5 ലക്ഷം വരെ ഉറപ്പാക്കാം ഒപ്പം അധിക പലിശയും: കെ.എസ്.എഫ്.ഇയുടെ ഈ പ്രത്യേക സ്കീം ഏതാണ്?

നിങ്ങൾക്ക് പലപ്പോഴും പണത്തിന് ആവശ്യം വരുമ്പോൾ എങ്ങനെയാണ് പരിഹാരം കണ്ടെത്തുന്നത്. നിശ്ചിത തുക നിക്ഷേപമുള്ളവർക്ക് പ്രതിസന്ധികൾ വരില്ല. എന്നാൽ പലരും ഇത്തരം സാഹചര്യങ്ങളിൽ വായ്പാ മാർ​ഗങ്ങളെ ആശ്രയിക്കുന്നു. രാജ്യത്തെ ബാങ്കുകളും ബാങ്ക് ഇതര സ്ഥാപനങ്ങളും വിവിധ വായപകൾ നൽകുന്നു. എന്നാൽ ഒരു ബാങ്ക് വായ്പയേക്കാൾ കുറ‍ഞ്ഞ പലിശ കെ.എസ്.എഫ്.ഇ ചില സ്കീമുകൾ വാ​ഗ്ദാനം ചെയ്യുന്നു.

ചിട്ടികൾക്കു പുറമേ കെ.എസ്.എഫ്.ഇ നിരവധി സ്കീമുകൾ വാ​ഗ്ദാനം ചെയ്യുന്നുണ്ട്. നിക്ഷേപ സ്കീമുകളും വായ്പകളും ഇതിൽ പെടുന്നു. അത്തരത്തിൽ ഒരു പ്രത്യേക സാമ്പത്തിക മാർ​ഗമാണ് ഓവർഡ്രാഫ്റ്റ് സൗകര്യം. കെ.എസ്.എഫ്.ഇയുടെ ഏറ്റവും മികച്ച ഓവർഡ്രാഫ്റ്റ് സ്കീമാണ് സു​ഗമ (അക്ഷയ). ഇതിലൂടെ സാധാരണ ബാങ്ക് വായ്പയേക്കാൾ ഉയർന്ന തുക സ്വന്തമാക്കാൻ സാധിക്കുന്നു എന്നതാണ് ശ്രദ്ധേയമായ കാര്യം.

എന്താണ് കെ.എസ്.എഫ്.ഇ സു​ഗമ (അക്ഷയ) ഓവർ ഡ്രാഫ്റ്റ് സ്കീം?

നിങ്ങൾ ഒരു ഗവൺമെന്റ് ജീവനക്കാരനോ പൊതുമേഖലാ സ്ഥാപനങ്ങളിൽ ജോലി ചെയ്യുന്നതോ എയ്ഡഡ് സ്കൂളിലെ ജീവനക്കാരനോ ആണെങ്കിൽ ഈ ഓവർ ഡ്രാഫ്റ്റ് സേവനം പ്രയോജനപ്പെടുത്താൻ സാധിക്കും. ഇത്തരം ജീവനക്കാരുടെ ശമ്പള സർട്ടിഫിക്കറ്റിന്റെ അടിസ്ഥാനത്തിൽ 5,00,000 രൂപ വരെ ഓവർഡ്രാഫ്റ്റ് സൗകര്യം അനുവദിയ്ക്കും. മാത്രമല്ല മേൽപ്പറഞ്ഞ തരത്തിൽ ജോലിക്കാരായ ദമ്പതികൾക്ക് അവരുടെ ശമ്പള സർട്ടിഫിക്കറ്റുകളുടെ അടിസ്ഥാനത്തിൽ 5,00,000 രൂപ വരെ ഓവർഡ്രാഫ്റ്റ് എടുക്കാവുന്നതാണ്.

5 ലക്ഷം വരെ ലോൺ എടുക്കാതെ സ്വന്തമാക്കാം എന്നത് രസകരമായി തോന്നിയേക്കാം. എന്നാൽ ഈ സ്കീമിനും പലിശ നിരക്കുണ്ട്. പക്ഷേ ഒരു ബാങ്ക് ലോൺ എടുക്കുന്ന പോലെ പ്രയാസകരമായ രേഖകളൊന്നും ഈ സ്കീം ആവശ്യപ്പെടുന്നില്ല. എന്നാൽ ആദ്യം ഈ ഓവർഡ്രാഫ്റ്റ് സൗകര്യം ഉപയോ​ഗപ്പെടുത്തുന്നതിനു മുന്നേ വായ്പയ്ക്ക് അപേക്ഷിക്കുന്ന വ്യക്തി അവരവരുടെ സൗകര്യം അനുസരിച്ച് ഏതെങ്കിലും ശാഖയിൽ സുഗമ (സേവിങ്ങ്സ്) അക്കൗണ്ട് തുടങ്ങേണ്ടതാണ്.

പലിശ നിരക്കും കാലാവധിയും...

സു​ഗമ സേവിം​ഗ്സ് അക്കൗണ്ടിലൂടെയാണ് ഓവർഡ്രാഫ്റ്റ് സൗകര്യം ഉപയോഗിക്കാൻ സാധിക്കുന്നത്. ഇതിലൂടെ നിങ്ങൾ എടുക്കുന്ന തുകയ്ക്ക് കാലാവധി പൂർത്തിയാവുന്നതു വരെ 13% എന്ന നിരക്കിലാവും പലിശ ഈടാക്കുന്നത്. അക്കൗണ്ട് ക്രെഡിറ്റ് ബാലൻസ് ആണ് കാണിക്കുന്നതെങ്കിൽ, മാസത്തിലെ ഏറ്റവും കുറവ് ബാലൻസ് കണക്കാക്കി, അതിന് സാധാരണ സുഗമ പലിശ നിരക്കായ 4.50% നിങ്ങൾക്ക് ലഭിക്കും. ഓവർ ഡ്രാഫ്റ്റ് കാലാവധിയുടെ പരിധി 36 മാസമാണ്. ആവശ്യമെങ്കിൽ നിബന്ധനകൾക്ക് വിധേയമായി അത് പുതുക്കാവുന്നതാണ്.

കൂടുതൽ അറിയാം....

ഈ പദ്ധതി പ്രകാരം മേൽപ്പറഞ്ഞ ജീവനക്കാർക്ക് മാത്രമേ ഈ ഓവർഡ്രാഫ്റ്റ് സൗകര്യം പ്രയോജനപ്പെടുത്താൻ സാധിക്കുകയുള്ളൂ. വളരെ ചുരുങ്ങിയ ചെലവിൽ തങ്ങളുടെ ആവശ്യങ്ങൾ നിറവേറ്റാൻ ഇതിലൂടെ സാധിക്കും. 5 ലക്ഷം വരെ ഇത്രയും കുറഞ്ഞ പലിശയിൽ നിങ്ങൾക്ക് ലഭിക്കും. മാത്രമല്ല സു​ഗമ സേവിം​ഗ്സ് അക്കൗണ്ടിലെ ക്രെഡിറ്റ് ബാലൻസ് അനുസരിച്ച് അധിക പലിശയും ലഭിക്കുന്നു.

ഈ സ്കീമിൽ നിങ്ങൾക്ക് എത്ര രൂപയാണോ ആവശ്യം ആ പണം മാത്രം എടുക്കാൻ വായ്പക്കാർക്ക് സ്വാതന്ത്ര്യമുണ്ട്. അതിനാൽ നിങ്ങൾ എടുത്ത തുകയ്ക്ക് മാത്രമേ പലിശ ഈടാക്കുന്നുള്ളൂ എന്നതും ഈ സ്കീമിനെ മറ്റു പദ്ധതികളിൽ നിന്നും വ്യത്യസ്തമാക്കുന്നു.