1 വർഷത്തെ എഫ്ഡിയിൽ 1 ലക്ഷം നിക്ഷേപിച്ചാൽ ഉയർന്ന വരുമാനം ഈ സ്വകാര്യ ബാങ്കിൽ? കണക്കുകൾ ഇതാ

സുരക്ഷിതമായി നിക്ഷേപിക്കാൻ ആ​ഗ്രഹിക്കുന്നവർക്ക് ഏറ്റവും ബെസ്റ്റ് ഓപ്ഷനാണ് സ്ഥിര നിക്ഷേപങ്ങൾ അഥവാ എഫ്ഡി. ഒരു നിശ്ചിത തുക ഒറ്റത്തവണയായി നിക്ഷേപിച്ച് അതിൽ നിന്നും നേട്ടം ഉറപ്പാക്കാൻ എഫ്ഡിയിലൂടെ സാധിക്കും. പ്രധാനമായും 7 ദിവസം മുതൽ 10 വ‍ർഷം വരെയാണ് സ്ഥിര നിക്ഷേപങ്ങളുടെ കാലാവധി കണക്കാക്കുന്നത്.

എല്ലാ ബാങ്കുകളും ധനകാര്യ സ്ഥാപനങ്ങളും സ്ഥിര നിക്ഷേപങ്ങൾ വാ​ഗ്ദാനം ചെയ്യുന്നുണ്ട്. ഓരോ ബാങ്കുകളുടെയും എഫ്ഡി പലിശ നിരക്കുകൾ വ്യത്യസ്തമായിരിക്കും. ആർബിഐ റിപ്പോ നിരക്ക് കുറച്ചതോടെ എഫ്ഡി നിരക്കുകൾ വളരെ കുറഞ്ഞിട്ടുണ്ട്. എന്നിട്ടും നിക്ഷേപകർക്ക് പ്രിയം സ്ഥിര നിക്ഷേപങ്ങൾ തന്നെ.

ഏത് കാലാവധിയിലും എഫ്ഡിയിൽ നിക്ഷേപിക്കാം എങ്കിലും നിക്ഷേപകർ കൂടുതലും ഹ്രസ്വകാലം തിരഞ്ഞെടുക്കുന്നു. കുറഞ്ഞ കാലാവധിക്കുള്ളിൽ പണം ഉറപ്പാക്കാൻ ഇതിലൂടെ സാധിക്കുന്നു. അങ്ങനെയെങ്കിൽ ഒരു വർഷത്തെ എഫ്‌ഡികളിൽ നിക്ഷേപിക്കുന്നത് മികച്ച തീരുമാനമായിരിക്കും.

ഇവിടെ രാജ്യത്തെ പ്രധാന സ്വകാര്യ, പൊതു മേഖലാ ബാങ്കുകളിൽ 1 വർഷത്തെ കാലാവധിയിൽ 1 ലക്ഷം രൂപ നിക്ഷേപിച്ചാൽ അത് എത്ര രൂപയായി വളരും എന്ന് പരിശോധിക്കാം;

1. ഇൻഡസ്ഇൻഡ് ബാങ്ക്

ഒരു വർഷത്തെ കാലാവധിയുള്ള എഫ്ഡികൾക്ക് ഇവിടെ 7 ശതമാനം പലിശ നിരക്ക് വാഗ്ദാനം ചെയ്യുന്നു. ഇവിടെ 1 ലക്ഷം രൂപ നിക്ഷേപിച്ചാൽ കാലാവധി പൂർത്തിയാവുമ്പോൾ 1,07,186 രൂപ ഉറപ്പാക്കാം. താരതമ്യേന ഉയർന്ന പലിശ നിരക്കാണ് ഈ ബാങ്ക് വാ​ഗ്ദാനം ചെയ്യുന്നത്.

2. ആക്സിസ് ബാങ്ക്, എച്ച്ഡിഎഫ്സി ബാങ്ക്, കൊട്ടക് മഹീന്ദ്ര ബാങ്ക്

ഈ മൂന്ന് സ്വകാര്യ ബാങ്കുകളും ഒരു വർഷത്തെ കാലാവധിയുള്ള എഫ്ഡിക്ക് 6.60 ശതമാനം പലിശ നിരക്ക് വാഗ്ദാനം ചെയ്യുന്നു. അതിനാൽ ഈ സ്കീമിൽ 1 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ നിക്ഷേപം 1,06,765 രൂപയായി വളരും.

3. ഐസിഐസിഐ ബാങ്ക്

ഈ സ്വകാര്യ ബാങ്ക് ഒരു വർഷത്തെ എഫ്ഡിക്ക് 6.40 ശതമാനം പലിശ നിരക്ക് വാഗ്ദാനം ചെയ്യുന്നു. ഇവിടെ ഒരു വർഷത്തേക്ക് 1 ലക്ഷം രൂപ നിക്ഷേപിച്ചാൽ കാലാവധി പൂർത്തിയാകുമ്പോൾ 1,06,555 രൂപ ഉറപ്പാക്കാം.

4. പഞ്ചാബ് നാഷണൽ ബാങ്ക്

ഈ പൊതുമേഖലാ ബാങ്ക് ഒരു വർഷത്തെ കാലാവധിയുള്ള എഫ്‌ഡികൾക്ക് 6.80 ശതമാനം പലിശ നിരക്ക് വാഗ്ദാനം ചെയ്യുന്നു. ഇവിടെ ഒരു വർഷത്തേക്ക് 1 ലക്ഷം രൂപ നിക്ഷേപിച്ചാൽ കാലാവധി അവസാനിക്കുമ്പോഴേക്കും നിക്ഷേപം 1,06,975 രൂപയായി വളരും.

5. ബാങ്ക് ഓഫ് ബറോഡ, കാനറ ബാങ്ക്, യൂണിയൻ ബാങ്ക് ഓഫ് ഇന്ത്യ

ഈ പൊതുമേഖലാ ബാങ്കുകൾ ഒരു വർഷത്തെ എഫ്‌ഡിക്ക് 6.60 ശതമാനം പലിശ നിരക്ക് വാഗ്ദാനം ചെയ്യുന്നു. ഈ കാലാവധിയിൽ നിങ്ങൾ 1 ലക്ഷം നിക്ഷേപിച്ചാൽ അത് 1,06,765 രൂപയായി വളരും.

6. സ്റ്റേറ്റ് ബാങ്ക് ഓഫ് ഇന്ത്യ (എസ്‌ബി‌ഐ)

രാജ്യത്തെ ഏറ്റവും വലിയ പൊതുമേഖലാ ബാങ്കായ എസ്ബിഐ ഒരു വർഷത്തെ കാലാവധിയുള്ള എഫ്ഡിക്ക് 6.45 ശതമാനം പലിശ നിരക്ക് വാഗ്ദാനം ചെയ്യുന്നു. ഒരു വർഷത്തേക്ക് 1 ലക്ഷം നിക്ഷേപിച്ചാൽ അത് 1,06,608 രൂപയായി വളരും.