5 വർഷത്തേക്ക് 10 ലക്ഷം നിക്ഷേപിക്കാം, പലിശയായി 4.5 ലക്ഷം നേടാം; പോസ്റ്റ് ഓഫീസിന്റെ മികച്ച സ്കീം

ബാങ്കുകളെപ്പോലെ തന്നെ മികച്ച നിക്ഷേപ പദ്ധതികൾ പോസ്റ്റ് ഓഫീസുകളും വാഗ്‌ദാനം ചെയ്യുന്നുണ്ട്. സാധാരണക്കാർക്ക് അനുയോജ്യമായ തരത്തിലുള്ള നിരവധി നിക്ഷേപ സ്കീമുകൾ പോസ്റ്റ് ഓഫീസിലുണ്ട്. ഇത്തരത്തിലുള്ള നിരവധി സ്കീമുകളിൽ ഒന്നാണ് നാഷണൽ സേവിംഗ്സ് സർട്ടിഫിക്കറ്റുകൾ (NSC). സുരക്ഷിത നിക്ഷേപത്തോടൊപ്പം ഉയർന്ന പലിശ ആഗ്രഹിക്കുന്ന ആളുകൾക്കായി പ്രത്യേകം രൂപകൽപ്പന ചെയ്തിട്ടുള്ളതാണ് ഈ സ്കീം.

ഈ സ്കീമിൽ 5 വർഷത്തേക്ക് പണം നിക്ഷേപിച്ചാൽ പലിശ ഇനത്തിൽ നല്ലൊരു തുക നേടാൻ സാധിക്കും. നിക്ഷേപ കാലാവധി പൂർത്തിയാകുമ്പോൾ, നിക്ഷേപ തുകയ്ക്കൊപ്പം മികച്ച പലിശയുടെ ആനുകൂല്യം ലഭിക്കുന്ന ഒരു നിക്ഷേപ പദ്ധതിയാണ് എൻഎസ്‌സി. പോസ്റ്റ് ഓഫീസിന്റെ ഈ സ്കീമിൽ 7.7% പലിശ ലഭിക്കുന്നു. എൻഎസ്‌സിയുടെ നേട്ടങ്ങളും 10 ലക്ഷം നിക്ഷേപിച്ചാൽ ലഭിക്കുന്ന പലിശ എത്രയാണെന്നും അറിഞ്ഞിരിക്കാം.

1000 രൂപ മുതൽ നിക്ഷേപം തുടങ്ങാം

എൻ‌എസ്‌സിയിൽ 1000 മുതൽ നിക്ഷേപം തുടങ്ങാം. പരമാവധി നിക്ഷേപത്തിന് പരിധിയില്ല. അതായത്, ഈ പദ്ധതിയിൽ നിങ്ങൾക്ക് എത്ര തുക വേണമെങ്കിലും നിക്ഷേപിക്കാം. ഏതൊരു പൗരനും ഈ സ്കീമിൽ അക്കൗണ്ട് തുറക്കാം. ജോയിന്റ് അക്കൗണ്ടിനുള്ള സൗകര്യവുമുണ്ട്. രണ്ടോ മൂന്നോ പേർക്ക് ഒരുമിച്ച് ഒരു ജോയിന്റ് അക്കൗണ്ട് തുറക്കാം. മാതാപിതാക്കൾക്കോ ​​രക്ഷിതാക്കൾക്കോ ​​പ്രായപൂർത്തിയാകാത്തവരുടെ പേരിൽ നിക്ഷേപിക്കാം. അതേസമയം, 10 ​​വയസ് വരെയുള്ള കുട്ടികൾക്ക് അവരുടെ പേരിൽ മാതാപിതാക്കൾക്കോ ​​രക്ഷിതാക്കൾക്കോ എൻഎസ്‌സി പദ്ധതിയിൽ അക്കൗണ്ട് തുറക്കാം. ഒരേസമയം ഒന്നിലധികം എൻഎസ്‌സി അക്കൗണ്ടുകൾ തുറക്കാനും സാധിക്കും.

നിക്ഷേപ കാലാവധി 5 വർഷം

ദീർഘനാൾ പണം നിക്ഷേപിക്കേണ്ടതില്ല എന്നതാണ് ഈ പദ്ധതിയുടെ മറ്റൊരു നേട്ടം. ഈ സ്കീം വെറും 5 വർഷത്തിനുള്ളിൽ കാലാവധി പൂർത്തിയാകും. വാർഷിക അടിസ്ഥാനത്തിൽ പലിശ കൂട്ടുകയും ഉറപ്പായ വരുമാനം ലഭിക്കുകയും ചെയ്യും. നിക്ഷേപ സമയത്ത് നിലവിലുള്ള പലിശ നിരക്ക് അനുസരിച്ചാണ് 5 വർഷത്തേക്കുള്ള പലിശ കണക്കാക്കുന്നത്. അതിനിടയിൽ പലിശ നിരക്ക് മാറിയാലും, അത് നിക്ഷേപത്തെ ബാധിക്കില്ല. സെക്ഷൻ 80C പ്രകാരം നിക്ഷേപിക്കുന്ന തുകയ്ക്ക് നികുതി ഇളവ് ലഭ്യമാണ്. അതായത്, എല്ലാ വർഷവും 1.50 ലക്ഷം രൂപ വരെയുള്ള നിക്ഷേപങ്ങൾക്ക് നികുതി ഇളവ് ലഭിക്കും.

ഭാഗിക പിൻവലിക്കൽ സൗകര്യമില്ല

മറ്റ് സ്കീമുകളെപ്പോലെ, ഇതിലും ഭാഗിക പിൻവലിക്കൽ ഇല്ല. അതായത് 5 വർഷത്തിനുശേഷം മാത്രമേ, നിങ്ങൾക്ക് മുഴുവൻ തുകയും ലഭിക്കുകയുള്ളൂ. പ്രീമെച്വർ ക്ലോഷർ പ്രത്യേക സാഹചര്യങ്ങളിൽ മാത്രമേ അനുവദിക്കൂ.

10 ലക്ഷം രൂപ നിക്ഷേപിച്ചാൽ എത്ര കിട്ടും

നാഷണൽ സേവിംഗ്സ് സർട്ടിഫിക്കറ്റിൽ 10 ലക്ഷം രൂപ നിക്ഷേപിച്ചാൽ, 7.7 എന്ന പലിശ നിരക്ക് അനുസരിച്ച്, നിങ്ങൾക്ക് 4,49,034 രൂപ പലിശയായി ലഭിക്കും. അതായത് ഏകദേശം 4.5 ലക്ഷം രൂപ. അങ്ങനെയെങ്കിൽ, 5 വർഷത്തിനുശേഷം നിങ്ങൾക്ക് ലഭിക്കുന്നത് 14,49,034 രൂപയായിരിക്കും.

രാജ്യത്തെ ഏത് പോസ്റ്റ് ഓഫീസിലും ഈ സ്കീം തുടങ്ങി ആനുകൂല്യങ്ങൾ നേടാൻ സാധിക്കും. നികുതി ആനുകൂല്യങ്ങളും 5 വർഷത്തെ ലോക്ക്-ഇൻ കാലാവധിയും, ഉറപ്പായ വരുമാനവും ആഗ്രഹിക്കുന്ന നിക്ഷേപകർക്ക് പോസ്റ്റ് ഓഫീസ് നാഷണൽ സേവിംഗ്സ് സർട്ടിഫിക്കറ്റ് അനുയോജ്യമാണ്. ഒരു സാമ്പത്തിക ലക്ഷ്യത്തിലേക്കുള്ള യാത്രയാണെങ്കിൽ ഉയർന്ന വരുമാനം ലഭിക്കുന്നത് പോസ്റ്റ് ഓഫീസ് നാഷണൽ സേവിംഗ്സ് സർട്ടിഫിക്കറ്റ് സ്കീം അനുയോജ്യമാണ്.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.