25000 നിക്ഷേപിച്ച് 8 കോടി നേടാൻ എത്ര വർഷമെടുക്കും? ചിട്ടിയേക്കാൾ മികച്ചതോ എസ്ഐപി?

നിങ്ങളൊരു ജോലിയുള്ള വ്യക്തിയോ, ചെറുകിട ബിസിനസ് ഉടമയോ അല്ലെങ്കിൽ ഒരു സാധാരണ വ്യക്തിയോ ആകട്ടെ, റിട്ടയർമെന്റിനായി ഫണ്ട് ആസൂത്രണം ചെയ്യേണ്ടത് അത്യാവശ്യമാണ്. ഇതിലൂടെ വിരമിക്കലിന് ശേഷം ദൈനംദിന ചെലവുകൾക്കായി മറ്റുള്ളവരെ ആശ്രയിക്കേണ്ടിവരില്ലെന്ന് ഉറപ്പാക്കാം. നല്ലൊരു റിട്ടയർമെന്റ് സമ്പാദ്യംകെട്ടിപ്പടുക്കുന്നതിന് നിരവധി ഓപ്ഷനുകൾ ലഭ്യമാണ്. അതിൽ ഫലപ്രദമായ ഒരു മാർഗം എസ്ഐപികളിൽ നിക്ഷേപിക്കുക എന്നതാണ്.

മൂച്വൽഫണ്ടുകളിൽ തവണ വ്യവസ്ഥയിലൂടെ നിക്ഷേപിക്കാവുന്ന മാർഗമാണ് സിസ്റ്റമാറ്റിക് ഇൻവെസ്റ്റ്മെന്റ് പ്ലാനുകൾ (എസ്ഐപി). ഇഷ്ടമുള്ള ഒരു മ്യൂച്വല്‍ ഫണ്ടില്‍ നിങ്ങളുടെ സൗകര്യത്തിനനുസരിച്ച് നിശ്ചിത തുക വ്യത്യസ്ത തവണകളായി നിക്ഷേപിക്കാം. ഈ സൗകര്യമാണ് സിസ്റ്റമാറ്റിക് ഇന്‍വെസ്റ്റ്‌മെന്റ് പ്ലാനിന്റെ പ്രത്യേകതയും.

ഒറ്റയടിക്ക് വൻ തുക നിക്ഷേപിക്കുന്നതിന് പകരം ദിവസം, ആഴ്ച, മാസം, ത്രൈമാസം എന്നിങ്ങനെ മൂച്വൽ ഫണ്ടിൽ നിക്ഷേപം നടത്തുന്നതിനുള്ള സൗകര്യമാണ് എസ്ഐപി നൽകുന്നത്. തവണകളായി ചെറിയ തുകകൾ അടയ്ക്കാം എന്നതിനാൽ സാധാരണക്കാർക്കിടയിലും എസ്ഐപിയോട് താൽപര്യം കൂടിയിട്ടുണ്ട്. ഓഹരിയധിഷ്ഠിത അഥവാ ഇക്വിറ്റി മ്യൂച്ചൽ ഫണ്ടുകളോടാണ് നിക്ഷേപകർക്ക് കൂടുതൽ താൽപര്യമെന്ന് കണക്കുകൾ കാണിക്കുന്നു.

കുറഞ്ഞ് 100 രൂപ മുതൽ തവണവ്യവസ്ഥയിലൂടെ എസ്ഐപിയിൽ നിക്ഷേപം നടത്താം. എത്ര നേരത്തെ നിക്ഷേപിക്കുന്നുവോ, അത്രയും നേരത്തെ വലിയൊരു തുക സമ്പാദിക്കാൻ സാധിക്കും. വർഷം കഴിയുന്തോറും എസ്ഐപിയിൽ നിക്ഷേപിക്കുന്നവരുടെ എണ്ണം കൂടി വരുന്നുണ്ട്.

പ്രതിമാസം 25,000 നിക്ഷേപിച്ച് 8 കോടി നേടാം

എസ്ഐപിയിൽ 25,000 രൂപ പ്രതിമാസം നിക്ഷേപിച്ച് 8 കോടി റിട്ടയർമെന്റ് സമ്പാദ്യം നേടിയെടുക്കാൻ സാധിക്കും. എത്ര വർഷത്തിനുള്ളിൽ നിങ്ങളുടെ നിക്ഷേപം 8 കോടിയായി മാറുമെന്ന് നോക്കാം. ശരാശരി 12 ശതമാനം റിട്ടേൺ നിരക്ക് കണക്കാക്കിയാൽ, 8 കോടി രൂപയുടെ സമ്പാദ്യം നേടാൻ നിങ്ങൾ 30 വർഷത്തേക്ക് നിക്ഷേപിക്കേണ്ടതുണ്ട്.

30 വർഷത്തിനുള്ളിൽ, പ്രതിമാസം 25,000 രൂപ നിക്ഷേപം കണക്കാക്കുമ്പോൾ നിങ്ങളുടെ മൊത്ത നിക്ഷേപ തുക 90,00,000 രൂപയാണ്. പലിശ നിരക്ക് 12 ശതമാനമായി കണക്കാക്കിയാൽ, 30 വർഷത്തിനുള്ളിൽ പലിശ ഇനത്തിൽ 7,92,47,844 രൂപ ലഭിക്കും. 30 വർഷം പൂർത്തിയാവുമ്പോൾ നിക്ഷേപ തുകയും പലിശയും ഉൾപ്പെടെ നിങ്ങൾക്ക് ആകെ 8,82,47,844 രൂപ ലഭിക്കും.