100 രൂപയുണ്ടോ കൈയിൽ? കെ.എസ്.എഫ്.ഇയുടെ ഈ കിടിലൻ അക്കൗണ്ടിൽ നിക്ഷേപിക്കാം, ലാഭം ഉറപ്പാണ്

കെ.എസ്.എഫ്.ഇ ഒരു സുരക്ഷിത നിക്ഷേപ മാർ​ഗമാണ്. കാരണം കേരള സർക്കാരിന്റെ കീഴിലുള്ള ഒരു ധനകാര്യ സ്ഥാപനമെന്ന നിലയിൽ എല്ലാ നിക്ഷേപകർക്കും വിശ്വാസ്യ യോ​ഗ്യമായ സ്ഥാപനമാണിത്. കെ.എസ്.എഫ്.ഇ നിക്ഷേപങ്ങൾ എന്നും ഉറപ്പുള്ള നേട്ടങ്ങൾ നൽകുന്നു. ഒരു വലിയ സാമ്പത്തിക നേട്ടം ആ​ഗ്രഹിക്കുന്നവർക്ക് വലിയ തുകയുള്ള ചിട്ടികളിൽ നിക്ഷേപിച്ച് സമ്പാദിക്കാം. പെട്ടെന്നുള്ള സാമ്പത്തിക ആവശ്യങ്ങൾ വേണ്ടവർക്ക് ചെറിയ ചിട്ടി സ്കീമുകളിൽ ചേർന്ന് പെട്ടെന്ന് തന്നെ ചിട്ടി വിളിച്ചെടുക്കാം.

വെറുമൊരു ചിട്ടിക്കമ്പനി എന്ന നിലയിലല്ല കെ.എസ്.എഫ്.ഇ വളരുന്നത്. ഇവിടെ വായ്പാ സൗകര്യങ്ങളും സ്ഥിര നിക്ഷേപങ്ങളും ഉണ്ട്. ഈ ചിട്ടികൾക്ക് പുറമേ കെ.എസ്.എഫ്.ഇ ഒരു സേവിം​ഗ്സ് അക്കൗണ്ട് പരിചയപ്പെടുത്തുന്നുണ്ട്. സാധാരണ ബാങ്കുകളിൽ കാണപ്പെടുന്ന സേവിം​ഗ്സ് സ്കീം പോലെയാണ് കെ.എസ്.എഫ്.ഇയുടെ സു​ഗമ സേവിം​ഗ്സ് അക്കൗണ്ട്. എന്തിനാണ് ഈ അക്കൗണ്ട് ഉപയോ​ഗിക്കുന്നത്? എന്താണ് ഇതിന്റെ ​ഗുണങ്ങൾ? വിശദമായി അറിയാം.

എന്താണ് കെ.എസ്.എഫ്.ഇ സു​ഗമ സേവിം​ഗ്സ് അക്കൗണ്ട്?

ഇതൊരു സുരക്ഷിതമായ സേവിം​ഗ്സ് അക്കൗണ്ടാണ്. മറ്റു ബാങ്കുകളുടെ സേവിം​ഗ്സ് അക്കൗണ്ടുകളേക്കാൾ ഉയർന്ന പലിശയാണ് കെ.എസ്.എഫ്.ഇ ഉറപ്പ് നൽകുന്നത്. ബാങ്കുകളുടെ സേവിം​ഗ്സ് അക്കൗണ്ടുകൾ സാധാരണയായി 3.50% വരെയാണ് പലിശ നൽകുന്നത്. എന്നാൽ കെ.എസ്.എഫ്.ഇ സുഗമ അക്കൗണ്ട് വഴി 4.50% വരെയാണ് പലിശ നൽകുന്നത്. വർഷത്തിൽ രണ്ട് തവണയായിട്ടാണ് ഈ സേവിം​ഗ്സ് അക്കൗണ്ടിലൂടെ പലിശ നൽകുന്നത്.

1) ആധാർ കാർഡ് കോപ്പി, പാൻ കാർഡ് കോപ്പി എന്നിവ സമർപ്പിക്കുക

2) സേവിം​ഗ്സ് അക്കൗണ്ട് തുറക്കാനുള്ള ഫോം പൂരിപ്പിക്കുക (പേര്, ജനന തിയ്യതി, നോമിനി വിവരങ്ങൾ, സി​ഗ്നേച്ചർ എന്നിവ നൽകുക)

3) ഫോട്ടോ എടുക്കുക (2 എണ്ണം)

4) സി​ഗ്നേച്ചർ പരിശോധിക്കുക

100 രൂപയ്ക്ക് അക്കൗണ്ട് തുറക്കാം....

സു​ഗമ സേവിം​ഗ്സ് സ്കീം 100 രൂപയ്ക്ക് ആരംഭിക്കാവുന്നതാണ്. നിങ്ങൾക്ക് ഈ അക്കൗണ്ടിൽ എത്ര രൂപ വേണമെങ്കിലും നിക്ഷേപിക്കാം. മറ്റു അക്കൗണ്ടുകളെ അപേക്ഷിച്ച് സു​ഗമ സേവിം​ഗ്സ് അക്കൗണ്ടിൽ ബാലൻസ് തുക വളരെ കുറവാണ്. നിങ്ങൾക്ക് കൃത്യമായി പലിശ ഉറപ്പാക്കണമെങ്കിൽ മിനിമം ബാലൻസ് 250 രൂപയിൽ നിർത്തണം. എങ്കിൽ പെട്ടെന്നൊരു സാമ്പത്തിക ആവശ്യം വരുമ്പോൾ നിങ്ങൾക്ക് ഏത് കെ.എസ്.എഫ്.ഇ ശാഖയിൽ നിന്നും ഈ പണം പിൻവലിക്കാം. എന്നാൽ ഒരു ദിവസം നിങ്ങൾക്ക് ഒരു സു​ഗമ സേവിം​ഗ്സ് അക്കൗണ്ടിൽ നിന്നും 19999 രൂപ വരെയാണ് പിൻവലിക്കാൻ സാധിക്കുന്നത്.

കെ.എസ്.എഫ്.ഇ ചിട്ടിയിൽ ഉള്ളവർക്കും സു​ഗമ സേവിം​ഗ്സ് ഉപയോ​ഗിക്കാം...

കെ.എസ്.എഫ്.ഇ ചിട്ടിയിൽ അം​ഗമായവർക്ക് സു​ഗമ അക്കൗണ്ട് ഒരു എളുപ്പ മാർ​ഗമാണ്. ഒരു പക്ഷേ നറുക്കിലൂടെ മുഴുവൻ തുകയും ലഭിച്ച വ്യക്തിയാണ് നിങ്ങൾ എങ്കിൽ, ഇനിയുള്ള തിരിച്ചടവ് തുക എത്രയാണെന്ന് കണക്കാക്കി അത് സു​ഗമ സേവിം​ഗ്സ് അക്കൗണ്ടിൽ നിക്ഷേപിക്കാവുന്നതാണ്. അങ്ങനെ നിക്ഷേപിച്ചാൽ ഓരോ മാസവും തിരിച്ചടവ് തുക കൃത്യമായി ചിട്ടിയിലേക്ക് ക്രെഡിറ്റാവുന്നതാണ്. ഒപ്പം ആ തുകയ്ക്ക് പലിശയും ലഭിക്കും.

ഇതിൽ ശ്രദ്ധിക്കേണ്ട കാര്യമെന്തെന്നാൽ ഡെബിറ്റ് കാർഡ്, ചെക്ക് ബുക്ക്, ക്രെഡിറ്റ് കാർഡ്, യു.പി.ഐ സേവനം എന്നിവയൊന്നും സു​ഗമ സേവിം​ഗ്സിൽ ലഭ്യമല്ല.