ബാങ്ക് എഫ്ഡി പലിശ നിരക്ക് കുറയുന്നതിൽ ആശങ്കയുണ്ടോ? കോർപ്പറേറ്റ് എഫ്ഡിയിൽ നിക്ഷേപിക്കൂ, 8.75% പലിശ

കഴിഞ്ഞ വർഷം റിസർവ് ബാങ്ക് 135 ബേസിസ് പോയിൻറ് റിപ്പോ നിരക്ക് കുറച്ചതിനുശേഷം, പല ബാങ്കുകളും കമ്പനികളും അവരുടെ സ്ഥിര നിക്ഷേപത്തിന്റെ പലിശ നിരക്ക് കുറച്ചിട്ടുണ്ട്. ഈ നിരക്ക് കുറച്ചെങ്കിലും, നിരവധി ബ്ലൂ-ചിപ്പ് കമ്പനികൾ ഇപ്പോഴും എഫ്ഡിയിൽ ആകർഷകമായ പലിശ നിരക്കുകൾ വാഗ്ദാനം ചെയ്യുന്നുണ്ട്. ബാങ്കുകൾ വാഗ്ദാനം ചെയ്യുന്ന നിരക്കിനേക്കാൾ 200 ബേസിസ് പോയിന്റുകൾ വരെ പലിശ നിരക്ക് ഈ കമ്പനികൾ വാഗ്ദാനം ചെയ്യുന്നു. ഈ നിക്ഷേപങ്ങൾ താഴ്ന്ന ആദായനികുതി സ്ലാബിലെ നിക്ഷേപകർക്ക് പ്രതീക്ഷ നൽകുന്നതും സ്ഥിര വരുമാനം നൽകുന്നതുമാണ്.

എച്ച്ഡിഎഫ്സി

മോർട്ട്ഗേജ് വായ്പ നൽകുന്ന എച്ച്ഡിഎഫ്സി ഒന്ന് മുതൽ അഞ്ച് വർഷം വരെ കാലാവധിയുള്ള സ്ഥിരനിക്ഷേപത്തിൽ 7.5% പലിശ നിരക്ക് വാഗ്ദാനം ചെയ്യുന്നു. ഐ‌സി‌ഐ‌സി‌ഐ ഹോം ഫിനാൻസ് വിവിധ കാലാവധികളിലുടനീളം നിരക്ക് 20-50 ബേസിസ് പോയിൻറ് കുറച്ചിരുന്നു. ഇപ്പോൾപരമാവധി 7.7% പലിശയാണ് വാഗ്ദാനം ചെയ്യുന്നത്.

ബജാജ് ഫിനാൻസ്

അതേസമയം, ബജാജ് ഫിനാൻസ് നിക്ഷേപ പലിശ നിരക്ക് 15-40 ബേസിസ് പോയിൻറ് കുറച്ചിട്ടുണ്ട്. ഇത് നൽകുന്ന പരമാവധി നിരക്ക് 8.10% ആണ്. മുതിർന്ന പൗരന്മാർ‌ക്ക് 25 ബി‌പി‌എസ് കൂടുതൽ‌ നേടാൻ‌ കഴിയും. അതായത് 8.35% വരെ. പി‌എൻ‌ബി ഹൌസിംഗ് ഫിനാൻ‌സും ശ്രീറാം ട്രാൻ‌സ്‌പോർട്ട് ഫിനാൻ‌സും യഥാക്രമം എഫ്‌ഡിയിൽ 8.45 ശതമാനം, 8.75 ശതമാനം വരെ പലിശ വാഗ്ദാനം ചെയ്യുന്നുണ്ട്.

ബാങ്കുകളേക്കാൾ ലാഭം

നിരക്ക് കുറച്ചെങ്കിലും, ഈ നിക്ഷേപങ്ങൾ എല്ലാം തന്നെ ഒരു ബാങ്ക് നൽകുന്നതിനേക്കാൾ 125-250 ബേസിസ് പോയിന്റുകൾ കൂടുതൽ പലിശ വാഗ്ദാനം ചെയ്യുന്നുണ്ട്. ഉദാഹരണത്തിന്, സ്റ്റേറ്റ് ബാങ്ക് ഓഫ് ഇന്ത്യ എഫ്ഡിയ്ക്ക് 6.25 ശതമാനവും ബജാജ് ഫിനാൻസ് എഫ്ഡിയ്ക്ക് 8.35 ശതമാനവും പലിശ നിരക്കാണ് നൽകുന്നത്. വരും മാസങ്ങളിൽ കോർപ്പറേറ്റ് എഫ്ഡികളുടെ പലിശ നിരക്ക് കുറയ്ക്കുമെന്ന് പ്രതീക്ഷിക്കുന്നതിനാൽ, ഈ കോർപ്പറേറ്റ് എഫ്ഡികളിൽ നിക്ഷേപിക്കാനുള്ള ഏറ്റവും നല്ല സമയമാണിതെന്നാണ് സാമ്പത്തിക വിദഗ്ധരുടെ അഭിപ്രായം.

ഡെറ്റ് മ്യൂച്വൽ ഫണ്ടുകൾ

ഡെറ്റ് മ്യൂച്വൽ ഫണ്ടുകളുമായി താരതമ്യപ്പെടുത്തുമ്പോൾ, സ്ഥിര നിക്ഷേപങ്ങളിൽ നിന്നുള്ള വരുമാനം കൂടുതൽ പ്രവചിക്കാവുന്നതും നിക്ഷേപകർക്ക് പതിവായി പണം ലഭിക്കുന്നതുമാണ്. ഡെറ്റ് മ്യൂച്വൽ ഫണ്ടുകളിൽ നിന്നുള്ള വരുമാനം ഉറപ്പുനൽകുന്നില്ല, പ്രവചിക്കാനാകുകയുമില്ല.