സമ്പാദ്യം ഒരു കോടി, പ്രതിമാസ പെൻഷൻ 45,000 രൂപ; പങ്കാളിക്കൊപ്പം ഭാവി ഭദ്രമാക്കാം

നാഷണൽ പെൻഷൻ സിസ്റ്റം (എൻ.പി.എസ്) മാർക്കറ്റ് ലിങ്ക്ഡ് ഒരു പെൻഷൻ പദ്ധതിയാണ്. വിരമിച്ചതിന് ശേഷം വരുമാനം കണ്ടെത്താൻ ആഗ്രഹിക്കുന്ന വ്യക്തികൾക്ക് ഈ പദ്ധതി പ്രയോജനപ്പെടുത്താവുന്നതാണ്. സ്വകാര്യ, സർക്കാർ മേഖലകളിലെ ജീവനക്കാർക്കും സ്വയം തൊഴിൽ ചെയ്യുന്നവർക്കും എൻ.പി.എസ് അർഹതയുണ്ട്. പെൻഷൻ ഫണ്ട്‌ റെഗുലേറ്ററി ആൻഡ് ഡെവലപ്മെന്റ് അതൊറിറ്റിയാണ് (പി.എഫ്.ആർ.ഡി.എ) ഈ പദ്ധതിയുടെ മേൽനോട്ടം വഹിക്കുന്നത്.

ഇതൊരു മാർക്കറ്റ് ലിങ്ക്ഡ് പദ്ധതിയായത് കൊണ്ടുതന്നെ, അതിന്റെ പണം നിക്ഷേപിച്ച ഇക്വിറ്റിയുടെ പ്രകടനത്തെ ആശ്രയിച്ചായിരിക്കും വരുമാനം ലഭിക്കുന്നത്. എൻ.പി.എസിന്റെ പ്രധാന പ്രയോജനങ്ങളിലൊന്നാണ്, നിങ്ങൾ വിരമിക്കുമ്പോൾ നിങ്ങൾക്ക് ഒറ്റത്തവണ പേയ്മെന്റും പെൻഷനും ലഭിക്കുന്നത്. നിങ്ങളുടെ പേരിൽ നിങ്ങൾക്ക് ഒരു എൻ.പി.എസ് അക്കൗണ്ട് തുറക്കാൻ സാധിക്കും. മാത്രമല്ല, നിങ്ങളുടെ സൗകര്യത്തിനനുസരിച്ച് പ്രതിമാസമായും അല്ലെങ്കിൽ വാർഷികമായും പണം നിക്ഷേപിക്കാൻ സൗകര്യവും എൻ.പി.എസ് നൽകുന്നു. 1,000 രൂപയിൽ പോലും നിങ്ങൾക്കൊരു എൻ.പി.എസ് തുറക്കാൻ സാധിക്കും. എൻ.പി.എസ് അക്കൗണ്ടിന്റെ കാലാവധി നിങ്ങളുടെ 60 വയസ് വരെയാണ്. എന്നാൽ പുതിയ നിയമങ്ങൾ പ്രകാരം, നിങ്ങൾക്ക് വേണമെങ്കിൽ ഭാര്യക്ക് 65 വയസാക്കുന്നത് വരെ എൻ.പി.എസ് അക്കൗണ്ട് പ്രവർത്തിപ്പിക്കാവുന്നതാണ്.

പ്രതിമാസം 5,000 രൂപയുടെ നിക്ഷേപം ഒരു കോടി രൂപയിലധികം നേടാൻ നിങ്ങളുടെ ഭാര്യയെ നിങ്ങൾക്ക് സഹായിക്കാൻ പറ്റും. ഉദാഹരണമായി, നിങ്ങളുടെ ഭാര്യക്ക് 30 വയസ് പ്രായമുണ്ടെന്നും നിങ്ങൾ അവരുടെ എൻ.പി.എസ് അക്കൗണ്ടിൽ എല്ലാ മാസവും 5,000 രൂപ നിക്ഷേപിക്കുന്നുവെന്നും കരുതുക. നിക്ഷേപത്തിന് 10 ശതമാനം വാർഷിക പലിശ ലഭിക്കുകയാണെങ്കിൽ, 60 വയസാകുമ്പോൾ അവരുടെ അക്കൗണ്ടിൽ ആകെ 1.12 കോടി രൂപയുണ്ടാകും. ഈ പദ്ധതിയിൽ നിന്ന് ഒറ്റത്തവണയായി അവർക്ക് 45 ലക്ഷം രൂപ പിൻവലിക്കാൻ സാധിക്കും. കൂടാതെ, ബാക്കിതുക 45,000 രൂപ എന്ന നിരക്കിൽ പ്രതിമാസ പെൻഷനായിട്ട് ലഭിക്കും.

അതായത്, 30 വയസിൽ നിക്ഷേപം ആരംഭിച്ച് 60 വയസ് വരെ നിക്ഷേപം തുടരുന്നു. അപ്പോൾ ആകെ 30 വർഷ നിക്ഷേപ കാലയളവിൽ, പ്രതിമാസം 5,000 രൂപ എന്ന നിരക്കിൽ നിക്ഷേപിക്കുന്നു. നിക്ഷേപത്തിലെ ഏകദേശം വാർഷിക വരുമാനം 10 ശതമാനമാകുമ്പോൾ ആകെ പെൻഷൻ ഫണ്ട് 1,11,98,471 രൂപയായിരിക്കും. 44,79,388 രൂപ ഒറ്റത്തവയായി പിൻവലിച്ചാൽ ബാക്കി തുക 67,19,083 രൂപയായിരിക്കും. 8 ശതമാനം നിരക്കിൽ പെൻഷനായി 44,793 രൂപ ലഭിക്കും.

എൻ.പി.എസിൽ 2 ലക്ഷം രൂപ വരെ നികുതി ഇളവുകളുണ്ട്. അതായത്, 1.5 ലക്ഷം രൂപ കഴിഞ്ഞുള്ള 50,000 രൂപ വരെയുള്ള നിക്ഷേപത്തിന് നികുതി ഇളവുണ്ട്. മാത്രമല്ല, ആകെ തുകയുടെ 60 ശതമാനം പിൻവലിക്കുമ്പോഴും നികുതി ഇളവ് ലഭിക്കുന്നു. 18 വയസ് മുതൽ 70 വയസ് വരെയുള്ള ആർക്കും എൻ.പി.എസിൽ അക്കൗണ്ട് തുറക്കാൻ സാധിക്കും. നിങ്ങൾ എൻ.പി.എസിൽ എത്ര രൂപ നിക്ഷേപം നടത്തിയാലും അതിൽ രണ്ട് ഭാഗങ്ങളായി തിരിച്ചിരിക്കുന്നു. ഒന്ന് വിരമിച്ചതിന് ശേഷം നിങ്ങൾക്ക് മൊത്തം സമ്പാദ്യത്തിന്റെ 60 ശതമാനം ഒറ്റത്തവണയായി പിൻവലിക്കാം. മറ്റൊന്ന് ബാക്കിയുള്ള 40 ശതമാനം നിങ്ങൾക്ക് പ്രതിമാസ പെൻഷനായി ലഭിക്കും എന്നതാണ്.