പോസ്റ്റ് ഓഫീസ് സേവിംഗ്സ് അക്കൗണ്ടുകളുടെ ഈ പ്രത്യേകതകള്‍ നിങ്ങള്‍ക്ക് അറിയാമോ?

ഇന്ത്യയില്‍ ഏറെ പ്രചാരമുള്ള നിക്ഷേപ പദ്ധതികളില്‍ ഒന്നാണ് പോസ്റ്റ് ഓഫീസ് സേവിങ്സ് അക്കൗണ്ട്. രാജ്യത്തെ ഏത് പോസ്റ്റ് ഓഫീസില്‍ ചെന്നും സേവിങ്സ് അക്കൗണ്ട് തുറക്കാം. കേന്ദ്ര സര്‍ക്കാരിന്റെ നിയന്ത്രണത്തിലുള്ള തപാല്‍ വകുപ്പിനാണ് പോസ്റ്റ് ഓഫീസ് സേവിങ്സ് അക്കൗണ്ടുകളുടെ ചുമതല. പോസ്റ്റ് ഓഫീസ് സേവിങ്സ് അക്കൗണ്ടുകളിലെ നിക്ഷേപങ്ങളുടെ പലിശ നിരക്ക് നിശ്ചയിക്കുന്നത് റിസര്‍വ് ബാങ്കാണ്.

അടുത്തകാലത്തായി ബാങ്കുകളിലെ സേവിംഗ്സ് അക്കൗണ്ടുകള്‍ തുടര്‍ച്ചയായി കുറച്ചു കൊണ്ടിരിക്കുകയാണ്. ഇന്ത്യയിലെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) നിലവില്‍ സേവിംഗ്സ് അക്കൗണ്ടില്‍ നല്‍കുന്ന പലിശ നിരക്ക് 2.7 ശതമാനമാണ്. മറ്റ് പ്രധാന ബാങ്കുകളും ഏകദേശം ഇതിന് സമാനമായ നിരക്കുകളാണ് സേവിംഗ്സ് അക്കൗണ്ടുകളില്‍ നല്‍കി വരുന്നത്. അതേ സമയം പോസ്റ്റ് ഓഫീസ് സേവിംഗ്സ് അക്കൗണ്ടുകളില്‍ 4 ശതമാനം പലിശ നിരക്കാണ് അക്കൗണ്ട് ഉടമകള്‍ക്ക് ലഭിക്കുക.

സമീപത്തുള്ള പോസ്റ്റ് ഓഫീസില്‍ ചെന്ന് പൂര്‍ണമായ കെവൈസി വിവരങ്ങള്‍ സമര്‍പ്പിച്ചു കൊണ്ട് ഏതൊരു വ്യക്തിയ്ക്കും പോസ്റ്റ് ഓഫീസില്‍ സേവിംഗ്സ് അക്കൗണ്ട് ആരംഭിക്കാം. അക്കൗണ്ട് തുടങ്ങുന്നതിനായി വേണ്ട ഏറ്റവും ചുരുങ്ങിയ തുക 500 രൂപയാണ്. മാസത്തിലെ 10ാമത്തെ ദിവസത്തിനും അവസാന ദിവസത്തിനും ഇടയിലുള്ള ചുരുങ്ങിയ ബാലന്‍സ് തുകയിന്മേലാണ് ഓരോ മാസവും പോസ്റ്റ് ഓഫീസ് സേവിംഗ്സ് അക്കൗണ്ടുകളില്‍ പലിശ കണക്കാക്കുന്നത്.
ഓരോ സാമ്പത്തീക വര്‍ഷത്തിന്റെ അവസാനത്തിലും അക്കൗണ്ടില്‍ മിനിമം ബാലന്‍സ് ആയി 500 രൂപയെങ്കിലും നിലനിര്‍ത്തേണ്ടതുണ്ട്. അതില്‍ വീഴ്ച വരുത്തിയാല്‍ അക്കൗണ്ട് മെയിന്റനന്‍സ് ചാര്‍ജായി 100 രൂപ പിഴ ഈടാക്കും. ബാലന്‍സ് തുക പൂജ്യത്തിലേക്കെത്തിയാല്‍ അക്കൗണ്ട് ഓട്ടോമാറ്റിക്കലി അവസാനിപ്പിക്കപ്പെടുകയും ചെയ്യും.

സാമ്പത്തീക വര്‍ഷത്തിലെ ഓരോ പാദത്തിലും കേന്ദ്ര സര്‍ക്കാര്‍ പോസ്റ്റ് ഓഫീസ് സേവിംഗ്സ് അക്കൗണ്ടുകളുടെ പലിശ നിരക്ക് വിശകലനം ചെയ്യും. വിപണിയിലെ അപ്പോഴത്തെ നില അനുസരിച്ച് പലിശ നിരക്കില്‍ മാറ്റം വരുത്തുകയും വരുത്താതിരിക്കുകയോ ചെയ്യാം. നിലവില്‍ 4 ശതമാനം പലിശ സിംഗിള്‍, ജോയിന്റ് അക്കൗണ്ടുകളിലെ നിക്ഷേപങ്ങള്‍ക്ക് ലഭിക്കും. ഓരോ മാസവും പലിശ കണക്കാക്കി വാര്‍ഷികാടിസ്ഥാനത്തിലാണ് പലിശ വരുമാനം അക്കൗണ്ടിലെത്തുക. നിക്ഷേപങ്ങള്‍ക്ക് കുറഞ്ഞ റിസ്‌കില്‍ സ്ഥിരമായ വരുമാനം വേണമെന്ന് ആഗ്രഹിക്കുന്നവര്‍ക്ക് ഏറ്റവും അനുയോജ്യമാണ് പോസ്റ്റ് ഓഫീസ് സേവിങ്സ് അക്കൗണ്ട്.

പണമടച്ച് മാത്രമേ പോസ്റ്റ് ഓഫീസ് സേവിങ്സ് അക്കൗണ്ട് തുറക്കാന്‍ സാധിക്കുകയുള്ളൂ. പ്രായപൂര്‍ത്തിയാകാത്തവരുടെ പേരിലും പോസ്റ്റ് ഓഫീസ് സേവിങ്സ് അക്കൗണ്ട് തുറക്കാം; 10 വയസ്സിന് മുകളില്‍ പ്രായമുള്ള കുട്ടികള്‍ക്ക് സ്വയം അക്കൗണ്ട് തുറക്കാനും അത് നിയന്ത്രിക്കാനും അവസരമുണ്ട്. അക്കൗണ്ട് തുറക്കുമ്പോള്‍ത്തന്നെ നോമിനേഷന്‍ വിവരങ്ങള്‍ നല്‍കാം. സിംഗിള്‍, ജോയിന്റ് അക്കൗണ്ട് സൗകര്യം പോസ്റ്റ് ഓഫീസ് സേവിങ്സ് പദ്ധതിയിലുണ്ട്; രണ്ടോ മൂന്നോ ആളുകള്‍ക്ക് സംയുക്തമായി ജോയിന്റ് അക്കൗണ്ട് തുറക്കാം.

ചെക്ക് സൗകര്യമില്ലാത്ത അക്കൗണ്ടുകളില്‍ മിനിമം ബാലന്‍സ് 50 രൂപയാണ്. ചെക്ക് സൗകര്യമുള്ള അക്കൗണ്ടുകളില്‍ മിനിമം ബാലന്‍സ് 500 രൂപയാണ്. മൂന്നു സാമ്പത്തിക വര്‍ഷത്തില്‍ ഒരിക്കലെങ്കിലും ഇടപാട് നടത്തിയാല്‍ അക്കൗണ്ട് സജീവമായി നിലനിര്‍ത്താം. 10 വയസ്സിന് മുകളിലുള്ള ഏതൊരു ഇന്ത്യന്‍ പൗരനും പോസ്റ്റ് ഓഫീസ് സേവിങ്സ് അക്കൗണ്ട് തുറക്കാം. പ്രായപൂര്‍ത്തിയാകാത്ത കുട്ടികളുടെ പേരില്‍ രക്ഷിതാക്കള്‍ക്ക് അക്കൗണ്ട് തുറക്കാന്‍ സൗകര്യമുണ്ട്. ഒരു പോസ്റ്റ് ഓഫീസില്‍ നിന്ന് ഒരു വ്യക്തിക്ക് ഒരു സിംഗിള്‍ അക്കൗണ്ടും ഒരു ജോയിന്റ് അക്കൗണ്ടും തുറക്കാന്‍ മാത്രമാണ് അനുവാദം.

സേവിംഗ്സ് അക്കൗണ്ടില്‍ നിന്നും ലഭിക്കുന്ന പലിശയിന്മേല്‍ ഒരു സാമ്പത്തീക വര്‍ഷത്തില്‍ 3,500 രൂപ വരെയാണ് നികുതി ഇളവ് നേടുവാന്‍ സാധിക്കുക. ജോയിന്റ് അക്കൗണ്ട് ആണെങ്കില്‍ 7,000 രൂപയോളം നികുതി ഇളവ് ലഭിക്കും.