ഒരു ദിവസം കൊണ്ട് 25 ലക്ഷം വരെ കിട്ടും; കെ.എസ്.എഫ്.ഇയുടെ ഈ സ്വർണ വായ്പയ്ക്ക് ഈ രേഖ മതി

സ്വർണ വായ്പകൾ എന്നും ജനപ്രിയമാണ്. പെട്ടെന്ന് പണം ആവശ്യമായി വരുമ്പോൾ ആശ്രയിക്കാവുന്ന വായ്പയാണിത്. രാജ്യത്തെ ബാങ്കുകളും ബാങ്ക് ഇതര സ്ഥാപനങ്ങളും സ്വർണ വായ്പകൾ നൽകുന്നുണ്ട്. ഓരോ സ്ഥാപനങ്ങളും വിവിധ പലിശയാണ് ഈടാക്കുന്നത്. കെ.എസ്.എഫ്.ഇയും സ്വർണ വായ്പകൾ നൽകുന്നുണ്ട്. മറ്റു സ്ഥാപനങ്ങളെ അപേക്ഷിച്ച് താരതമ്യേന കെ.എസ്.എഫ്.ഇയിൽ സ്വർണ വായ്പയ്ക്ക് പലിശ കുറവാണ്. ഒരു ദിവസം കൊണ്ട് 25 ലക്ഷം വരെ വായ്പ കിട്ടും.

നിങ്ങളുടെ സ്വർണത്തിന്റെ മൂല്യം അനുസരിച്ച് കെ.എസ്.എഫ്.ഇയിൽ നിന്നും 25 ലക്ഷം വരെ വായ്പ ഉറപ്പാക്കാൻ സാധിക്കും. അതായത് ചെറിയ പലിശയിൽ നിങ്ങൾക്ക് 25 ലക്ഷം വരെ നേടാനാവും. ഇത് കെ.എസ്.എഫ്.ഇയുടെ സാധാരണ സ്വർണ വായ്പയാണ്. മാത്രമല്ല കെ.എസ്.എഫ്.ഇയിൽ മറ്റു ചില സ്വർണ വായ്പകളുമുണ്ട്. എന്താണ് ഈ കെ.എസ്.എഫ്.ഇ സാധാരണ സ്വർണ വായ്പയുടെ പ്രത്യേകത? പലിശ നിരക്കും കാലാവധിയുമെല്ലാം മനസിലാക്കാം.

കെ.എസ്.എഫ്.ഇ സാധാരണ സ്വർണ വായ്പ

കെ.എസ്.എഫ്.ഇയുടെ സ്വർണ വായ്പകളിൽ എല്ലാവരും ചേരുന്ന വായ്പയാണിത്. ​ഗ്രാം അടിസ്ഥാനത്തിൽ ഏറ്റവും ഉയർന്ന തുക തന്നെ വായ്പയായി നൽകുന്നതാണ്. ഇവിടെ ഒരു ദിവസം കൊണ്ട് 25 ലക്ഷം വരെ പണം കിട്ടും. ഇന്നത്തെ ഉയർന്ന സ്വർണ വില അനുസരിച്ച് നോക്കിയാൽ എളുപ്പത്തിൽ കെ.എസ്.എഫ്.ഇയിൽ നിന്നും വലിയ തുക തന്നെ വായ്പയിനത്തിൽ ലഭിക്കും.

നിലവിൽ 7.50% പലിശയാണ് കെ.എസ്.എഫ്.ഇയുടെ സാധാരണ സ്വർണ വായ്പയിൽ നിന്നും ഈടാക്കുന്നത്. 12 മാസത്തേയ്ക്ക് ഈ വായ്പയുടെ കാലാവധി. വായ്പയെടുക്കുന്നയാൾക്ക് കുടിശ്ശികയുള്ള പലിശ അടച്ച് ഒരു വർഷത്തേക്ക് ലോൺ പുതുക്കാം, 36 മാസം വരെ ഈ സൗകര്യം പ്രയോജനപ്പെടുത്താം.

പലിശ നിരക്ക് മൂന്ന് തരത്തിൽ ലഭ്യമാണ്...

കെ.എസ്.എഫ്.ഇയുടെ സ്വർണ വായ്പയ്ക്ക് രണ്ട് തരത്തിലാണ് പലിശ ഈടാക്കുന്നത്. അതായത് നിങ്ങൾ എടുക്കുന്ന പണത്തിന് അനുസരിച്ച് പലിശയിൽ ചെറിയ വ്യത്യാസം വന്നേക്കാം. എല്ലാ മൂന്ന് മാസം കൂടുമ്പോഴാണ് പലിശ അടക്കേണ്ടത്. അത് മുടങ്ങാതെ അടക്കാൻ ശ്രദ്ധിക്കുക.

1) 20,000 രൂപ വരെ : 7.50%

2) 20,000 രൂപയ്ക്ക് മുകളിൽ : 9.25%

അപ്രൈസൽ ചാർജ്...

​സ്വർണം പരിശോധിക്കുന്നതിന് നൽകുന്ന ചാർജാണ് അപ്രൈസൽ ചാർജ്. കെ.എസ്.എഫ്.ഇയിൽ ഇത് 0.3% എന്ന നിരക്കിലാണ്. മിനിമം 30 രൂപയും പരമാവധി 300 രൂപയുമാണ് ഈ ചാർജ് നൽകേണ്ടി വരിക. എന്നാൽ സെക്യൂരിറ്റി ചാർജ്, ഇൻഷുറൻസ് ചാർജ് എന്നിവ ​സ്വർണ വായ്പയിൽ ഈടാക്കുന്നില്ല.

25 ലക്ഷം വരെ വായ്പ..

നിങ്ങൾക്ക് 25 ലക്ഷം വരെയാണ് സാധാരണ സ്വർണ വായ്പയിലൂടെ ലഭിക്കുന്നത്. ഇതിൽ 2 ലക്ഷം രൂപ വരെയാണ് കെ.എസ്.എഫ്.ഇ ലോൺ കൗണ്ടറിൽ നിന്നും ലഭിക്കുന്നത്. ബാക്കിയുള്ള തുക അക്കൗണ്ടിലൂടെ RTGS/NEFT വഴിയാണ് ലഭിക്കുന്നത്.

സ്വർണ വായ്പ ലഭിക്കുന്നതിനായി നിങ്ങളുടെ ആധാർ കാർഡിന്റെ കോപ്പി മാത്രം മതി. നിങ്ങൾ കെ.എസ്.എഫ്.ഇയിലെ ഒരു ചിറ്റാളൻ ആണെങ്കിൽ ഈ കോപ്പിയുടെ ആവശ്യമില്ല. ചിട്ടിയിൽ ചേരുമ്പോൾ നിങ്ങൾ ആധാറിന്റെ കോപ്പി നൽകിയിട്ടുണ്ടായിരിക്കും.