വർഷം 2.5 ലക്ഷം രൂപ ലഭിക്കണോ? എളുപ്പവഴികളെക്കുറിച്ചറിയാം വിശദമായി

എല്ലാ മനുഷ്യരുടേയും പ്രധാനപ്പെട്ട ആശങ്കകളിൽ ഒന്നാണ് വാർദ്ധക്യ കാലത്ത് എങ്ങനെ ജീവിക്കാനുള്ള പണം കണ്ടെത്തുമെന്ന്. ഏതെങ്കിലും സേവിംഗ്സ് സ്കീമുകൾ ചേരുന്നതാണ് എറ്റവും നല്ല മാർഗം. സ്കീമുകൾക്ക് സർക്കാർ പിന്തുണ കൂടി ഉണ്ടെങ്കിൽ നിക്ഷേപം സുരക്ഷിതവുമാക്കും.

വാർദ്ധക്യകാലത്ത് സ്ഥിര വരുമാനം നേടാൻ ആഗ്രഹിക്കുന്നവർക്കുള്ള സേവിംഗ്സ് സ്കീമാണ് സീനിയർ സിറ്റിസൺസ് സേവിംഗ്സ് സ്കീമുകൾ. ഇതിന് കേന്ദ്രസർക്കാറിന്റെ പിന്തുണയുമുണ്ട്. കുറഞ്ഞത് 1000 രൂപയും പരമാവധി 30 ലക്ഷം രൂപയും നിക്ഷേപിച്ച് 60 വയസ്സിന് മുകളിലുള്ള ആർക്കും ഏതെങ്കിലും പോസ്റ്റ് ഓഫീസിലോ ബാങ്കിലോ അക്കൗണ്ട് തുറക്കാം. അഞ്ചുവർഷമാണ് അക്കൗണ്ടിന്റെ കാലാവധി. അതോടൊപ്പം 1961-ലെ ആദായനികുതി നിയമത്തിലെ സെക്ഷൻ 80C നൽകുന്ന നികുതി ആനുകൂല്യങ്ങളും ലഭിക്കും. 8.2% വാർഷിക റിട്ടേണാണ് ലഭിക്കുക.

സീനിയർ സിറ്റിസൺസ് സേവിംഗ്സ് സ്കീമിൽ 30 ലക്ഷം രൂപ നിക്ഷേപിക്കുന്നതിലൂടെ 2.4 ലക്ഷം രൂപ വാർഷിക വരുമാനം നേടാം. മൂന്ന് മാസത്തിലൊരിക്കലാണ് പലിശ ലഭിക്കുക. അതായത് നിങ്ങളുടെ നിക്ഷേപം 30 ലക്ഷമാണെങ്കിൽ മൂന്ന് മാസത്തിലൊരിക്കൽ 61,500 രൂപ ലഭിക്കും. അതും 8.2 % വാർഷിക പലിശ നിരക്കിൽ. കഴിഞ്ഞ സാമ്പത്തിക വർഷം വരെ പരമാവധി നിക്ഷേപ പരിധി 15 ലക്ഷം രൂപ മാത്രമായിരുന്നു. എന്നാൽ കേന്ദ്രധനമന്ത്രി നിർമ്മല സീതാരാമൻ 2023-24 ബജറ്റിൽ എസ്‌സിഎസ്എസിനുള്ള പരമാവധി നിക്ഷേപം 15 ലക്ഷത്തിൽ നിന്ന് 30 ലക്ഷമായി ഉയർത്തി.

അഞ്ച് വർഷത്തിന് ശേഷം അക്കൗണ്ട് മൂന്ന് വർഷത്തേക്ക് കൂടി നീട്ടാൻ സാധിക്കും. അതുവഴി ഒരു സ്ഥിര വരുമാനം നിങ്ങളുടെ കൈകളിലെത്തിക്കാം. പോസ്റ്റ് ഓഫീസിലോ ഷെഡ്യൂൾ ചെയ്ത വാണിജ്യ ബാങ്കിലോ സീനിയർ സിറ്റിസൺസ് സേവിംഗ്സ് സ്കീം അകൗണ്ട് തുടങ്ങാം. ജോയിന്റ് അകൗണ്ടാണെങ്കിൽ അക്കൗണ്ട് തുറക്കാനുള്ള യോഗ്യത നിർണ്ണയിക്കാൻ ആദ്യ അക്കൗണ്ട് ഉടമയുടെ പ്രായം പരിഗണിക്കും, രണ്ടാമത്തെ അപേക്ഷകന് പ്രായപരിധിയില്ല.

എസ്‌സി‌എസ്‌എസിൽ നിക്ഷേപിക്കുമ്പോൾ അക്കൗണ്ട് ഉടമ, നിക്ഷേപം ഒരു പോസ്റ്റ് ഓഫീസ് വഴിയാണ് ചെയ്യുന്നതെങ്കിൽ, പലിശ ലഭിക്കുന്നതിന് ഒരു ഓപ്പറേറ്റിംഗ് പോസ്റ്റ് ഓഫീസ് സേവിംഗ്‌സ് അക്കൗണ്ട് ഉണ്ടായിരിക്കണമെന്ന് ഓർമ്മിക്കേണ്ടതാണ്. കൃത്യമായ സമയത്ത് കൃത്യമായ സേവിങ്സ് സ്കീമുകൾ കണ്ടെത്തുകയാണെങ്കിൽ വാർദ്ധക്യകാല ജീവിതവും സാമ്പത്തിക ഭദ്രതയുള്ളതാക്കാം.