ആര്‍ടിജിഎസ് പണ ഇടപാടുകളെപ്പറ്റി ഈ മൂന്ന് കാര്യങ്ങള്‍ അറിയാമോ?

ആര്‍ടിജിഎസ് ഇടപാടുകള്‍ക്കായി ഈടാക്കിയിരുന്ന പ്രവര്‍ത്തന ചാര്‍ജ് റിസര്‍വ് ബാങ്ക് നിര്‍ത്തലാക്കിയിരുന്നു. ബാങ്കുകള്‍ ആര്‍ടിജിഎസ് ഇടപാടുകള്‍ക്കായി ചാര്‍ജുകള്‍ ഈടാക്കുന്നുണ്ട്. ഇന്‍വാര്‍ഡ് ഇടപാടുകള്‍ സൗജന്യമാണ്. അവയ്ക്കായി യാതൊരു തരത്തിലുള്ള ചാര്‍ജുകളും ഈടാക്കുന്നില്ല. ഔട്ട്‌വേര്‍ഡ് ഇടപാടുകളില്‍ 2 മുതല്‍ 5 ലക്ഷം വരെയുള്ളവയ്ക്ക് 24.5 (നികുതി ഒഴികെ) രൂപയും 5 ലക്ഷത്തില്‍ കൂടുതലുള്ള ഇടപാടുകള്‍ക്ക് 49.5 രൂപയും (നികുതി ഒഴികെ) ഈടാക്കുന്നു. എന്നിരുന്നാലും ബാങ്കുകള്‍ക്ക് ഈ തുകയില്‍ കുറഞ്ഞ തുകയും ചാര്‍ജായി ഈടാക്കാം. എന്നാല്‍ ആര്‍ബിഐ നിശ്ചയിച്ചിരിക്കുന്ന തുകയ്ക്ക് മുകളിലുള്ള തുക ചാര്‍ജായി ഈടാക്കാന്‍ ബാങ്കുകള്‍ക്ക് സാധിക്കില്ല.

ആര്‍ടിജിഎസ് ഇടപാടുകള്‍ നടത്തുന്നതിനായി ഉപഭോക്താവ് ബാങ്കില്‍ ചില വിവരങ്ങള്‍ സമര്‍പ്പിക്കേണ്ടതുണ്ട്. അടയ്ക്കുന്ന തുക, അയക്കുന്ന അക്കൗണ്ട് നമ്പര്‍, ബെനഫിഷ്യറി ബാങ്ക് ബ്രാഞ്ച്, ഐഎഫ്എസ് സി കോഡ് തുടങ്ങിയ വിവരങ്ങള്‍ അതില്‍ ഉള്‍പ്പെടും.

 ആര്‍ടിജിഎസ് ഉപയോഗിക്കുന്നത് മറ്റ് ഇടപാട് മാര്‍ഗങ്ങളെക്കാള്‍ കൂടുതല്‍ പ്രയോജപ്രദം. പരമാവധി തുകയുടെ പരിധിയില്ലാതെ സുരക്ഷിതമായ പണ വിനിമയത്തിന് ഇതു വഴി നിങ്ങള്‍ക്ക് സാധിക്കും. മാത്രമല്ല എല്ലാ ദിവസവും 24x7 ഈ സേവനം ലഭിക്കുകയും ചെയ്യും.

ഓണ്‍ലൈനായി ഇന്റര്‍നെറ്റ് ബാങ്ക് മുഖേനയും നിങ്ങള്‍ക്ക് പണമയക്കാന്‍ സാധിക്കും. അതിന് നിങ്ങള്‍ക്ക് ചെക്കോ, ഡിമാന്‍ഡ് ഡ്രാഫ്‌റ്റോ പോലുള്ളവയുടെ ആവശ്യം വരുന്നില്ല. പണം സ്വീകരിക്കാന്‍ ബെനഫിഷ്യറിക്ക് ബാങ്കില്‍ നേരിട്ട് പോകേണ്ട ആവശ്യവും വരുന്നില്ല.