വെറും 333 രൂപ മതി; പോസ്റ്റ് ഓഫീസിന്റെ ഈ സേവിം​ഗ്സ് സ്കീമിലൂടെ 17 ലക്ഷത്തിലധികം സമ്പാദിക്കാം

ജനങ്ങൾക്കിടയിൽ ഏറ്റവും പ്രചാരത്തിലുള്ള നിക്ഷേപ രീതികളാണ് പോസ്റ്റ് ഓഫീസ് ഉറപ്പ് നൽകുന്നത്. ഏതൊരു സാധാരണക്കാരനും താങ്ങാവുന്ന രീതിയിലുള്ള പ്രതിമാസ തുകകളും ആകർഷകമായ പലിശ നിരക്കിലുള വമ്പൻ റിട്ടേണുകളുമാണ് പോസ്റ്റ് ഓഫീസ് സ്കീമുകളെ ഇന്നും ജനകീയമാക്കി നിർത്തുന്നത്. വിപണിയിൽ അനേകം നിക്ഷേപ മാർ​ഗങ്ങൾ നിലനിൽക്കുമ്പോഴും പോസ്റ്റ്‌ ഓഫീസിന്റെ ചെറുകിട സമ്പാദ്യ പദ്ധതികളിൽ നിരവധി ആളുകൾ ഇപ്പോഴും നിക്ഷേപം നടത്തുന്നുണ്ട്.

സുരക്ഷിതമായ നിക്ഷേപത്തിനൊപ്പം മികച്ച പലിശയും ലഭിക്കുമ്പോൾ ഇത്തരം സ്കീമുകളോടുള്ള താത്പര്യം വർദ്ധിക്കും. അവയിലൊന്നാണ് ആർ.ഡി നിക്ഷേപങ്ങൾ. പോസ്റ്റ് ഓഫീസ് ആർ‌.ഡി സ്കീമിലേക്ക് വേണ്ടി ദിവസവും വെറും 333 രൂപ ലാഭിച്ചാൽ നിങ്ങൾക്ക് 17 ലക്ഷത്തിലധികം രൂപ നേടാനാവും.

അപകട സാധ്യതയില്ല

പോസ്റ്റ് ഓഫീസ് ആർ.ഡി സ്കീമുകൾ മറ്റു പോസ്റ്റ് ഓഫീസ് സ്കീം പോലെ തന്നെ അപകട സാധ്യതയില്ലാത്തതാണ്. ഉപഭോക്താക്കൾക്ക് പൂർണ സുരക്ഷയാണ് ഇത്തരം പദ്ധതികൾ ഉറപ്പ് നൽകുന്നത്. മറ്റു സേവിം​ഗ്സ് സ്കീമുകളെ അപേക്ഷിച്ച് നിരവധി നേട്ടങ്ങളാണ് ഈ ചെറുകിട സേവിംഗ്സ് ആർ.ഡി സ്കീമിൽ.

ചെറിയ തുകയിൽ തന്നെ നിങ്ങൾക്ക് നിക്ഷേപിച്ച് തുടങ്ങാം. എന്നാൽ എല്ലാ മാസവും മുടങ്ങാതെ നിക്ഷേപം പൂർത്തിയാക്കാൻ ശ്രദ്ധിക്കുക. 5 വർഷം വരെയാണ് ഈ ആർ.ഡി സ്കീമിന്റെ കാലാവധി. അതിനാൽ ഏതെങ്കിലും മാസം നിക്ഷേപം മുടങ്ങിയാൽ നിങ്ങൾക്ക 1% പിഴ അടക്കേണ്ടി വരും. അത് തുടർച്ചയായി 4 തവണ നിക്ഷേപം മുടങ്ങിയാൽ ഈ അക്കൗണ്ട് സ്വയം ക്ലോസ് ചെയ്യപ്പെടും.

 

എത്രയാണ് പലിശ?

നിലവിൽ ഈ സ്കീമിന് 6.8 ശതമാനം കൂട്ടുപലിശയാണ് പോസ്റ്റ് ഓഫീസ് വാ​ഗ്ദാനം ചെയ്യുന്നത്. അതിനാൽ തന്നെ നിക്ഷേപകരുടെ പണം സുരക്ഷിതമാവുകയും ഒപ്പം ആകർഷകമായ പലിശ നിരക്കോടെ ജനങ്ങൾക്ക് സമ്പാദിക്കാൻ സാധിക്കുകയും ചെയ്യുന്നു. ഇത്തരം ചെറുകിയ സമ്പാദ്യ പദ്ധതികൾക്കായി നിങ്ങൾക്ക് പ്രതിമാസം 100 രൂപ നിക്ഷേപിച്ച് ഒരു അക്കൗണ്ട് തുറക്കാം. അതിനാൽ തന്നെ ഏതൊരു വ്യക്തിക്കും ആർ.ഡി തുറക്കാൻ സാധിക്കുന്നു. സിംഗിൾ അല്ലെങ്കിൽ ജോയിൻ്റ് അക്കൗണ്ട് തുറക്കാനുള്ള സൗകര്യവും ഇതിൽ നൽകിയിട്ടുണ്ട്.

333 രൂപ നിക്ഷേപിച്ച് ലക്ഷങ്ങൾ സമ്പാദിക്കാം.

നിങ്ങൾക്ക് 333 രൂപ ലാഭിക്കാൻ സാധിച്ചാൽ കാലാവധി പൂർത്തിയാവുമ്പോൾ ലക്ഷങ്ങൾ സമ്പാദിക്കാനാവും. ഇങ്ങനെ ചെയ്താൽ ഏകദേശം 17 ലക്ഷത്തിലധികം ഒറ്റയടിക്ക് നേടാം. അതായത് കണക്ക് പ്രകാരം നിങ്ങൾ ഓരോ ദിവസവും 333രൂപ ലാഭിച്ചാൽ പ്രതിമാസം ഈ തുക 10,000 രൂപയാവുന്നു. പ്രതിമാസം 10,000 കണക്കാക്കിയാൽ നിങ്ങൾക്ക് പ്രതിവർഷം 1.20 ലക്ഷം രൂപ സമ്പാദിക്കാം.

ഇതേ ഫോർമാറ്റിൽ അഞ്ച് വർഷത്തെ കാലാവധി പൂർത്തിയാവുമ്പോൾ നിങ്ങളുടെ നിക്ഷേപ തുക 5,99,400 രൂപയാവും. ഇപ്പോഴത്തെ കൂട്ടു പലിശയായ 6.8 ശതമാനം നിരക്കിൽ നോക്കിയാൽ അത് 1,15,427 രൂപയാകും. അതായത് നിങ്ങളുടെ മൊത്തം തുക 7,14,827 രൂപയായി.

നിങ്ങൾക്ക് ഇതേ സ്കീം ഒരു 5 വർഷത്തേക്ക് കൂടി നീട്ടാൻ സാധിക്കും. അങ്ങനെ ചെയ്താൽ ഇപ്പോഴത്തെ സമ്പാദ്യത്തിന്റെ ഇരട്ടി നേടാം. അതായത് 5 വർഷത്തേക്ക് നീട്ടിയാൽ മൊത്തം കാലാവധി 10 വർഷമാവും. ഇപ്പോൾ 10 വർഷത്തിനുള്ളിൽ നിങ്ങൾ നിക്ഷേപിച്ച തുക 12,00000 രൂപയും അതിന് ലഭിക്കുന്ന പലിശ 5,08,546 രൂപയും ആയിരിക്കും. അങ്ങനെയെങ്കിൽ 10 വർഷത്തെ കാലാവധി പൂർത്തിയായാൽ നിങ്ങൾക്ക് മൊത്തം തുകയായി 17,08,546 ലക്ഷം രൂപ ലഭിക്കും.