വെറും 70 രൂപയ്ക്ക് പെൻഷൻ ഉറപ്പാക്കാം; ചെയ്യേണ്ടത് ഇത്രമാത്രം

പ്രതമാസ പെൻഷൻ കൈപറ്റുന്നവരാണ് നിങ്ങളെങ്കിൽ അത് നിലയ്ക്കാതിരിക്കാൻ ഇക്കാര്യം ഉറപ്പായും ചെയ്തിരിക്കാം. മുതിർന്ന പൗരന്മാർക്കുള്ള 'ലൈഫ് സർട്ടിഫിക്കറ്റ്' അഥവ ജീവൻ പ്രമാൻ പത്ര സമർപ്പിക്കാനുള്ള സമയമാണിത്. സൂപ്പർ സീനിയർ പൗരന്മാർക്ക് വേണ്ടിയുള്ള നടപടിക്രമങ്ങൾ ഒക്ടോബറിൽ ആരംഭിച്ചെങ്കിലും, പെൻഷൻകാർക്കുള്ള വിൻഡോ തുറന്നത് നവംബർ ഒന്ന് മുതലാണ്. എത്രയും വേഗത്തിൽ തന്നെ ലൈഫ് സർട്ടിഫിക്കറ്റുകൾ സമർപ്പിക്കാത്ത പക്ഷം അത് നിങ്ങളുടെ പെൻഷൻ മുടങ്ങുന്നതിന് കാരണമായേക്കാം. അതുകൊണ്ട് ബാങ്കുകളും പോസ്റ്റ് ഓഫീസുകളും ഉൾപ്പെടെ പെൻഷൻ വിതരണം ചെയ്യുന്ന ധനകാര്യ സ്ഥാപനങ്ങൾ വഴി ജീവൻ പ്രമാൻ പത്ര സമർപ്പിക്കണം. ഇത് ഓൺലൈനായി ചെയ്യാനുള്ള അവസരവും ഗുണഭോക്താക്കൾക്കുണ്ട്.

സമർപ്പിക്കുന്ന തീയതി മുതൽ 12 മാസക്കാലത്തെ സാധുതയാണ് ജീവൻ പ്രമാൻ പത്രത്തിനുള്ളത്. പെൻഷൻ ലഭിക്കുന്നവർക്ക് ആധാർ അടിസ്ഥാനമാക്കിയുള്ള ബയോമെട്രിക് ഓതന്റിക്കേഷൻ സംവിധാനവും ഒരു പ്രത്യേക സോഫ്റ്റ്‌വെയർ ആപ്ലിക്കേഷനും ഉപയോഗിച്ച് ഡിജിറ്റൽ ലൈഫ് സർട്ടിഫിക്കറ്റ് (ഡിഎൽസി) സൃഷ്ടിക്കാൻ കഴിയും. ഇത്തരത്തിൽ തയാറാക്കപ്പെടുന്ന ഡിജിറ്റൽ ലൈഫ് സർട്ടിഫിക്കറ്റ് ഓൺലൈനിൽ തന്നെ സൂക്ഷിക്കാനും ആവശ്യമുള്ളപ്പോൾ ഗുണഭോക്താവിനും പെൻഷൻ വിതരണ അതോറിറ്റിക്കും ലഭ്യമാക്കാവുന്നതാണ്. ബാങ്കിലെത്താതെ തന്നെ പെൻഷൻ ഗുണഭോക്താക്കൾക്ക് തടസങ്ങളൊന്നുമില്ലാതെ രേഖ സമർപ്പിക്കുന്നതിന് പല മാർഗങ്ങളും നിലവിലുണ്ട്.

സർക്കാർ നൽകുന്ന ഫെയ്‌സ് ഓതന്റിക്കേഷൻ ടെക്‌നോളജി ഉപയോഗപ്പെടുത്തുന്നതാണ് ഒരു രീതി. ആധാർ ഫേസ് ആർഡി ആപ്പ് വഴിയും ജീവൻ പ്രമാൻ ആപ്ലിക്കേഷൻ വഴിയും പെൻഷൻകാർക്ക് ആൻഡ്രോയിഡ് സ്മാർട്ട്ഫോൺ ഉപയോഗിച്ച് സർട്ടിഫിക്കറ്റുകൾ സമർപ്പിക്കാം. ഇന്ത്യ പോസ്റ്റ് പേയ്‌മെന്റ് ബാങ്ക് വെബ്‌സൈറ്റ് വഴി ഡിജിറ്റൽ ലൈഫ് സർട്ടിഫിക്കറ്റ് സമർപ്പിക്കാൻ ഗുണഭോക്താക്കൾക്ക് പോസ്റ്റ്മാനോട് ആവശ്യപ്പെടാനും സാധിക്കും. യാത്ര ചെയ്യാൻ ബുദ്ധിമുട്ടുള്ളവർക്ക് പ്രയോജനകരമാകുന്ന രീതിയിൽ വീട്ടുപടിക്കൽ സേവനമെത്തും. 70 വയസ് കഴിഞ്ഞവർക്കും ഭിന്നശേഷിക്കാർക്കുമാണ് ഈ സൗകര്യം ഉപയോഗപ്പെടുത്താൻ സാധിക്കുക.

ഇന്ത്യ പോസ്റ്റ് പേയ്‌മെന്റ് ബാങ്കിന്റെ (ഐപിബിബി) വാതിൽപ്പടി സേവനം, പെൻഷൻകാർക്ക് അക്കൗണ്ട് ഉണ്ടോ എന്നത് പരിഗണിക്കാതെ തന്നെ, 70 രൂപ നിരക്കിൽ പെൻഷൻകാർക്ക് ഡിജിറ്റലായി സമർപ്പിക്കാൻ അവസരമൊരുക്കുന്നു. പെൻഷൻ, പെൻഷനേഴ്‌സ് വെൽഫെയർ വകുപ്പ്, തപാൽ വകുപ്പ്, ഇന്ത്യ പോസ്റ്റ് പേയ്‌മെന്റ് ബാങ്ക് (ഐപിപിബി), ഇലക്‌ട്രോണിക്‌സ് ആൻഡ് ഐടി മന്ത്രാലയം എന്നിവ തമ്മിലുള്ള ഈ ശ്രമം രാജ്യത്തുടനീളമുള്ള എല്ലാ പെൻഷൻകാർക്കും സമർപ്പിക്കൽ പ്രക്രിയ സുഗമമാക്കാൻ ലക്ഷ്യമിടുന്നു. ലൈഫ് സർട്ടിഫിക്കറ്റ് സമർപ്പിക്കാൻ, പെൻഷൻകാർക്ക് ഇന്ത്യ പോസ്റ്റ് പേയ്‌മെന്റ് ബാങ്ക് പുറത്തിറക്കിയ മൊബൈൽ ആപ്പും ഉപയോഗിക്കാം. പോസ്റ്റ്മാൻ ആവശ്യമായ വിവരങ്ങൾ ശേഖരിക്കുകയും പെൻഷൻകാരന്റെ വിരലടയാളം എടുക്കുകയും ചെയ്യും. ഇതോടൊപ്പം ഗുണഭോക്താവ് 70 രൂപയും നൽകിയാൽ മതിയാകും.ലൈഫ് സർട്ടിഫിക്കറ്റ് പിന്നീട് പെൻഷൻ വിതരണം ചെയ്യുന്ന ബാങ്കിലേക്ക് അയയ്‌ക്കും, പെൻഷൻകാർക്ക് അത് സമർപ്പിക്കുന്നതുമായി ബന്ധപ്പെട്ട് ഒരു അറിയിപ്പ് ലഭിക്കുന്നതായിരിക്കും.