10 ലക്ഷത്തിന്റെ ചിട്ടിയിൽ തിരിച്ചടവ് വെറും 3.50 ലക്ഷം; ആദ്യ മാസം കൊണ്ട് മുഴുവൻ തുകയും കിട്ടും

കെ.എസ്.എഫ്.ഇ ചിട്ടികൾ എല്ലാ സാമ്പത്തിക ശേഷിയുള്ളവർക്കും ​ഉപകാരപ്രദമായ നിക്ഷേപ പദ്ധതിയാണ്. പെട്ടെന്നുള്ള സാമ്പത്തിക നേട്ടം വേണ്ടവർക്കും, ഭാവിയിലേക്ക് വലിയ തുക ആ​ഗ്രഹിക്കുന്നവർക്കും കെ.എസ്.എഫ്.ഇ ഉചിതമായ മാർ​ഗമാണ്. കെ.എസ്.എഫ്.ഇയിൽ റ​ഗുലർ ചിട്ടികളും മൾട്ടി ഡിവിഷൻ ചിട്ടികളും ഉണ്ട്. ഒന്നിലധികം ഡിവിഷനുകളുള്ള ചിട്ടികളാണ് മൾട്ടി ഡിവിഷൻ ചിട്ടികൾ.

നിങ്ങൾ റ​ഗുലർ ചിട്ടികളിൽ ചേരുന്നതും മൾട്ടി ഡിവിഷനിൽ ചേരുന്നതും രണ്ട് നേട്ടങ്ങൾ സമ്മാനിക്കും. പെട്ടെന്നുള്ള സാമ്പത്തിക ആവശ്യങ്ങൾക്ക് റ​ഗുലർ ചിട്ടികളാവും മികച്ച തീരുമാനം. മൾട്ടി ഡിവിഷനിൽ സാധാരണയായി 4 ഡിവിഷനുകളാണ് ഉണ്ടായിരിക്കുക. ഒരു ഡിവിഷനിൽ 100 പേർ ഉണ്ടെങ്കിൽ മൊത്തം 400 പേരുണ്ടാവും മൾട്ടി ഡിവിഷനിൽ. ഒന്നിലധികം ഡിവിഷനുകളെ ഒറ്റ ചിട്ടിയായി നടത്തുന്നതിനാലാണ് അതിനെ മൾട്ടി ഡിവിഷൻ ചിട്ടി എന്ന് വിളിക്കുന്നത്. റ​ഗുലർ ചിട്ടികളിൽ 100 പേരായിരിക്കും.

10 ലക്ഷത്തിന്റെ ചിട്ടിയിൽ 9.50 ലക്ഷം ഉറപ്പാണ്...

100 മാസത്തേക്ക് 10 ലക്ഷത്തിന്റെ മൾട്ടി ഡിവിഷൻ ചിട്ടിയിൽ ചേർന്നാൽ പ്രതിമാസം 10,000 രൂപ അടക്കേണ്ടി വരും. നറുക്കെടുപ്പിലൂടെ നിങ്ങൾക്ക് ഭാ​​ഗ്യം വീണാൽ 5% കമ്മീഷൻ കിഴിച്ചാൽ ബാക്കി തുക മുഴുവനും ലഭിക്കും. 10 ലക്ഷത്തിന്റെ 5% കിഴിച്ചാൽ 9.50 ലക്ഷം രൂപ ലഭിക്കുന്നു. ഓരോ മാസവും ഒരു വ്യക്തിയ്ക്ക് നറുക്കെടുപ്പിലൂടെ പണം ലഭിക്കും. ഒപ്പം മൂന്ന് പേർക്ക് ലേലത്തിലൂടെയും പണം വിളിച്ചെടുക്കാം. ഓരോ മാസവും ഒരു വ്യക്തിയ്ക്ക് നറുക്ക് കിട്ടിയാൽ 100 മാസം കൊണ്ട് 100 പേർക്കാണ് നറുക്കെടുപ്പിലൂടെ 9.50 ലക്ഷം കിട്ടുന്നത്.

ലേലം വിളിക്കുന്നവർക്ക് പരമാവധി 35% വരെ കിഴിവിൽ വിളിക്കാവുന്നതാണ്. ഇങ്ങനെ വിളിക്കുന്നവർക്ക് 6.50 ലക്ഷം രൂപയാണ് ലഭിക്കുന്നത്. സാധാരണയായി പണത്തിന് അത്യാവശ്യമുള്ളവരായിരിക്കും ആദ്യ മാസങ്ങളിൽ ചിട്ടി വിളിച്ചെടുക്കുന്നത്.

എത്ര രൂപ തവണകൾ അടക്കണം?

​ആദ്യ മാസം നിങ്ങൾ 10,000 രൂപ അടക്കണം. അടുത്ത മാസം മുതൽ 35% കിഴിവിൽ ലേലം വിളിച്ചാൽ ഏകദേശം 7750 രൂപയാണ് പിന്നീട് പ്രതിമാസം അടക്കേണ്ടി വരുന്നത്. ഇത് ഏകദേശം ആദ്യത്തെ 30 മാസം വരെ ഈ കിഴിവിൽ ലേലം പോവും. എന്നാൽ അതിനു ശേഷം ഡിവിഡന്റ് കുറയുന്നതിന് അനുസരിച്ച് പ്രതിമാസ തവണ 10,000 വരെ കൂടാൻ സാധ്യതയുണ്ട്.

മുഴുവൻ തുകയും ചിട്ടി കിട്ടിയാൽ നേട്ടമെന്ത്?

ആദ്യ മാസം തന്നെ നറുക്കെടുപ്പിലൂടെ ചിട്ടി കിട്ടിയാൽ ലാഭം എന്താണ്? 10 ലക്ഷത്തിന്റെ ചിട്ടിയിൽ 9.50 ലക്ഷം രൂപയാണ് നറുക്കെടുപ്പിലൂടെ ലഭിക്കുന്നത്. ഈ തുക അതേ മാസം തന്നെ കെ.എസ്.എഫ്.ഇയിൽ എഫ്.ഡി ഇട്ടാൽ നിലവിലെ നിരക്ക് അനുസരിച്ച് 7.10% പലിശ ഉറപ്പാണ്. ഈ പലിശ പ്രകാരം നിങ്ങൾക്ക് പ്രതിവർഷം 67450 രൂപ പലിശ കിട്ടും. ഓരോ മാസവും ലഭിക്കുന്നത് 5620 രൂപ പലിശയാണ്.

ഈ പലിശ പ്രതിമാസ തിരിച്ചടവ് തുകയിലേക്ക് കൊടുത്താൽ നിങ്ങൾ എത്ര രൂപ അടക്കേണ്ടി വരും?

10,000 രൂപയിൽ നിന്ന് പ്രതിമാസ പലിശ 5620 രൂപ കുറച്ചാൽ 4380 രൂപ നിങ്ങൾക്ക് ചിട്ടിയിലേക്ക് അടക്കാം. ഇതിൽ 35% ഡിവിഡന്റ് കുറച്ചാൽ 2250 രൂപ വീണ്ടും കുറയും. അതായത് 4380ൽ നിന്ന് 2250 രൂപ കുറഞ്ഞാൽ 2130 രൂപയാവും പ്രതിമാസം നിങ്ങൾക്ക് വരുന്ന തിരിച്ചടവ് തുക. ഇത് എല്ലാ മാസവും ഒരുപോലെ ആവില്ല. ഡിവിഡന്റ് മാറുന്നതനുസരിച്ച് ഈ തുകയിൽ വ്യത്യാസം വരാം.

ഈ കണക്കിൽ തവണകൾ അടച്ചാൽ 100 മാസം കൊണ്ട് ഏകദേശം 3.50 ലക്ഷം രൂപ വരെയാണ് നിങ്ങൾക്ക് തിരിച്ചടവ് വരുന്നത്. അതായത് 6 ലക്ഷം വരെ നിങ്ങൾക്ക് ലാഭം കിട്ടുന്നു.

ശ്രദ്ധിക്കുക: ഈ തുകയെല്ലാം ഏകദേശ കണക്കുകളാണ്.