രണ്ട് വർഷത്തിനുള്ളിൽ സ്വർണ വില 68,000 രൂപയിലേയ്ക്ക്, കാരണം എന്തെന്ന് അല്ലേ?

നിലവിലെ ഇരുണ്ട സാമ്പത്തിക വീക്ഷണത്തിനും തുടർച്ചയായ അനിശ്ചിതത്വത്തിനും ഇടയിൽ ഏതെങ്കിലും ഒരു അസറ്റ് ക്ലാസ് കുതിച്ചുയരുന്നുണ്ടെങ്കിൽ അത് സ്വർണം മാത്രമാണ്. ആഭ്യന്തര വില റെക്കോർഡ് ഉയരത്തിൽ നിൽക്കുമ്പോഴും, മഞ്ഞ ലോഹത്തിന്റെ വില വീണ്ടും വർദ്ധിക്കുമെന്ന് വിശകലന വിദഗ്ധർ പറയുന്നു. എംസിഎക്സ് ഓഗസ്റ്റിൽ സ്വർണ്ണ ഫ്യൂച്ചർ ഇന്ന് 10 ഗ്രാമിന് 48,589 രൂപയായി ഉയർന്നു. ഇന്നലെ 48,232 രൂപയായിരുന്നു വില.

അന്താരാഷ്ട്ര നാണയ നിധി പ്രവചനം

ഈ പ്രവണത സ്വർണ്ണത്തിന് ഗുണകരമാകാനാണ് സാധ്യത. ആഗോള സാമ്പത്തിക പ്രവചനങ്ങൾ വെട്ടിക്കുറച്ച ഐ‌എം‌എഫും (അന്താരാഷ്ട്ര നാണയ നിധി) സ്വർണ വില ഉയരുമെന്ന സൂചനകളാണ് നൽകുന്നത്. വൈറസ് ബാധിച്ച ലോക സമ്പദ്‌വ്യവസ്ഥയ്ക്ക് രണ്ട് മാസം മുമ്പ് പ്രതീക്ഷിച്ചതിലും ആഴത്തിലുള്ള മാന്ദ്യമാണ് അന്താരാഷ്ട്ര നാണയ നിധി പ്രവചിച്ചിരിക്കുന്നത്. ആഗോള ഉൽ‌പാദനം 4.9 ശതമാനമായി ചുരുങ്ങുമെന്നും ഐഎംഎഫ് വ്യക്തമാക്കിയിട്ടുണ്ട്.

കേസുകൾ കുതിച്ചുയരുന്നു

കോവിഡ് -19 ലോക്ക്ഡൌണിന്റെയും സാമ്പത്തിക പുനരുജ്ജീവനത്തിന്റെയും പശ്ചാത്തലത്തിൽ ഏപ്രിലിൽ കണക്കാക്കിയ 1.9 വിപുലീകരണത്തിൽ നിന്ന് നടപ്പ് സാമ്പത്തിക വർഷത്തെ ഇന്ത്യയുടെ വളർച്ചാ നിരക്ക് മൈനസ് 4.5 ശതമാനമായി കുറച്ചു. അതേസമയം, കോവിഡ് -19 ന്റെ ആഗോള കേസുകൾ 9 മില്ല്യൺ കവിഞ്ഞു. ബ്രസീലും ഇന്ത്യയും അണുബാധയിൽ റെക്കോർഡ് വർദ്ധനവാണ് രേഖപ്പെടുത്തുന്നത്. യുഎസും ചൈനയും ഉൾപ്പെടെ നിരവധി രാജ്യങ്ങൾ പുതിയ പകർച്ചവ്യാധികൾ റിപ്പോർട്ട് ചെയ്യുന്നുണ്ട്.

രണ്ട് മാസത്തിനുള്ളിൽ

ഇന്ത്യയും ചൈനയും തമ്മിലുള്ള അടുത്തിടെയുണ്ടായ അതിർത്തി ഏറ്റുമുട്ടലുകളും നിക്ഷേപകരെ സ്വർണത്തിലേയ്ക്ക് നയിച്ചു. ഡോളർ സൂചികയിലെ ബലഹീനതയും യുഎസ് ബോണ്ട് വരുമാനവും വിലകളെ പിന്തുണയ്ക്കുന്ന ഘടകങ്ങളാണെന്നാണ് വിദഗ്ധരുടെ അഭിപ്രായം. എല്ലാ വശങ്ങളും സ്വർണ്ണ വിലയ്ക്ക് അനുയോജ്യമായതിനാൽ, അടുത്ത ഒന്നോ രണ്ടോ മാസത്തിനുള്ളിൽ സ്വർണ വില 50,000 മുതൽ 51,000 രൂപ വരെയെത്തുമെന്നാണ് വിലയിരുത്തൽ.

ആഗോള വിപണി

ആഗോള വിപണിയിൽ സ്‌പോട്ട് സ്വർണം 12 ൺസിന് 0.3 ശതമാനം ഉയർന്ന് 1,772.43 ഡോളറിലെത്തി. 2012 ഒക്ടോബറിന് ശേഷം ഏറ്റവും ഉയർന്ന നിരക്കായ 1,779.06 ഡോളർ വരെ സ്വർണ വില ഉയർന്നിരുന്നു. സമ്പദ്‌വ്യവസ്ഥ വീണ്ടെടുക്കാൻ കൂടുതൽ സമയമെടുക്കും, കുറഞ്ഞത് രണ്ട് വർഷമെങ്കിലും അതുകൊണ്ട് തന്നെ സ്വർണ വില ഉയരാനാണ് സാധ്യതയെന്നും സാമ്പത്തിക വിദഗ്ധർ പറയുന്നു.

രണ്ട് വർഷത്തിനിടെ

അടുത്ത 18-24 മാസങ്ങളിൽ സ്വർണ്ണ വില 65,000-68,000 രൂപയിലെത്തുമെന്ന് മോട്ടിലാൽ ഓസ്വാൾ ഫിനാൻഷ്യൽ സർവീസസിന്റെ അസോസിയേറ്റ് ഡയറക്ടറും കമ്മോഡിറ്റീസ് ആൻഡ് കറൻസികളുടെ തലവനുമായ കിഷോർ നാർണെ പറയുന്നു, എന്നാൽ ഇത് യുഎസ് ഡോളറിനെതിരായ രൂപയുടെ വ്യതിയാനത്തെ ആശ്രയിച്ചിരിക്കും. കൊവിഡ് -19 മഹാമാരി പിൻവാങ്ങിയതിനുശേഷവും, മഞ്ഞ ലോഹം മികച്ച വരുമാനം രേഖപ്പെടുത്തുന്നത് തുടരാമെന്നും നിരീക്ഷകർ പറയുന്നു.