10 കോടി രൂപയുണ്ടെങ്കിൽ റിട്ടയർമെന്റ് ജീവിതം സുരക്ഷിതമാകുമോ? കണക്കുകൾ പറയുന്നത് ഇങ്ങനെ...

റിട്ടയർമെന്റ് കാലത്തേക്ക് എത്ര രൂപ സമ്പാദിച്ചു വെക്കണം എന്ന ചോദ്യത്തിന് മിക്കവരും പറയുന്ന ഒരു മാന്ത്രിക സംഖ്യയാണ് '10 കോടി'. എന്നാൽ ഇന്നത്തെ കാലത്ത് പത്തു കോടി രൂപ എന്നത് ഒരു സുരക്ഷിതമായ റിട്ടയർമെന്റിന് ഒട്ടും മതിയാകില്ലെന്നാണ് സാമ്പത്തിക വിദഗ്ധർ ചൂണ്ടിക്കാണിക്കുന്നത്. കേൾക്കുമ്പോൾ അല്പം അമ്പരപ്പ് തോന്നുമെങ്കിലും ഇതിന് പിന്നിലെ കാരണങ്ങൾ ഗൗരവകരമാണ്.

1. പണപ്പെരുപ്പത്തിന്റെ കാണാച്ചരടുകൾ

ഇന്ന് പത്തു കോടി രൂപ എന്നത് വലിയൊരു തുകയായി നമുക്ക് തോന്നാം. എന്നാൽ ശരാശരി 6 മുതൽ 7 ശതമാനം വരെ പണപ്പെരുപ്പം കണക്കിലെടുത്താൽ, ഏതാനും വർഷങ്ങൾ കഴിയുമ്പോൾ ഈ തുകയുടെ മൂല്യം കുത്തനെ ഇടിയും. ഭാവിയിലെ പത്തു കോടി രൂപ എന്നത് ഇന്നത്തെ ഒന്നര കോടി രൂപയ്ക്ക് തുല്യമായിരിക്കും. നികുതി കഴിഞ്ഞ് കയ്യിൽ കിട്ടുന്ന തുക വർഷത്തിൽ 10-12 ലക്ഷം രൂപ മാത്രമായി ചുരുങ്ങും.

2. നഗരജീവിതത്തിലെ വർദ്ധിച്ച ചെലവുകൾ

നഗരങ്ങളിൽ താമസിക്കുന്നവർക്ക് വീട്, യാത്ര, ദൈനംദിന ജീവിതം എന്നിവയ്ക്കായി വലിയൊരു തുക ചെലവാക്കേണ്ടി വരുന്നുണ്ട്. കേവലം അടിസ്ഥാന ആവശ്യങ്ങൾക്കപ്പുറം ജീവിതനിലവാരം നിലനിർത്താൻ വലിയൊരു തുക തന്നെ നീക്കിവെക്കേണ്ടി വരും. 25 മുതൽ 30 വർഷം വരെയുള്ള റിട്ടയർമെന്റ് കാലഘട്ടത്തിലേക്ക് നിലവിലുള്ള സമ്പാദ്യം തികയണമെങ്കിൽ ഇനിയും കൂടുതൽ പ്ലാനിംഗ് അത്യാവശ്യമാണ്.

3. ചികിത്സാ ചെലവുകൾ

പണപ്പെരുപ്പത്തേക്കാൾ വേഗത്തിലാണ് രാജ്യത്ത് ചികിത്സാ ചെലവുകൾ വർദ്ധിക്കുന്നത്. പ്രായമാകുമ്പോൾ അപ്രതീക്ഷിതമായി എത്തുന്ന രോഗങ്ങൾ നിങ്ങളുടെ സമ്പാദ്യത്തെ പെട്ടെന്ന് ഇല്ലാതാക്കാം. "പിന്നീട് വലിയൊരു തുക മാറ്റിവെക്കാം" എന്ന ചിന്ത അപകടകരമാണ്.

4. മനോഹരമായ അക്കങ്ങളല്ല, യാഥാർത്ഥ്യമാണ് പ്രധാനം

പത്തു കോടി അല്ലെങ്കിൽ അഞ്ചു കോടി എന്നിങ്ങനെയുള്ള വട്ടത്തിലുള്ള സംഖ്യകൾ കേൾക്കാൻ നല്ലതാണ്. എന്നാൽ നമ്മുടെ വ്യക്തിപരമായ ആവശ്യങ്ങൾ, കുടുംബത്തിന്റെ സാഹചര്യം, ഭാവിയിലെ ലക്ഷ്യങ്ങൾ എന്നിവ മുൻനിർത്തി വേണം റിട്ടയർമെന്റ് ഫണ്ട് കണക്കാക്കാൻ. വെറും ഒരു സംഖ്യയെ വിശ്വസിക്കാതെ യാഥാർത്ഥ്യബോധത്തോടെയുള്ള സാമ്പത്തിക ആസൂത്രണം നടത്തുകയാണ് വേണ്ടത്.

പണപ്പെരുപ്പം നിങ്ങളുടെ സമ്പാദ്യത്തെ നിശബ്ദമായി കാർന്നുതിന്നും. ജീവിതശൈലിയിലെ മാറ്റങ്ങളും ചികിത്സാ ചെലവുകളും എപ്പോൾ വേണമെങ്കിലും നിങ്ങളെ പ്രതിസന്ധിയിലാക്കാം. അതിനാൽ ഇന്ന് തന്നെ കൃത്യമായ പ്ലാനിംഗ് തുടങ്ങുക.