ദിവസം 400 രൂപ മാറ്റിവച്ചാല്‍ നേടാം 1.78 ലക്ഷം രൂപയുടെ പ്രതിമാസ പെന്‍ഷന്‍

കേന്ദ്ര സര്‍ക്കാര്‍ ആവിഷ്‌ക്കരിച്ചു നടപ്പിലാക്കുന്ന ഒരു റിട്ടയര്‍മെന്റ് നിക്ഷേപ പദ്ധതിയാണ് നാഷണല്‍ പെന്‍ഷന്‍ സിസ്റ്റം അഥവാ എന്‍പിഎസ്. എന്‍പിഎസില്‍ നിക്ഷേപം നടത്തുന്നതോടെ റിട്ടയര്‍മെന്റിന് ശേഷമുള്ള ജീവിതത്തെക്കുറിച്ചുള്ള സാമ്പത്തിക ആശങ്കകളെല്ലാം നമുക്ക് ഒഴിവാക്കാം. നിക്ഷേപ വിദഗ്ധരുടെ അഭിപ്രായങ്ങള്‍ പ്രകാരം ഒരു വ്യക്തി മാസം 12,000 രൂപ എന്‍പിഎസ് നിക്ഷേപത്തിനായി മാറ്റി വച്ചാല്‍ റിട്ടയര്‍മെന്റിന് ശേഷം 1.78 ലക്ഷം രൂപ പ്രതിമാസ പെന്‍ഷന്‍ നേടുവാന്‍ അയാള്‍ക്ക് സാധിക്കും. ഇതിനായി നിക്ഷേപകന്‍ സിസ്റ്റമെറ്റിക് വിത്‌ഡ്രോവല്‍ പ്ലാന്‍ ആണ് നിക്ഷേപ രീതിയായി തെരഞ്ഞെടുക്കേണ്ടത്.

എന്‍പിഎസ് നിക്ഷേപത്തില്‍ നിന്നും

നിക്ഷേപ തുകയുടെ 75 ശതമാനം വരെ നിക്ഷേപകന് ഇക്വിറ്റി അഥവാ ഓഹരികളില്‍ നിക്ഷേപം നടത്താവുന്നതാണ്. എങ്കിലും റിസ്‌ക് ഏറ്റെടുക്കുവാന്‍ താത്പര്യം കുറഞ്ഞ വ്യക്തികളാണെങ്കില്‍ 60 ശതമാനം ഇക്വുറ്റി, 40 ശതമാനം ഡെബ്റ്റ് എന്നീ രീതിയില്‍ നിക്ഷേപ അനുപാതം തെരഞ്ഞെടുക്കാം. ഈ രീതിയില്‍ നിക്ഷേപം നടത്തിയാല്‍ ദീര്‍ഘകാലാടിസ്ഥാനത്തില്‍ എന്‍പിഎസ് നിക്ഷേപത്തില്‍ നിന്നും നിക്ഷേപകന് ലഭിക്കുന്ന ആദായം 10 ശതമാനമായിരിക്കും.

12,000 രൂപ വീതം മാസം എന്‍പിഎസില്‍ നിക്ഷേപിച്ചാല്‍

ഒരു നിക്ഷേപകന്‍ 60:40 അനുപാതത്തില്‍ 12,000 രൂപ വീതം മാസം എന്‍പിഎസില്‍ നിക്ഷേപം നടത്തുകയും, മെച്യൂരിറ്റി തുകയില്‍ 40 ശതമാനം ആന്വുറ്റി പ്ലാന്‍ വാങ്ങിക്കുന്നതിനായി മാറ്റി വയ്ക്കുകയും ചെയ്താല്‍ അയാള്‍ക്ക് ലഭിക്കുന്ന തുക 1,64,11,142 രൂപയായിരിക്കും. ആന്വുറ്റി പ്ലാനില്‍ നിന്നും 6 ശതമാനം മാത്രം ആദായം പ്രതീക്ഷിച്ചാല്‍ അയാള്‍ക്ക് ലഭിക്കുന്ന പെന്‍ഷന്‍ തുക 54,704 രൂപയാണ്.

സിസ്റ്റമെറ്റിക് വിത്‌ഡ്രോവല്‍ പ്ലാനില്‍ നിക്ഷേപം നടത്തിയാല്‍

അത്തരമൊരു സാഹചര്യത്തില്‍ മുകളില്‍ പറഞ്ഞിരിക്കുന്ന ഈ 1.64 കോടി രൂപ ഒരു സിസ്റ്റമെറ്റിക് വിത്‌ഡ്രോവല്‍ പ്ലാനില്‍ നിക്ഷേപം നടത്തിയാല്‍ ഓരോ മാസവും ്അയാള്‍ക്ക് എത്ര തുക ലഭിക്കും. ഒപ്റ്റിമ മണി മാനേജേഴ്‌സ് എംഡി& സിഇഒ പങ്കജ് മത്പാല്‍ പറയുന്നത് 25 വര്‍ഷത്തേക്ക് 1.64 കോടി രൂപ സിസ്റ്റമെറ്റിക് വിത്ത്‌ഡ്രോവല്‍ പ്ലാനില്‍ നിക്ഷേപം നടത്തിയാല്‍ അയാള്‍ക്ക് ഓരോ മാസവും 1,23,560 രൂപയുടെ ആദായം ലഭിക്കുമെന്നാണ്. എട്ട് ശതമാനം ആദായം പ്രതീക്ഷിക്കുമ്പോഴുള്ള നേട്ടമാണിത്.

മാസം 1.70 ലക്ഷം രൂപ പെന്‍ഷനായി

നിങ്ങള്‍ക്ക് മാസം 1.70 ലക്ഷം രൂപ പെന്‍ഷനായി സ്വന്തമാക്കണമെങ്കില്‍ 50 ശതമാനം ഇക്വിറ്റിയിലും 50 ശതമാനം ഡെബിറ്റ് രീതിയിലാണ് എന്‍പിഎസ് നിക്ഷേപം നടത്തേണ്ടത്. മാസം 12,000 രൂപ വീതമുള്ള നിക്ഷേപമാണ് ഇവിടെ കണക്കാക്കുന്നത്. അതായത് ദിവസം 400 രൂപാ വീതം നിക്ഷേപം. എങ്കില്‍ നിക്ഷേപകന് സിസ്റ്റമെറ്റിക് വിത്‌ഡ്രോവല്‍ പ്ലാനിലൂടെ 1.02 ലക്ഷം രൂപയും ആന്വുറ്റി ആദായമായി 68,330 രൂപയും ലഭിക്കും.

1.78 ലക്ഷം രൂപ പ്രതിമാസ പെന്‍ഷന്‍

ഇനി 1.78 ലക്ഷം രൂപ പ്രതിമാസ പെന്‍ഷന്‍ നേടുന്നതിനായി 12,000 രൂപ പ്രതിമാസ നിക്ഷേപത്തിന്റെ 40 ശതമാനമാണ് ആന്വുറ്റി പ്ലാനില്‍ നിക്ഷേപിക്കേണ്ടത്. എങ്കില്‍ സിസ്റ്റമെറ്റിക് വിത്‌ഡ്രോവല്‍ പ്ലാനില്‍ നിന്നും 1.23 ലക്ഷം രൂപയും, 54,704 രൂപയും ഒരു മാസത്തില്‍ ലഭിക്കും. അങ്ങനെ ആകെ 1.78 ലക്ഷം രൂപ.