംഗ്‌സ് അക്കൗണ്ടുകളില്‍ നല്‍കി വരുന്നുണ്ട്.