ജനമിത്രം ​ഗോൾഡ് ലോൺ: 5% പോലും പലിശ വേണ്ട, 12 മാസത്തിനുള്ളിൽ തിരച്ചടവ്, ഇത് ബാങ്കിനേക്കാൾ ലാഭം

സ്വർണത്തിൻ്റെ വില അനുദിനം വർദ്ധിച്ചു കൊണ്ടിരിക്കുന്നു. അതിനാൽ തന്നെ സ്വർണ വായ്പകൾക്കും ഇപ്പോൾ ഡിമാൻഡ് ഉയരുന്നുണ്ട്. വിപണി വില വർദ്ധിക്കുന്നതിനാൽ സ്വർണ വായ്പകൾക്ക് പരമാവധി തുക ലഭിക്കും. നിലവിൽ ഏറ്റവും കുറഞ്ഞ പലിശ നിരക്കിൽ സ്വർണ വായ്പ നൽകുന്നത് കെഎസ്എഫ്ഇയാണ്. അതാണ് കെഎസ്എഫ്ഇ ജനമിത്രം ​ഗോൾഡ് ലോൺ. 5 ശതമാനത്തിലും താഴെ പലിശ നിരക്കുള്ള വായ്പകൾ ബാങ്കുകൾ പോലും വാ​ഗ്ദാനം ചെയ്യുന്നില്ല എന്നതാണ് സത്യം.

സാധാരണ സ്വർണ വായ്പകളിൽ നിന്നും ഏറെ വ്യത്യാസമുള്ള വായ്പാ പദ്ധതിയാണ് ജനമിത്രം ​ഗോൾഡ് ലോൺ. കെഎസ്എഫ്ഇ ചിട്ടികൾക്ക് പ്രസിദ്ധമാണെങ്കിലും ആകർഷകമായ ആനുകൂല്യങ്ങളോടെ സ്വർണ വായ്പകൾ നൽകുന്നുണ്ട്. എന്താണ് ജനമിത്രം ​ഗോൾഡ് ലോൺ? വിശദമായി അറിയാം.

ജനമിത്രം ​ഗോൾഡ് ലോൺ

കെഎസ്എഫ്ഇ ജനമിത്രം ​ഗോൾഡ് ലോൺ സാധാരണ സ്വർണ വായ്പയേക്കാൾ മികച്ചതാണ്. ജനമിത്രം ​ഗോൾഡ് ലോണിലൂടെ പരമാവധി 10 ലക്ഷം വരെ ഒരാൾക്ക് ലഭിക്കും. ഇത് നിങ്ങൾ നൽകുന്ന സ്വർണത്തിൻ്റെ മൂല്യവും നിലവിലെ വിപണി വിലയും അനുസരിച്ചായിരിക്കും. ജനമിത്രം വായ്പയുടെ ഏറ്റവും ആകർഷകമായ ഘടകം അതിൻ്റെ പലിശ നിരക്കാണ്. വെറും 4.90% പലിശ നിരക്കാണ് ഈ സ്കീം വാ​ഗ്ദാനം ചെയ്യുന്നത്. അതായത് 5 ശതമാനം പോലും നൽകേണ്ടി വരുന്നില്ല. കെഎസ്എഫ്ഇയുടെ എല്ലാ ശാഖകളിലും ഈ വായ്പാ പദ്ധതി ലഭ്യമാണ്.

വായ്പയുടെ കാലാവധി

ജനമിത്രം ​ഗോൾഡ് ലോണിൻ്റെ തിരിച്ചടവ് ഇ.എം.ഐ അടിസ്ഥാനമാക്കിയാണ്. അതായത് വായ്പയെടുത്ത് 1 വർഷക്കാലാവധിയിൽ തിരിച്ചടവ് നടത്തണം. 12 തവണകളായിരിക്കും മൊത്തം നൽകേണ്ടി വരുന്നത്. എല്ലാ മാസവും കൃത്യമായി പണം തിരിച്ചടക്കേണ്ടതുണ്ട്. ഏതെങ്കിലും ഒരു മാസം മുടക്കം വന്നാൽ അതിനു 12% പിഴ ഈടാക്കും.

10 ലക്ഷം വായ്പ എടുത്താൽ ഓരോ മാസവും നിശ്ചിത തുക അടക്കാൻ സാധിക്കുന്നവർ മാത്രം ഈ വായ്പ തിരഞ്ഞെടുക്കുക. മാത്രമല്ല നിങ്ങൾ പണയം വെച്ച സ്വര്‍ണം 6 മാസത്തെ തിരിച്ചടവിന് ശേഷം ഭാഗികമായി തിരിച്ചെടുക്കാനും സാധിക്കും.

പലിശ നിരക്ക്

ജനമിത്രം ​ഗോൾഡ് ലോൺ നിലവിൽ 4.90% വാർഷിക പലിശ നിരക്കാണ് നൽകുന്നത്. കെഎസ്എഫ്ഇയുടെ സാധാരണ സ്വർണ വായ്പ പോലും 7.5% പലിശ നിരക്കാണ് ഈടാക്കുന്നത്. ഇത് ഫ്ലാറ്റ് പലിശ നിരക്കിലാണ് ഈടാക്കുന്നത്. അതിനാൽ 12 മാസങ്ങളിലും ഈ നിരക്കിൽ തന്നെ പലിശ മാറ്റമില്ലാതെ അടക്കേണ്ടി വരും.

ബാങ്കുകൾ നൽകുന്ന സ്വർണ വായ്പകളുമായി താരതമ്യം ചെയ്യുമ്പോൾ കെഎസ്എഫ്ഇ ​ഗോൾഡ് ലോൺ ഒരു മികച്ച പദ്ധതിയാണ്. കുറഞ്ഞ പലിശ നിരക്കും കുറഞ്ഞ തിരിച്ചടവ് കാലാവധിയും വായ്പ എടുക്കുന്നവർക്ക് എളുപ്പമാവുന്നു. പ്രതിമാസം ഒരു നിശ്ചിത തുക മാറ്റി വെച്ചാൽ പ്രതിസന്ധികളില്ലാതെ 12 ​ഗഡുക്കളായി വായ്പ തിരിച്ചടക്കാൻ സാധിക്കും.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.