നികുതി ലാഭിക്കാനുള്ള നിക്ഷേപങ്ങൾ ആരംഭിക്കാൻ ഇനി 24 ദിവസം മാത്രം ബാക്കി: നിങ്ങൾ എന്ത് തീരുമാനിച്ചു?

2024-25 സാമ്പത്തിക വർഷത്തെ ഇൻകം ടാക്സ് ഇളവ് ആവശ്യപ്പെടാൻ നിങ്ങൾക്ക് 2025 മാർച്ച് 31 വരേ മാത്രമേ ഇനി സമയമുള്ളൂ. ഇതിന് മുൻപായി ടാക്സ് സേവിങ് നിക്ഷേപങ്ങൾ പൂർത്തിയാക്കിയില്ലെങ്കിൽ നിങ്ങൾക്ക് 80 സി പ്രകാരമുള്ള ആനുകൂല്യങ്ങൾ ലഭിക്കില്ല എന്നതും പ്രത്യേകം ഓർക്കണം. അതുകൊണ്ട് തന്നെ നികുതി ലാഭത്തിനായി നിക്ഷേപിക്കാവുന്ന പ്രധാന പദ്ധതികൾ എന്തൊക്കെയെന്ന് ആദ്യം നോക്കാം.

നികുതി ലാഭ പദ്ധതികൾ

നികുതി ദായകർക്ക് 80C, 80CCD(1B) തുടങ്ങിയ വകുപ്പുകൾ പ്രകാരം നികുതി ഇളവ് നൽകുന്ന വിവിധ സാമ്പത്തിക പദ്ധതികളിൽ നിക്ഷേപിക്കാം.

1. പബ്ലിക് പ്രാവിഡന്റ് ഫണ്ട്:

പി പി എഫ് ഒരു ദീർഘകാല നിക്ഷേപ ഉപാധിയാണ്. ഈ പദ്ധതിയിൽ ₹500 മുതൽ ₹1.5 ലക്ഷം വരെ നിക്ഷേപിക്കാം. 80C വകുപ്പ് പ്രകാരം ഈ തുക നികുതി ഇളവിന് അർഹമാണ്. പിപിഎഫിൽ നിന്നുള്ള പലിശയും മുതലായ തുകയുമൊക്കെ നികുതിയില്ലാത്തതുമാണ്. ജനുവരി-മാർച്ച് 2025 കാലയളവിൽ 7.1% പലിശയാണ് ഇതിന് ലഭിക്കുന്നത്.

2. സുകന്യ സമൃദ്ധി യോജന:

പെൺകുട്ടികളുടെ ഭാവി സുരക്ഷിതമാക്കുന്നതിനായി സർക്കാർ ആരംഭിച്ച പദ്ധതി ആണ് എസ് എസ് വൈ. ഈ പദ്ധതിയിൽ ₹250 മുതൽ ₹1.5 ലക്ഷം വരെ നിക്ഷേപിക്കാം. 80 സി വകുപ്പ് പ്രകാരം നിക്ഷേപ തുക നികുതി ഇളവിന് അർഹമാണ്. എസ് എസ് വൈയിൽ നിന്നുള്ള പലിശയും അന്തിമ തുകയുമൊക്കെ നികുതിയില്ലാത്തതാണ്. ജനുവരി-മാർച്ച് 2025 കാലയളവിൽ 8.2% പലിശയാണ് എസ് എസ് വൈ നൽകുന്നത്.

3. സീനിയർ സിറ്റിസൺ സേവിംഗ്സ് സ്കീം:

60 വയസ്സിനു മുകളിലുള്ള മുതിർന്ന പൗരന്മാർക്ക് അനുയോജ്യമായ ഒരു സർക്കാർ പിന്തുണയുള്ള നിക്ഷേപ പദ്ധതിയാണ് എസ് സി എസ് എസ്. ₹1,000 മുതൽ ₹30 ലക്ഷം വരെ നിക്ഷേപിക്കാവുന്നതാണ്. 80സി വകുപ്പ് പ്രകാരം ₹1.5 ലക്ഷം വരെ നികുതി ഇളവിന് അർഹമാണ്. എന്നാൽ, പലിശ വരുമാനത്തിന് നികുതി ബാധകമാണ്. ജനുവരി-മാർച്ച് 2025 കാലയളവിൽ 8.2% പലിശ നൽകുന്നു.

4. നാഷണൽ സേവിംഗ്സ് സർട്ടിഫിക്കറ്റ്:

5 വർഷം കാലാവധിയുള്ള ഈ പദ്ധതിയിൽ ₹1,000 മുതൽ നിക്ഷേപിക്കാം. ₹1.5 ലക്ഷം വരെ നിക്ഷേപം 80സി വകുപ്പ് പ്രകാരം നികുതി ഇളവിന് അർഹമാണ്. പലിശ വീണ്ടും ഇൻവെസ്റ്റ് ചെയ്യുന്നതിലൂടെ നികുതി ഇളവ് ലഭിക്കും. എന്നാൽ, മെച്യൂറിറ്റി എത്തിയ ശേഷം പലിശ വരുമാനത്തിന് നികുതി ബാധകമാണ്. ജനുവരി-മാർച്ച് 2025 കാലയളവിൽ 7.7% പലിശ ഇതിന് ലഭിക്കും.

5. കിസാൻ വികാസ് പത്ര:

ഒരു സുരക്ഷിത നിക്ഷേപ മോഡലായ കെ വി പിയിൽ ₹1,000 മുതൽ നിക്ഷേപിക്കാം. ഈ പദ്ധതി 118 മാസങ്ങൾക്കുള്ളിൽ നിക്ഷേപം ഇരട്ടിയാക്കും. എന്നിരുന്നാലും, കെ വി പി നിക്ഷേപങ്ങൾക്ക് 80 സി വകുപ്പ് പ്രകാരം നികുതി ഇളവ് ലഭ്യമല്ല. ജനുവരി-മാർച്ച് 2025 കാലയളവിൽ 7.5% പലിശ ലഭിക്കും.

6. നാഷണൽ പെൻഷൻ സ്കീം:

ഭാവി സാമ്പത്തിക സുരക്ഷക്കായുള്ള സർക്കാർ പിന്തുണയുള്ള ഒരു പ്രധാന പെൻഷൻ പദ്ധതി ആണ് എൻ പി എസ്. ₹50,000 വരെ നിക്ഷേപം 80സി സി ഡി(1B) വകുപ്പ് പ്രകാരം അധിക നികുതി ഇളവിന് അർഹമാണ്. ഈ പദ്ധതി വിരമിക്കൽ വരെ തുടരുമെങ്കിലും പലിശയും ആകെ തുകയും വിരമിക്കുമ്പോൾ നികുതി ബാധകമാകാം.

നിക്ഷേപത്തിന്റെ അവസാന തീയതി

2024-25 സാമ്പത്തിക വർഷത്തിൽ നികുതി ഇളവ് ആഗ്രഹിക്കുന്നവർ 2025 മാർച്ച് 31 മുൻപായി മേൽപ്പറഞ്ഞ നിക്ഷേപങ്ങൾ പൂർത്തിയാക്കണം.
ഇൻകം ടാക്സ്‌ റിട്ടേൺ ഫയൽ ചെയ്യേണ്ട അവസാന തീയതി 2025 ജൂലൈ 31 ആണ്.

നികുതി ഇളവിനുള്ള ഏറ്റവും കൂടിയ പരിധി

80സി വകുപ്പ് പ്രകാരം പി പി എഫ്, എൻ എസ് സി, എസ് സി എസ് എസ്, എസ് എസ് വൈ തുടങ്ങിയ പദ്ധതികളിൽ ₹1.5 ലക്ഷം വരെ നിക്ഷേപം നികുതി ഇളവിന് അർഹമാണ്.

80സി സിഡി 1B) വകുപ്പ് പ്രകാരം എൻ പി എസിൽ ₹50,000 അധിക നിക്ഷേപം നികുതി ഇളവിന് അർഹമാണ്. ആകെ നിക്ഷേപം ₹2 ലക്ഷം വരെ നികുതി ഇളവ് നേടാൻ കഴിയും.

പഴയ നികുതി രീതി vs പുതിയ നികുതി രീതി - ഏത് തിരഞ്ഞെടുക്കണം?

പഴയ നികുതി രീതി: 80സി, 80 സി സിഡി (1B) എന്നിവ പ്രകാരം നികുതി ഇളവ് ലഭിക്കാൻ ഈ രീതി തിരഞ്ഞെടുക്കണം.

പുതിയ നികുതി രീതി: കുറഞ്ഞ നികുതി നിരക്കുകൾ ലഭിക്കുന്നതിനാൽ നികുതി ഇളവുകൾ ആവശ്യമില്ലെങ്കിൽ ഇത് തിരഞ്ഞെടുക്കാം.

നിക്ഷേപ തുക, വരുമാന നിരക്ക് എന്നിവ പരിഗണിച്ച് ഏറ്റവും കൂടുതൽ ലാഭം ലഭിക്കുന്ന രീതി തിരഞ്ഞെടുക്കുക.

നികുതി ലാഭം ഉറപ്പാക്കാൻ പി പി എഫ്, എൻ പി എസ്, എൻ എസ് സി, എസ് സി എസ് എസ് തുടങ്ങിയ പദ്ധതികളിൽ 2025 മാർച്ച് 31 മുൻപായി നിക്ഷേപം പൂർത്തിയാക്കണം. പഴയ നികുതി രീതി തിരഞ്ഞെടുക്കുമ്പോഴേ ഈ ഇളവ് ലഭ്യമാവൂ. അതിനാൽ, നിക്ഷേപ തുക, വരുമാന നിരക്ക് എന്നിവ കണക്കാക്കി എത്രയും വേഗം നിങ്ങളുടെ നിക്ഷേപം പൂർത്തിയാക്കുക.