നിക്ഷേപം പോസ്റ്റ് ഓഫീസിലാക്കിയാലോ? സുരക്ഷയും പലിശയും ഉറപ്പാക്കാം... വിശദമായി അറിയാം

ഇന്ത്യൻ പോസ്റ്റോഫീസിന് കീഴിൽ നിരവധി നിക്ഷേപ പദ്ധതികളുണ്ട്. ഓരോരുത്തരുടെയും സാമ്പത്തിക ആവശ്യത്തിന് അനുസൃതമായി ആ പദ്ധതികളിൽ ഏതെങ്കിലും തെരഞ്ഞെടുക്കാം. അതിൽ ഏറ്റവും ജനപ്രിയ നിക്ഷേപ പദ്ധതിയാണ് പോസ്റ്റ് ഓഫീസ് സേവിംഗ്സ് അക്കൗണ്ട്. പണം ലാഭിക്കുന്നതിനുള്ള സുരക്ഷിതവും സൗകര്യപ്രദവുമായ മാർഗമാണ് പോസ്റ്റ് ഓഫീസ് സേവിംഗ്സ് അക്കൗണ്ടുകൾ. ഉയർന്ന ഫീസിനെക്കുറിച്ചോ മിനിമം ബാലൻസ് ആവശ്യകതകളെക്കുറിച്ചോ വിഷമിക്കാതെ തങ്ങളുടെ സമ്പാദ്യത്തിന് പലിശ നേടാൻ ആഗ്രഹിക്കുന്ന ആളുകൾക്ക് ഏറ്റവും അനുയോജ്യമാണ് പോസ്റ്റ് ഓഫീസ് സേവിംഗ്സ് അക്കൗണ്ട്. പണം ലാഭിക്കാൻ സുരക്ഷിതവും സൗകര്യപ്രദവുമായ മാർഗമാണ് നിങ്ങൾ തിരയുന്നതെങ്കിൽ, ഒരു പോസ്റ്റ് ഓഫീസ് സേവിംഗ്സ് അക്കൗണ്ട് പരിഗണിക്കാം.

പോസ്റ്റ് ഓഫീസ് സേവിംഗ്സ് അക്കൗണ്ട്

ബാങ്ക് സേവിം​ഗ്സ് അക്കൗണ്ട് പോലെ ഉപയോ​ഗിക്കാവുന്ന അക്കൗണ്ടാണ് പോസ്റ്റ് ഓഫീസ് സേവിംഗ്‌സ് അക്കൗണ്ടുകളും. 500 രൂപയാണ് അക്കൗണ്ട് തുറക്കുന്നതിനുള്ള ഏറ്റവും കുറഞ്ഞ തുക. പരിധിയില്ലാതെ അക്കൗണ്ടിൽ പണം സൂക്ഷിക്കാം. 4 ശതമാനം വാര്‍ഷിക പലിശയാണ് പോസ്റ്റ് ഓഫീസ് സേവിംഗ്‌സ് അക്കൗണ്ടിന് ലഭിക്കുന്നത്.

ആർക്കൊക്കെ അക്കൗണ്ട് തുറക്കാം

പ്രായപൂർത്തിയായ ഏതൊരാൾക്കും പോസ്റ്റ് ഓഫീസ് സേവിംഗ്സ് അക്കൗണ്ട് തുറക്കാം. വ്യക്തി​ഗത അക്കൗണ്ടായും ജോയിന്റ് അക്കൗണ്ടായും ആരംഭിക്കാം. പ്രായപൂർത്തിയാകാത്ത വ്യക്തിക്ക് വേണ്ടി പ്രായപൂർത്തിയായ ഒരാൾക്കും അക്കൗണ്ട് തുറക്കാം.

നിക്ഷേപവും പിൻവലിക്കലും

ഏറ്റവും കുറഞ്ഞ നിക്ഷേപ തുക: – 500 രൂപ (തുടർന്നുള്ള നിക്ഷേപം 10 രൂപയിൽ കുറയാത്തത്)

ഏറ്റവും കുറഞ്ഞ പിൻവലിക്കൽ തുക: – 50 രൂപ

പരമാവധി നിക്ഷേപം: - പരമാവധി പരിധിയില്ല

മിനിമം ബാലന്‍സ് 500 രൂപയില്‍ കുറയുന്ന പക്ഷം പിന്‍വലിക്കല്‍ അനുവദിക്കില്ല. ബാലന്‍സ് 500 രൂപയില്‍ താഴെ ആണെങ്കിൽ അക്കൗണ്ടിലെ പണത്തിന് പലിശ ലഭിക്കില്ല. സാമ്പത്തിക വര്‍ഷാവസാനം അക്കൗണ്ടില്‍ 500 രൂപ ഇല്ലെങ്കില്‍ 50 രൂപ അക്കൗണ്ട് മെയിന്റനന്‍സ് ഫീസായി ഈടാക്കും. അക്കൗണ്ട് ബാലന്‍സ് പൂജ്യമാകുന്നതോടെ അക്കൗണ്ട് റദ്ദാക്കും

പലിശ

മാസത്തിലെ പത്താം തീയതി മുതൽ മാസാവസാനം വരെ അക്കൗണ്ടിലുള്ള ക്ലോസിംഗ് ബാലന്‍സിൽ ഏറ്റവും കുറഞ്ഞ തുകയ്ക്കാണ് മാസത്തില്‍ പലിശ കണക്കാക്കുക. പലിശ വര്‍ഷത്തില്‍ കണക്കാക്കി വര്‍ഷത്തിലാണ് ക്രെഡിറ്റ് ചെയ്യുന്നത്.

നികുതി ഇളവ്

ആദായനികുതി നിയമത്തിലെ സെക്ഷൻ 80TTA പ്രകാരം 10,000 രൂപ വരെ നികുതി ഇളവ് ലഭിക്കും. പോസ്റ്റ് ഓഫീസ് സേവിംഗ്‌സ് അക്കൗണ്ടില്‍ ചെക്ക് ബുക്ക്, എടിഎം കാര്‍ഡ്, ഇബാങ്കിംഗ്/ മൊബൈല്‍ ബാങ്കിംഗ്, അടല്‍ പെന്‍ഷന്‍ യോജന, പ്രധാനമന്ത്രി സുരക്ഷ ഭീമ യോജന, പ്രധാനമന്ത്രി ജീവന്‍ ജീവന്‍ ജ്യേിത ഭീമ എന്നിവ ലഭിക്കും. ഇതിനായി പ്രത്യേക അപേക്ഷ സമർപ്പിക്കണം

ശ്രദ്ധിക്കേണ്ട കാര്യങ്ങൾ

ഒരു വ്യക്തിക്ക് ഒരൊറ്റ അക്കൗണ്ടായി ഒരു അക്കൗണ്ട് മാത്രമേ തുറക്കാൻ കഴിയൂ.

പ്രായപൂർത്തിയാകാത്തവർ/10 വയസ്സിനു മുകളിൽ പ്രായമുള്ളവർ എന്നിവരുടെ പേരിൽ ഒരു അക്കൗണ്ട് മാത്രമേ തുറക്കാൻ കഴിയൂ.

ഒറ്റത്തവണ ജോയിന്റ് അക്കൗണ്ടിലേക്കോ തിരിച്ചും മാറ്റുന്നത് അനുവദനീയമല്ല

അക്കൗണ്ട് തുറക്കുന്ന സമയത്ത് നോമിനേഷൻ നിർബന്ധമാണ്

പ്രായപൂർത്തിയാകാത്തവർ 18 വയസ് തികഞ്ഞതിന് ശേഷം പുതിയ അക്കൗണ്ട് തുറക്കുന്നതിനുള്ള ഫോമും അവന്റെ/അവളുടെ പേരിലുള്ള കെവൈസി രേഖകളും ബന്ധപ്പെട്ട പോസ്റ്റ് ഓഫീസിൽ സമർപ്പിക്കണം.

പോസ്റ്റ് ഓഫീസ് സേവിംഗ്സ് അക്കൗണ്ട് എങ്ങനെ തുറക്കാം

നിങ്ങളുടെ അടുത്തുള്ള പോസ്റ്റ് ഓഫീസ് ബ്രാഞ്ച് സന്ദർശിക്കുക.

ആവശ്യമായ കെ‌. വൈ. ‌സി രേഖകളും പാസ്‌പോർട്ട് വലുപ്പമുള്ള ഫോട്ടോകളും സഹിതം ഫോം പൂരിപ്പിക്കുക

അടയ്ക്കേണ്ട തുക നൽകി ഫോം സമർപ്പിക്കുക.