വീട് വാങ്ങാന്‍ ഇപ്പോള്‍ അനുയോജ്യ സമയമോ?

ഒരു വീട് വാങ്ങാന്‍ പ്ലാന്‍ ഉണ്ടോ ? ഭവന വിപണിയില്‍ പല ഘടകങ്ങളും പ്രവര്‍ത്തിച്ചുകൊണ്ടിരിക്കുകയാണ്. ഇപ്പോഴിതാ സ്‌റ്റേറ്റ് ബാങ്ക് ഓഫ് ഇന്ത്യ ഭവന വായ്പയ്ക്കുള്ള ചുരുങ്ങിയ പലിശ നിരക്ക് ഉയര്‍ത്തുകയും ചെയ്തതോടെ ഭവന വായ്പാ പലിശ നിരക്കുകളും ഒരു നിര്‍ണായക സന്ധിയിലെത്തിയിരിക്കുകയാണ്. 6.70 ശതമാനമുണ്ടായിരുന്ന പലിശ നിരക്കില്‍ നിന്നും 6.95 ശതമാനമായാണ് എസ്ബിഐ ചുരുങ്ങിയ ഭവന വായ്പാ പലിശ നിരക്ക് ഉയര്‍ത്തിയിരിക്കുന്നത്. എന്നാല്‍ അതേ സമയം റിസര്‍ ബാങ്ക് ഓഫ് ഇന്ത്യുടെ റിപ്പോര്‍ട്ടുകള്‍ അനുസരിച്ച് വീടുകളുടെ വിലയില്‍ കാര്യമായ പുരോഗതിയൊന്നുമില്ലാതെ നിശ്ചലാവസ്ഥയില്‍ തുടരുന്നതാണ് കാണുന്നത്.

കഴിഞ്ഞ ദശാബ്ദത്തിന്റെ തുടക്കത്തില്‍ ഏറ്റവും തിളങ്ങി നിന്ന വിപണിയായിരുന്നു ഭവന വിപണി. എന്നാല്‍ പതിയെ ആ ആവേശം തണുക്കുകയായിരുന്നു. റിസര്‍വ് ബാങ്കിന്റെ ഹൗസ് പ്രൈസ് ഇന്‍ഡക്‌സ് പ്രകാരം മേഖലയില്‍ വളര്‍ച്ച കുറഞ്ഞു വരുന്നതായാണ് വ്യക്തമാക്കുന്നത്. 22 മുതല്‍ 23 ശതമാനം വരെ വളര്‍ച്ചയുണ്ടായിരുന്ന 11,12 സാമ്പത്തിക വര്‍ഷങ്ങളില്‍ 19ാം സാമ്പത്തിക വര്‍ഷമായപ്പോള്‍ 3.4 ശതമാനത്തിലെത്തി. 20ാം സാമ്പത്തിക വര്‍ഷത്തില്‍ 2.8 ശതമാനവുമായി. കോവിഡ് വ്യാപം രൂക്ഷമായ 21 സാമ്പത്തിക വര്‍ഷത്തിലെ മൂന്നാം പാദം വരെയുള്ള കണക്കുകള്‍ മാത്രമേ ഇത് വരെ ലഭ്യമായിട്ടുള്ളൂ. അത് പ്രകാരം പൂജ്യം വളര്‍ച്ചയാണ് 21ാം സാമ്പത്തിക വര്‍ഷത്തില്‍ ഉണ്ടായിരിക്കുന്നത്.

ഒരു നിക്ഷേപമെന്ന നിലയില്‍ വീട് വാങ്ങിക്കുന്നത് വര്‍ധിച്ച റിസ്‌ക് അനുപാതമുള്ള കാര്യമായി മാറിയിരിക്കുകയാണ്. കൂടാതെ രാജ്യത്തെ വാടക ആദായ ( വീടിന്റെ മൂല്യത്തെ അടിസ്ഥാനമാക്കിയുള്ള വാടക ശതമാനം) വും കുറഞ്ഞ നിരക്കിലാണുള്ളത്. വലിയ നഗരങ്ങളില്‍ പോലും ഏകദേശം 2 മുതല്‍ 3 ശതമാനം വരെയാണ് വാടക ആദായ നിരക്ക്.

2021 സാമ്പത്തിക വര്‍ഷത്തില്‍ മഹാരാഷ്ട്ര പോലുള്ള സംസ്ഥാനങ്ങള്‍ ഭവന വിപണിയില്‍ ഉണര്‍വ് വരുത്തുന്നതിനായി സ്റ്റാമ്പ് ഡ്യൂട്ടിയില്‍ ഇളവ് നല്‍കിയിരുന്നു.

പണപ്പെരുപ്പമാണ് ഇന്ത്യന്‍ ഭവനവിപണിയെ പിടിച്ചുലയ്ക്കുന്ന മറ്റൊരു പ്രധാന പ്രശ്‌നം.

ഭവന വായ്പാ ആദായം 2 ശതമാനവും ഓരോ വര്‍ഷവും വീടിന്റെ മൂല്യം 6 ശതമാനം വീതം ഉയരുമെന്നും കരുതുക. ഒപ്പം നികുതി മറ്റ് ചിലവുകള്‍ എന്നിവ ഓരോ വര്‍ഷവും ആകെ വിലയുടെ 0.5 ശതമാനമാണെന്നും കരുതുക. അപ്പോള്‍ ഒരു വര്‍ഷം നിക്ഷേപമെന്ന നിലയില്‍ അതില്‍ നിന്നും നിങ്ങള്‍ക്ക് ലഭിക്കുന്ന വരുമാനം 7.5 ശതമാനമായിരിക്കും.