മാസം 18,000 രൂപയുടെ എസ്‌ഐ‌പി; വിരമിക്കുമ്പോൾ കൈയ്യിൽ 2 കോടി, എങ്ങനെ?

സമ്പാദ്യം തുടങ്ങാൻ ആഗ്രഹിക്കുന്നവർ പലപ്പോഴും നേരിടുന്ന പ്രധാന വെല്ലുവിളി എത്ര തുക നിക്ഷേപിക്കണം എന്നതിനെക്കുറിച്ചുള്ള ആശയക്കുഴപ്പമാണ്. എന്നാൽ കൃത്യമായ പ്ലാനിംഗും അച്ചടക്കവുമുണ്ടെങ്കിൽ ചെറിയ തുക കൊണ്ട് പോലും വലിയൊരു സമ്പാദ്യം കെട്ടിപ്പടുക്കാം. മ്യൂച്വൽ ഫണ്ടുകളിലെ സിസ്റ്റമാറ്റിക് ഇൻവെസ്റ്റ്‌മെന്റ് പ്ലാൻ മികച്ചൊരു ഓപ്ഷനാണ്. 

2-3 വർഷം പോലുള്ള ചെറിയ കാലയളവിൽ, എസ്ഐപി നിക്ഷേപങ്ങൾ വലിയ ലാഭം നൽകിയെന്ന് വരില്ല. എന്നാൽ ദീർഘകാലാടിസ്ഥാനത്തിൽ, നിങ്ങളുടെ വിരമിക്കൽ കാലത്തേക്ക് വലിയൊരു സമ്പാദ്യം കെട്ടിപ്പടുക്കാൻ ഇവ നിങ്ങളെ സഹായിക്കും. സ്റ്റെപ്പ്-അപ്പ് എസ്‌ഐ‌പി വഴി ഒരാൾക്ക് തന്റെ 50-കളിൽ 2 കോടി രൂപയിലധികം സമ്പാദിക്കാൻ സാധിക്കും.

എന്താണ് ഈ 18,000 രൂപയുടെ മാജിക്?

സാധാരണ എസ്‌ഐ‌പി നിക്ഷേപങ്ങളിൽ നിന്ന് വ്യത്യസ്തമായി, ഓരോ വർഷവും നിക്ഷേപ തുകയിൽ ചെറിയൊരു വർദ്ധനവ് വരുത്തുന്ന രീതിയാണിത്. പ്രതിമാസ നിക്ഷേപം 18,000 രൂപയാണെന്ന് കണക്കാക്കുക. 20 വർഷത്തേക്ക് വാർഷിക വർദ്ധനവ് 6% (ഓരോ വർഷവും നിങ്ങളുടെ നിക്ഷേപ തുക 6 ശതമാനം വീതം വർദ്ധിപ്പിക്കുക).

ഈ രീതിയിൽ നിക്ഷേപിച്ചാൽ 20 വർഷം കഴിയുമ്പോൾ നിങ്ങളുടെ പക്കൽ ഏകദേശം 2 കോടി മുതൽ 2.5 കോടി രൂപ വരെ ഉണ്ടാകും. ഇവിടെ ശ്രദ്ധേയമായ കാര്യം, 20 വർഷം കൊണ്ട് നിങ്ങൾ ആകെ നിക്ഷേപിക്കുന്ന തുക ഏകദേശം 80 ലക്ഷം രൂപ മാത്രമായിരിക്കും. ബാക്കി തുക മുഴുവൻ കോമ്പൗണ്ടിംഗ് വഴി ലഭിക്കുന്ന ലാഭമാണ്.

മാസം 1 ലക്ഷം രൂപ പെൻഷൻ നേടാം

വിരമിച്ച ശേഷം ഈ തുക പ്രയോജനപ്പെടുത്തുകയും ചെയ്യാം. 2 കോടി രൂപയിൽ നിന്ന് പ്രതിവർഷം 5% തുക പിൻവലിക്കുകയാണെങ്കിൽ, നിങ്ങളുടെ മൂലധനം നഷ്ടപ്പെടാതെ തന്നെ മാസം 80,000 രൂപ മുതൽ 1 ലക്ഷം രൂപ വരെ കൈപ്പറ്റാൻ സാധിക്കും. റിട്ടയർമെന്റിന് ശേഷം ഈ തുക സുരക്ഷിതമായ നിക്ഷേപങ്ങളിൽ (ഉദാഹരണത്തിന് 6% ലാഭം തരുന്ന ഫണ്ടുകൾ) ഇട്ടാൽ പോലും, അടുത്ത 30 വർഷത്തേക്ക് മാസം ഒരു ലക്ഷം രൂപ വീതം പിൻവലിച്ചാലും കാലാവധി കഴിയുമ്പോൾ വലിയൊരു തുക ബാക്കിയുണ്ടാകും.

എസ്ഐപിയിൽ നിക്ഷേപിക്കുമ്പോൾ ശ്രദ്ധിക്കേണ്ട ചില കാര്യങ്ങൾ കൂടിയുണ്ട്. വിപണിയിലെ ഏറ്റക്കുറച്ചിലുകൾ നോക്കാതെ നിക്ഷേപം തുടരുക എന്നതാണ് പ്രധാനം. നിക്ഷേപം എത്ര നേരത്തെ തുടങ്ങുന്നുവോ അത്രയും വലിയ ലാഭം കോമ്പൗണ്ടിംഗിലൂടെ ലഭിക്കും. വരുമാനം വർദ്ധിക്കുന്നതിനനുസരിച്ച് നിക്ഷേപ തുകയിലും വർദ്ധനവ് വരുത്തുന്നത് ലക്ഷ്യത്തിലേക്കുള്ള ദൂരം കുറയ്ക്കും. ചുരുക്കത്തിൽ, ദീർഘകാല നിക്ഷേപങ്ങളിൽ ചെറിയ തുകകൾ പോലും അത്ഭുതങ്ങൾ സൃഷ്ടിക്കും.