പിഎഫ് വിഹിതം ഉയര്‍ത്തൂ; നികുതിയിളവ് നേടാം

രണ്ടര ലക്ഷത്തില്‍ കൂടുതലുള്ള പിഎഫ് നിക്ഷേപങ്ങള്‍ക്ക് നികുതി ഈടാക്കുമെന്ന കേന്ദ്ര ബജറ്റിലെ തീരുമാനം അഞ്ച് ലക്ഷം രൂപ വരെയുള്ള നിക്ഷേപത്തിലെ പലിശയ്ക്ക് മേല്‍ നികുതി ഈടാക്കില്ല എന്ന് പുതുക്കിയതായി കേന്ദ്ര ധനമന്ത്രി നിര്‍മല സീതാരാമന്‍ അറിയിച്ചു. ഇതോടെ പിഎഫ് വിഹിതമുള്ള കേന്ദ്ര സംസ്ഥാന ജീവനക്കാര്‍ക്ക് തങ്ങളുടെ പിഎഫ് വിഹിതം ഉയര്‍ത്തുന്ന കാര്യം ഇനി ഗൗരവമായി പരിഗണിക്കാം.

പിഎഫിന്റെ ഭാഗമായ ഒരു ശതമാനം പേര്‍ മാത്രമേ നികുതിയുടെ പരിധിയില്‍ വരുന്നുള്ളൂ എന്നും ധനമന്ത്രി ലോക് സഭയില്‍ അറിയിച്ചു. ഒരു വ്യക്തിയുടെ അടിസ്ഥാന ശമ്പളത്തിന്റെ ആറു ശതമാനമാണ് ഏറ്റവും കുറഞ്ഞ ജിപിഎഫ് വിഹിതം. പരമാവധി നിക്ഷേപ തുക അടിസ്ഥാന ശമ്പളത്തെക്കാള്‍ കൂടാനും പാടില്ല.

ബാങ്കുകളേക്കാള്‍ ഉയര്‍ന്ന പലിശനിരക്കാണ് GPF/EPF/KASEPF തുടങ്ങിയവ വാഗ്ദാനം ചെയ്യുന്നത്. 7.75 ശതമാനം മുതല്‍ 8.25 ശതമാനം വരെ വാര്‍ഷിക പലിശ നല്‍കുന്ന പിഎഫ് നിക്ഷേപങ്ങള്‍ ബാങ്ക് പലിശ കുറഞ്ഞുകൊണ്ടിരിക്കുന്ന നിലവിലെ പശ്ചാത്തലത്തില്‍ ഏറെ ആകര്‍ഷകമാണ്. ചെറുകിട, ഇടത്തരം നിക്ഷേപകര്‍ ഇനി കൂടുതല്‍ ഇവയിലേക്ക് ആകൃഷ്ടരാകും. നിക്ഷേപങ്ങള്‍ക്ക് ആദായനികുതി നിയമത്തിലെ സെക്ഷന്‍ 80 C അനുസരിച്ച് 1,50,000 രൂപ വരെ ആദായനികുതിയിളവും ലഭിക്കും.

കേരള സര്‍ക്കാര്‍ ജീവനക്കാര്‍ക്കും അധ്യാപകര്‍ക്കും പിഎഫ് അക്കൗണ്ടില്‍നിന്ന് ആറു മാസം കൂടുമ്പോള്‍ താല്‍ക്കാലിക വായ്പയെടുക്കാം. സര്‍വീസില്‍ പത്തു വര്‍ഷം പൂര്‍ത്തിയാക്കിയവര്‍ക്ക് തിരിച്ചടയ്‌ക്കേണ്ടതില്ലാത്ത വായ്പയും എടുക്കാം. ഇതെല്ലാം പലിശരഹിത വായ്പകളാണെന്നതാണ് ഏറെ ശ്രദ്ധേയം.

അപ്പോള്‍ ഇനിയും വൈകാതെ പിഎഫ് നിക്ഷേപത്തിനായി ധൈര്യമായി തയ്യാറെടുത്തോളൂ.