ഭവന വായ്പയോ കാർ വായ്പയോ ഉണ്ടെങ്കിൽ വ്യക്തിഗത വായ്പയ്ക്ക് അപേക്ഷിക്കാൻ കഴിയുമോ?

ഇന്ത്യയിൽ, പ്രത്യേകിച്ച് നഗരപ്രദേശങ്ങളിലെ പ്രൊഫഷണലുകൾക്കിടയിൽ, വ്യക്തിഗത വായ്പകൾക്കുള്ള ആവശ്യം കുതിച്ചുയരുകയാണ്. എന്നാൽ, നിങ്ങൾക്ക് ഒന്നിലധികം വ്യക്തിഗത വായ്പകൾ എടുക്കാൻ സാധിക്കുമോ? നിലവിൽ ഒരു ഭവന വായ്പയോ കാർ വായ്പയോ ഉള്ളയാൾക്ക് പുതിയൊരു വ്യക്തിഗത വായ്പ ലഭിക്കാൻ എത്രത്തോളം സാധ്യതയുണ്ട്?

നിലവിലുള്ള വായ്പകളുടെ ചരിത്രം പുതിയ വായ്പ യോഗ്യതയെ നിർണ്ണയിക്കുന്നതിൽ നിർണായക പങ്ക് വഹിക്കുന്നു. ഫിക്സഡ് ഒബ്ലിഗേഷൻ ടു ഇൻകം റേഷ്യോ (FOIR), ക്രെഡിറ്റ് സ്കോർ, റിസർവ് ബാങ്ക് ഓഫ് ഇന്ത്യ പുറത്തിറക്കിയ പുതിയ മാർഗനിർദ്ദേശങ്ങൾ എന്നിവയെല്ലാം ഇതിൽ പ്രധാനമാണ്. നിങ്ങളുടെ മൊത്തം മാസ വരുമാനത്തിന്റെ എത്ര ശതമാനമാണ് നിലവിൽ സ്ഥിരമായ സാമ്പത്തിക ബാധ്യതകൾക്കായി (ഇ.എം.ഐ-കൾ) ചെലവഴിക്കുന്നത് എന്ന് അളക്കുന്നതിനാണ് എഫ്ഒഐആർ ഉപയോഗിക്കുന്നത്. ഇത് 50% ന് താഴെയായിരിക്കുന്നിടത്തോളം, നിങ്ങൾക്ക് ലോണിന് യോഗ്യതയുണ്ട്.

ആർബിഐയുടെ നിബന്ധനകൾ

നിങ്ങൾ നിലവിൽ അടച്ചുകൊണ്ടിരിക്കുന്ന വായ്പകളുടെ എണ്ണമല്ല, മറിച്ച് നിങ്ങളുടെ സാമ്പത്തിക ബാധ്യതയുടെ തോതാണ് ഏറ്റവും പ്രധാനം. ആർബിഐയുടെ പുതുക്കിയ നിയമങ്ങൾ അനുസരിച്ച്, മൊത്തം മാസവരുമാനത്തിന്റെ പരമാവധി 50% മാത്രമേ എല്ലാ ലോണുകളുടെയും ഇ.എം.ഐ ആയി അടയ്ക്കാൻ സാധിക്കൂ. നിലവിലുള്ളതും പുതിയതുമായ ലോണുകളുടെ ഇ.എം.ഐകൾ ചേർത്താണ് ഈ പരിധി കണക്കാക്കുന്നത്. 

ഉദാഹരണത്തിന്, നിങ്ങൾക്ക് മാസം 60,000 വരുമാനമുണ്ടെങ്കിൽ, നിങ്ങളുടെ മൊത്തം ഇ.എം.ഐ 30,000 ൽ കൂടാൻ പാടില്ല. നിലവിലെ ഇ.എം.ഐ 20,000 ആണെങ്കിൽ, പുതിയ ലോണിനുള്ള പരമാവധി ഇ.എം.ഐ 10,000 ആയിരിക്കും. 

ബാങ്കുകളും എൻബിഎഫ്സികളും ഇനിമുതൽ ഓരോ മാസത്തിനു പകരം 15 ദിവസത്തിലൊരിക്കൽ ക്രെഡിറ്റ് ഡാറ്റ റിപ്പോർട്ട് ചെയ്യണം. ഇതുവഴി, നിങ്ങൾ എടുത്ത പുതിയ ലോണുകൾ ദിവസങ്ങൾക്കുള്ളിൽ തന്നെ എല്ലാ ബാങ്കുകൾക്കും അറിയാൻ കഴിയും. ഒറ്റയടിക്ക് നിരവധി ലോണുകൾ എടുക്കുന്നത് ഇത് തടയുന്നു. ഒരു തവണ ഇ.എം.ഐ മുടങ്ങിയാൽ പോലും അത് നിങ്ങളുടെ പുതിയ ലോൺ യോഗ്യതയെ ഉടനടി ബാധിക്കും.

ക്രെഡിറ്റ് കാർഡ് ബാധ്യത എങ്ങനെ ബാധിക്കും?

ക്രെഡിറ്റ് കാർഡിലെ കുടിശ്ശികയുള്ള തുക ലോൺ എടുക്കാനുള്ള ശേഷിയെ ഗണ്യമായി കുറയ്ക്കും. ചില ബാങ്കുകൾ ഈ തുകയ്ക്ക് ഒരു നോഷണൽ ഇ.എം.ഐ കണക്കാക്കാറുണ്ട്. 2 ലക്ഷം രൂപയുടെ ക്രെഡിറ്റ് കാർഡ് കടം, പുതിയ ലോൺ എടുക്കാനുള്ള ശേഷി കുറച്ചേക്കാം. പേഴ്സണൽ ലോണിന് അപേക്ഷിക്കുന്നതിനു മുൻപ് ക്രെഡിറ്റ് കാർഡ് കുടിശ്ശികകൾ അടച്ചു തീർക്കുന്നത് നിങ്ങളുടെ യോഗ്യത വർദ്ധിപ്പിക്കാൻ സഹായിക്കും.

ഒന്നിലധികം വായ്പകൾക്കുള്ള യോഗ്യത മെച്ചപ്പെടുത്താനുള്ള 5 വഴികൾ

* കടങ്ങൾ ഏകീകരിക്കുക: ഒന്നിലധികം ചെറിയ ലോണുകൾ ഒരു വലിയ ലോണിലേക്ക് ഏകീകരിക്കുന്നത് നിങ്ങളുടെ പ്രൊഫൈൽ മെച്ചപ്പെടുത്താൻ സഹായിക്കും. കുറഞ്ഞ എണ്ണം ബാധ്യതകളുള്ളവരെയാണ് ബാങ്കുകൾക്ക് കൂടുതൽ ഇഷ്ടം.

* ആവശ്യമില്ലാത്ത ലോണുകൾ അടച്ചു തീർക്കുക: നിങ്ങളുടെ എഫ്ഒഐആർ കുറയ്ക്കാൻ, സാധിക്കുമെങ്കിൽ ചെറിയ ലോണുകൾ നേരത്തെ അടച്ചു തീർക്കുക. ഇത് ക്രെഡിറ്റ് റിപ്പോർട്ടിൽ വന്നാലുടൻ പുതിയ ലോൺ യോഗ്യത കൂടും.

* ക്രെഡിറ്റ് റിപ്പോർട്ട് പരിശോധിക്കുക: അപേക്ഷിക്കുന്നതിന് മുൻപ് ക്രെഡിറ്റ് റിപ്പോർട്ടിൽ പിശകുകളോ തെറ്റുകളോ ഇല്ലെന്ന് ഉറപ്പാക്കുക.

* ക്രെഡിറ്റ് ഉപയോഗം പരിമിതപ്പെടുത്തുക: ക്രെഡിറ്റ് കാർഡ് ഉപയോഗം ലഭ്യമായ പരിധിയുടെ 30% ആയി നിലനിർത്തുക.

* അപേക്ഷകൾക്കിടയിൽ ഇടവേള നൽകുക: ഒരു ലോൺ അടച്ചു തീർത്ത് അല്ലെങ്കിൽ ഒരു ലോൺ അപേക്ഷ നിരസിക്കപ്പെട്ട് കുറഞ്ഞത് 30 ദിവസമെങ്കിലും കഴിഞ്ഞ ശേഷം മാത്രം പുതിയ അപേക്ഷകൾ നൽകുക. ഇത് ക്രെഡിറ്റ് സ്കോറിനെ ബാധിക്കുന്ന അനാവശ്യമായ 'ഹാർഡ് എൻക്വയറികൾ' ഒഴിവാക്കാൻ സഹായിക്കും.