5,000 രൂപ മാറ്റിവെച്ചാൽ 8 ലക്ഷം രൂപ റിട്ടേൺസ് നൽകുന്ന പോസ്റ്റ് ഓഫീസ് പദ്ധതി; ചുമ്മ ചേരന്നെ...

സുരക്ഷിതമായ നിക്ഷേപത്തിലൂടെ മികച്ച സമ്പാദ്യം കെട്ടിപ്പടുക്കാൻ ആഗ്രഹിക്കുന്നവർക്ക് മികച്ചതാണ് പോസ്റ്റ് ഓഫീസ് റിക്കറിംഗ് ഡിപ്പോസിറ്റ് പദ്ധതി. സാധാരണക്കാർക്കും ശമ്പള വരുമാനക്കാർക്കും ഒരുപോലെ അനുയോജ്യമായ ഏറ്റവും മികച്ച ലഘുസമ്പാദ്യ പദ്ധതികളിലൊന്നാണിത്. വലിയ തുക ഒറ്റയടിക്ക് നിക്ഷേപിക്കാൻ സാധിക്കാത്തവർക്ക് ഓരോ മാസവും ചെറിയ തുകകൾ മാറ്റിവെച്ച് ഭാവിയിലേക്ക് വലിയൊരു സമ്പാദ്യം കെട്ടിപ്പടുക്കാൻ ഈ പദ്ധതി സഹായിക്കുന്നു.

നിലവിലെ പലിശ നിരക്കുകൾ പ്രകാരം, പ്രതിമാസം 5,000 രൂപ നിക്ഷേപിക്കുന്ന ഒരാൾക്ക് 10 വർഷം കൊണ്ട് ഏകദേശം 8 ലക്ഷം രൂപയോളം സമ്പാദിക്കാൻ കഴിയുന്ന വിധത്തിലാണ് ഈ പദ്ധതി വിഭാവനം ചെയ്തിരിക്കുന്നത്.

എന്താണ് പോസ്റ്റ് ഓഫീസ് ആർ.ഡി? 

കേന്ദ്ര സർക്കാർ നൽകുന്ന ഗ്യാരണ്ടി ഉള്ളതിനാൽ സാധാരണക്കാർക്ക് ഏറെ വിശ്വസനീയമായ സമ്പാദ്യ പദ്ധതിയാണിത്. നിലവിൽ പോസ്റ്റ് ഓഫീസ് ആർ.ഡിക്ക് 6.7 ശതമാനം പലിശയാണ് ലഭിക്കുന്നത്. ഓരോ മൂന്ന് മാസം കൂടുമ്പോഴുമാണ് പലിശ കണക്കാക്കുന്നത്. 5 വർഷമാണ് ഇതിന്റെ കാലാവധി എങ്കിലും, കാലാവധിക്ക് ശേഷം ഇത് വീണ്ടും 5 വർഷത്തേക്ക് കൂടി നീട്ടാൻ സാധിക്കും. ഇങ്ങനെ മൊത്തം 10 വർഷം നിക്ഷേപം തുടരാം.

8 ലക്ഷം രൂപ എങ്ങനെ സ്വന്തമാക്കാം? 

പ്രതിമാസ നിക്ഷേപം: 5,000 രൂപ

ഒരു വർഷത്തെ നിക്ഷേപം: 60,000 രൂപ

10 വർഷത്തെ ആകെ നിക്ഷേപം: 6,00,000 രൂപ

നിലവിലെ പലിശ നിരക്ക്: 6.7%

10 വർഷത്തിന് ശേഷം ലഭിക്കുന്ന ഏകദേശ പലിശ: 2,13,659 രൂപ

ആകെ ലഭിക്കുന്ന തുക: 8,13,659 രൂപ

ചുരുക്കത്തിൽ, 10 വർഷത്തിനുള്ളിൽ നിങ്ങൾ നിക്ഷേപിച്ച 6 ലക്ഷം രൂപ 8.13 ലക്ഷമായി വളരുന്നു.

പദ്ധതിയുടെ പ്രധാന സവിശേഷതകൾ

വെറും 100 രൂപ മുതൽ നിക്ഷേപം ആരംഭിക്കാം. 10 രൂപയുടെ ഗുണിതങ്ങളായി എത്ര തുക വേണമെങ്കിലും നിക്ഷേപിക്കാവുന്നതാണ്. പരമാവധി നിക്ഷേപത്തിന് പരിധിയില്ല. ബാങ്ക് നിക്ഷേപങ്ങളെ അപേക്ഷിച്ച് പോസ്റ്റ് ഓഫീസ് നിക്ഷേപങ്ങൾക്ക് പൂർണ്ണമായ സർക്കാർ സുരക്ഷയുണ്ട്. ഒരു വർഷം തുടർച്ചയായി നിക്ഷേപം നടത്തിയാൽ, നിക്ഷേപ തുകയുടെ 50 ശതമാനം വരെ വായ്പ എടുക്കാനും സാധിക്കും. കുട്ടികളുടെ പേരിലും മുതിർന്നവർക്ക് അക്കൗണ്ട് ആരംഭിക്കാവുന്നതാണ്. ജോയിന്റ് അക്കൗണ്ട് സൗകര്യവും ലഭ്യമാണ്. അക്കൗണ്ട് തുടങ്ങി 3 വർഷം കഴിഞ്ഞാൽ അക്കൗണ്ട് ക്ലോസ് ചെയ്യാം. എന്നാൽ ഇതിന് സേവിങ്സ് അക്കൗണ്ടിന് തുല്യമായ പലിശ മാത്രമേ ലഭിക്കുകയുള്ളൂ.

ദൈനംദിന ചെലവുകൾക്കിടയിൽ നിന്ന് ചെറിയൊരു തുക മാറ്റിവെച്ച് ഭാവിയിലേക്കായി വലിയൊരു സമ്പാദ്യം കരുതിവെക്കാൻ ആഗ്രഹിക്കുന്നവർക്ക് പോസ്റ്റ് ഓഫീസ് ആർ.ഡി ഒരു മികച്ച തിരഞ്ഞെടുപ്പാണ്. അടുത്തുള്ള പോസ്റ്റ് ഓഫീസിൽ നേരിട്ടെത്തി ലളിതമായ നടപടിക്രമങ്ങളിലൂടെ ഈ അക്കൗണ്ട് ആരംഭിക്കാം.