പെൺകുട്ടികളുടെ ഭാവി സുരക്ഷിതമാക്കാൻ 'സുകന്യ സമൃദ്ധി' മാത്രം മതിയോ? വിദഗ്ധർ പറയുന്നത് ഇങ്ങനെ

പെൺകുട്ടികളുടെ വിദ്യാഭ്യാസവും വിവാഹവും മുന്നിൽക്കണ്ട് കേന്ദ്ര സർക്കാർ ആവിഷ്കരിച്ച ജനപ്രിയ പദ്ധതിയാണ് സുകന്യ സമൃദ്ധി യോജന. നിലവിൽ 8.2 ശതമാനമെന്ന ആകർഷകമായ പലിശ നിരക്കാണ് ഈ പദ്ധതി വാഗ്ദാനം ചെയ്യുന്നത്. എന്നാൽ, നിങ്ങളുടെ മകളുടെ ഭാവിയിലേക്കായി ഈ ഒരു സമ്പാദ്യം മാത്രം മതിയോ? അതോ മ്യൂച്വൽ ഫണ്ടുകളിലും പി.പി.എഫിലും നിക്ഷേപിക്കേണ്ടതുണ്ടോ? വിദഗ്ദ്ധരുടെ അഭിപ്രായങ്ങൾ നോക്കാം.

എന്താണ് സുകന്യ സമൃദ്ധി യോജന?

'ബേഠി ബച്ചാവോ ബേഠി പഠാവോ' ക്യാമ്പയിന്റെ ഭാഗമായി തുടങ്ങിയ ഈ പദ്ധതി, ഒരു പെൺകുട്ടിക്ക് 10 വയസ്സ് തികയുന്നതിന് മുൻപ് രക്ഷിതാക്കൾക്ക് ആരംഭിക്കാം. പത്തുവയസ് വരെയുള്ള പെണ്‍കുട്ടികളുടെ പേരില്‍ പോസ്റ്റ് ഓഫീസ് വഴിയോ ബാങ്ക് മുഖേനയോ മാതാപിതാക്കള്‍ക്ക് അക്കൗണ്ട് തുടങ്ങാവുന്നതാണ്. വര്‍ഷം 250 രൂപയാണ് കുറഞ്ഞ നിക്ഷേപം. പ്രതിവര്‍ഷം ഒന്നരലക്ഷം രൂപ വരെ കുട്ടികളുടെ പേരില്‍ അക്കൗണ്ടില്‍ നിക്ഷേപിക്കാം. 8.2 ശതമാനമാണ് പലിശ(ഓരോ പാദത്തിലും സർക്കാർ ഇത് പരിഷ്കരിക്കും). 15 വര്‍ഷമാണ് നിക്ഷേപ കാലാവധി.

15 വര്‍ഷത്തേക്ക് മാത്രമേ നിക്ഷേപം നടത്തേണ്ടതുള്ളൂ. അക്കൗണ്ട് തുറന്ന് 21 വര്‍ഷം ആകുമ്പോഴാണ് കാലാവധി പൂര്‍ത്തിയാകുന്നത്. എന്നാല്‍ നിക്ഷേപ കാലാവധിയായ 15 വര്‍ഷം കഴിഞ്ഞാലും അക്കൗണ്ടില്‍ പലിശ വരവ് വെയ്ക്കും. കുട്ടിക്ക് 18 വയസ്സ് തികയുമ്പോഴോ പത്താം ക്ലാസ് പാസാകുമ്പോഴോ അക്കൗണ്ടില്‍ നിന്ന് 50 ശതമാനം വരെ പണം പിന്‍വലിക്കാം. പെണ്‍കുട്ടിക്ക് 18 വയസ്സ് തികയുകയും വിവാഹിതയാകുകയും ചെയ്താല്‍, അക്കൗണ്ടില്‍ നിന്ന് മുഴുവന്‍ പണവും എടുത്ത് അക്കൗണ്ട് അവസാനിപ്പിക്കാനുള്ള ഓപ്ഷനും ഉണ്ട്.

1.5 ലക്ഷം രൂപ വീതം നിക്ഷേപിച്ചാൽ എത്ര കിട്ടും?

വർഷം തോറും പരമാവധി തുകയായ 1.5 ലക്ഷം രൂപ 15 വർഷത്തേക്ക് നിക്ഷേപിക്കുകയാണെങ്കിൽ (ആകെ നിക്ഷേപം 22.5 ലക്ഷം), 21-ാം വർഷം കാലാവധി എത്തുമ്പോൾ ഏകദേശം 71.82 ലക്ഷം രൂപ തിരികെ ലഭിക്കും.

മറ്റ് നിക്ഷേപങ്ങളുമായുള്ള താരതമ്യം

1. മ്യൂച്വൽ ഫണ്ടുകൾ: ദീർഘകാലാടിസ്ഥാനത്തിൽ നോക്കുമ്പോൾ ഓഹരി വിപണിയുമായി ബന്ധപ്പെട്ട മ്യൂച്വൽ ഫണ്ടുകൾ 12% വരെ റിട്ടേൺ നൽകാൻ സാധ്യതയുണ്ട്. 21 വർഷത്തെ വലിയൊരു കാലയളവിൽ മ്യൂച്വൽ ഫണ്ടുകൾ സുകന്യ സമൃദ്ധിയേക്കാൾ വലിയൊരു തുക നേടിത്തന്നേക്കാം. പണപ്പെരുപ്പത്തെ മറികടക്കാൻ ഇക്വിറ്റി നിക്ഷേപങ്ങൾ സഹായിക്കുമെന്ന് സാമ്പത്തിക വിദഗ്ദ്ധർ ചൂണ്ടിക്കാട്ടുന്നു.

2. പബ്ലിക് പ്രൊവിഡന്റ് ഫണ്ട്: പി.പി.എഫിൽ നിലവിൽ 7.1% ആണ് പലിശ. സുകന്യ സമൃദ്ധിയേക്കാൾ കുറവാണെങ്കിലും, ഇത് കൂടുതൽ ഫ്ലെക്സിബിൾ ആണ്. 15 വർഷമാണ് ഇതിന്റെ കാലാവധി.

വിദഗ്ദ്ധർ പറയുന്നത് എന്ത്?

സുകന്യ സമൃദ്ധി യോജന സുരക്ഷിതമായ ഒരു നിക്ഷേപമാണെങ്കിലും, വർദ്ധിച്ചുവരുന്ന വിദ്യാഭ്യാസ ചെലവുകൾ കണക്കിലെടുക്കുമ്പോൾ ഇത് മാത്രം മതിയാകില്ലെന്ന് വിദഗ്ദ്ധർ അഭിപ്രായപ്പെടുന്നു. ഇന്ന് 15-20 ലക്ഷം രൂപ ചെലവ് വരുന്ന ഉന്നതവിദ്യാഭ്യാസത്തിന് 20 വർഷം കഴിയുമ്പോൾ 60 ലക്ഷം മുതൽ ഒരു കോടി വരെ വേണ്ടി വന്നേക്കാം. മകളുടെ സുരക്ഷിതമായ ഭാവിക്കായി സുകന്യ സമൃദ്ധി യോജനയിൽ നിക്ഷേപിക്കുന്നതിനൊപ്പം തന്നെ, ഒരു നിശ്ചിത ശതമാനം തുക ഇക്വിറ്റി മ്യൂച്വൽ ഫണ്ടുകളിലും നിക്ഷേപിക്കുന്നത് പണപ്പെരുപ്പത്തെ മറികടക്കാനും വലിയൊരു തുക സമ്പാദിക്കാനും സഹായിക്കും.